فوبيا اللوبيا..وتحسين السين

فارسة أحلامي


ربنا قدر ليا إني أعيش محروم من حرف السين ..
أسمعه لكن ما أنطقهوش
لذا ..فأنا عايش حياتي بخمسة وعشرين حرف بس ,وعندي حرفين مكررين :.,السين والشين ..قصدي الشين والشين ..
أنا مش هقول ليه يارب خليتني كده ؟؟دا أنا عمري ما عملت حاجة وحشة..! وأعيط زي أمينة رزق..لأ ..لإني دا مش حقيقي ..أناعمايلي كلها وحشة ..
أنا بس حاولت أعرف السبب ..
هو الأول ,حرف السين ده بيطلع منين ..؟
سألت أمي  (لإن معاها كل الوثائق عني وأنا صغير)قالتلي زماان إن سببه لما حطيت لأخويا اللوبيا في ودانه.
أنا أولاً مابحبش اللوبيا ,وبشم رحتها أدوخ ويجيلي أنيميا .. ولما آكلها مابدخلش الحمام ..خالص
فقالتلي إنها إن الجسم بيخرجها على هيئة حرف السين ..المفقود عندي
أنا عارف إنها بتضحك عليا .. لكن أنا برده مش هآكل اللوبيا حتى لو هعيش ناقص حرف .. ممكن أنطقه بلغة تانية ,
بس واضح إن الموضوع كبير لإن السين بالإنجليزي بتتنطق  سي ..خلاص .!! مالهاش مخرج تاني ينطقوها منه .؟كل اللي عملوه شالوا حرف النون من آخر الكلمة ونطقوها إنجليزي..مالقوش غير حرف النون يشيلوه ,دا أسهل حرف ,أنا ممكن أنطقه بوداني
لكن برده مش هآكل اللوبيا .. أمي عارفة إني مبحبهاش .. عشان كده وأنا صغير طفل يعيني راحت إشترت فدان لوبيا وإحنا صغيرين .. جابت كتيير قوي 
وطبعن خوفي منها زاد لما قالولي في كتاب العلوم إن الكِلية شبه اللوبيا وهي صغيرة .,ولما بتكبر بتبقى شبه حرف السي .. رجعنا تاني لحرف السين ..
أنا إتضايقت قوي من اللوبيا ..وإتعقدت من حرف السين ..خاصة لإنه ماكنش بيخيليني أعرف أشتم كويس وأنا صغير والشتيمة تقلب لحاجة كويسة ..ودا اللي عقدني أكتر .
إتفقنا أنا وأخويا إننا نلعب باللوبيا اللي أمي جيباها دي لإننا مش هناكلها .. طلع فيها بدور المحترم (زي يحي الفخراني في فيلم الكيف) وقالي لأ حرام نلعب بيها ..أنا ممكن أحبها..إتجنيت أنا لما سمعت كلمة "أحبها..
قلتله طب أنا عندي لعبة حلوة قوي مش هنبوظ بيها اللوبيا .. ورحت حاططله في ودانه حباية لوبيا حلوة .. ولما لاقيت إن الموضوع قلب بجد ومش راضية تخرج تاني ..رحت آخد واحدة تانية وحاطتها في وداني أنا كمان ..طبعاً هتفتكروا إني حطيت في وداني أنا كمان عشان أتهم فيه إنه بدأ الأول ..غلط ..دا سيناريو فيلم تاني .. أنا فكرت وقتها إن ممكن بابا لما يبص في ودان أخويا ويلاقي اللوبيا ..ويستغرب .. يقوم يبص في وداني أنا كمان يلاقي فيها لوبيا برده ,يقوم يطمن ويفكر إن دي حاجة طبيعية بس هو مش واخد باله ..وإن دي مميزة مش عند كل الناس ..ومش حاجة وحشة لأخويا ,بدليل إنها في وداني أنا كمان ..يقوم ما يضربنيش ..لإننا مولودين بيها..يعني هكون حطيتها لنفسي مثلن ..!!
إتضح فعلن إن الإنسان الكبير بيفهم أكتر من الصغير ..غير ماكنت فاكر ..هو ماضربنيش وأنا متأكد إنه ماضربنيش لإنه كان بيخاف مني .. أنا كنت فعلن طفل شوارع وكل اللي في البيت بيخافوا من لساني ويتمنوا إن الحروف كلها تفضل تطير (مش حرف السين بس) لحد ما أتكلم لغة تانية خالص .
السبب التاني جايز يكون خاف من إني أحطله في ودانه لوبيا وهو نايم ..فيقوم  مايلاقيش حرف السين بتاعه.
هو دافع إني عملت لأخويا كده حاجتين ..إنه حب اللوبيا من غير إذني .. السبب الأهم إني حبيت أطيرله حرف السين هو كمان ..
لكن ياخسارة أخدني عمي  للعيادة بتاعته وطلعلي اللوبيا ..لكن نسي حرف السين
بس برده ماقولتليش ..أعمل إيه ..
ولإن أول خطوة في حل أي مشكلة ..إنك تعملـّها جروب على الفيس بوك.. تاني حاجة تبعت دعوة لكل أصحابك.. ثالثاً تنسى المشكلة خالص.., ومن هذا المنطلق أطالب وبشدة بتغيير مخرج حرف السين ..خلوه حرف صامت ..شيلوه وحطوا بدالة صفارة طويلة متقطعة ..أوحتى إشارة Buzz
لكن سبحان الله ..ممكن الإنسان يتحرم من حاجة ,لكن ربنا يزيده في حاجة تانية يحمد ربنا عليها ويقول إنها أغلى من كل حرمان ..زي نعمة الشجاعة كده .. وعن تعريف الشجاعة ,فهو يعني إنك تكون شجاع
أنا من يومي وهما بيقولوا عليا شجاع ..مابخافش من أي حاجة ..خالص.

يعني من صغري وأنا بتفرج على (المومياء) و (saw) ولا خفت منهم رغم إني طفل,ولا حتى الواد اللي كان عاوز يسرق الخاتم ويوقع بين الإتنين في Lord of the Rings...
 ومعنى إني كنت بعدما أتفرج عليهم أفزع في نص الليل أقول" اذهب إلى الجحيم ..اذهب إلى الجحيم " ..وأروح أصحـّي دادي(اللي هو أبويا) يجي يقعد جنبي على ما أنام ..,وأرجع أفزع تاني وأضربه بالأقلام وهو جنبي وأنا نايم ..وأرفس (في مناطق حساسة ) .,خلاته يطلع التليفزيون من البيت ويلعن "إخترنا لك " و"نادي السنيما" .
عمر ده مايمنع كوني شجاع ..ده بالضبط مايتعداش كونه رد فعل ,بالظبط زي أما تخبط حد على ركبته تقوم ترد لفوق ..أو لما تزغزغ نفس الحد ده يقوم يبصلك برزالة يقولك هي هي هي (يقصد يعني ماضحكتوش ولا حاجة) حركة لاإرادية يعني ,
أنا عمري ماخفت ..
 غير من حاجتين..
الحاجة الأولى:., إن أي سرير مركون للحيطة أخاف منه ,لازم يكون في نص الأوضة وممكن أنزل منه من اليمتين..ودا اللي بيجن أمي ويخليها تجيب لوبيا,
الحاجة التانية :, مريم بنت جارنا ,عندها 3 سنين .. البنت بتسيب البيت وتنزل تركب الأسانسير لوحدها ويجيبوها من عالقهوة إللي تحت ..رغم إن أبوها مركب ترابيس في البيت كإنه قافل باب قلعة بيفضل يفتح في كالون الباب سبع تكات ..بحس إن لسان الكالون واصل للدور الأرضي.
أبوها لما بيدلعها بيقولها "شارون".. البت بتمشي زي مصاصي الدماء وهما داخلين يمصوا دم حد .. ومابتتكلمش لسه غير بتقول بابا.., بس بسمعها وهي في الشارع تحت يعني فوقيها بتسع أدوار بتقولها زي الراجل اللي بيقول (هل ؟ ستتركونه يسُب آلهتنا)..
عشان خاطري ماحدش يقولها إني كتبت عنها ..

في حب البروسيزس








قصيدة في حب البروسيزس


للشاعر الغبائي /إمرؤ القيئ


أنا بكره البروسيزس :: وبقولها بكل صراحة
وبموت أنا في البيدو :: والإندو والجراحة

أنا بكره البروسيزس : وعمايل الإمبرشن
البيشنت بُقه واسع : وف رِدجه أترشن

مش عارف أملى الشارت : وماحدش بيمضيلي
والله خلاص إحترت : ماحد يدعيلي

البيشنت كان هيباتك : وماعرفتش غير بعدين
دا ياما كح في وشي : وأنا مش آخد فاكسين

نفسي آخدله الإمبريشن :: بس بُقه مافهش نور

وإحترت في البوزيشن :: إلحقني يا دكتور

أنا بكره البروسيزس .. والله ما ليها داعي

وأموت أنا في الإندو ... ولو حأكسس بدراعي

عملت المكس سُوفت .. وفطرتـُه ألجينيت
قال:زيك عمري ما شفت ..وإرحمني أنا إتهريت

والله أنا إتهريت


البيشنت خلاص شفطني .. رايحلي جاي في تاكس
والقسم ما بيسلمشي .. ولا حتى حتة واكس

أنا بكره البروسيزس.. وعجايب الإمتحان

دا حتى اليونت بايظ ..,أنا مين دخلني أسنان


أنا بكره شغل اللاب .. وبحب التكنشن
لو الزنك مني باظ .. يعملـّه أديشن



عملت الجُو ريليشن ..قالولي اعمل ريميك

رحت في سكشن تاني .. قالي تسلم إيديك 

..قالي الله عليك

ندهت النايب شافلي .. وبقرف بَص وقالّي
الرِدج عالي من وَرَه ., ما تقيسه بالمسطره

أنا بكره الأكريل .. وألبس عشانه الماسك
ولما المونومر بيطير .. بحبسه في الفلاسك
والله في الفلاسك


أنا بكره الهاند بيس .. والكاست والتراي .,

بيجيلي منهم كوابيس ..ما كفاية الإكس راي


سلمت للراجل الطقم.. قالي دا يبقى التاسع
تلاتة وقعوا إتكسروا.. والباقي كله واسع



الطقم ماكنش ثابت .. بيتحرك من قـُدّام
لا نافع فتح فرينم .. ولا حتى البوست دام


من الآخر والله بقولها .. وبجد مش هزار

المادة جابتلي عقدة .. وبقيت يا ناس حمار

من يوم ما كرهت المادة ...وبنام من غير شخير
ومابقتش أقلق من النوم ...ولا أعملها عالسرير

آه آآآآآآآآآآآآآه آآآآآآه أه
يا بروسييييييييييزس .. مكنش العشم يا بروسيزس


أعراض الإكثار من نشرات الأخبار


بابا


..هذا المقال مقتبس عن رواية (الجامد الجبار في الحد من قنوات الأخبار) ..

بابا لهجته بتتغير معانا مع الوقت..!
.. ساعات بيكون فيها حسم وفرض رأي .. وشوية بتكون  مفاوضات نهايتها زي بدايتها لما نكون مختلفين على حاجة .,وساعات حرية رأي وتعبير واعمل اللي إنت عاوزه..وشوية بتبقى استيطان .,وأوقات بتتحول ضرب نار .,وممكن تقلب على الرياضة بضربات جزاء وتسلل وتخش جوون ..وكمان وثائقية ..,من أيام شبابه.. ويوم جوازه بأمي 
ويفتكرلنا أيامنا السودة يفكرنا بيها ..زي مثلن يقول : " زي النهاردة كان يوم ما نتيجة الثانوية العامة بانت وجبت مجموعك الإسود اللي دخلك النار..!"
وكمان يفكرني بيوم ما أكّلني حتة علقة على الغدا وقعت شعر راسي وأفقدتني الإحساس بطعم الأكل ...
وساعات نسمع منه " فين باقي الفلوس لما اشتريت كارت الشحن.,ولا هو حق مكتسب"  أنا مافهمتش ..! إيه علاقة كارت الشحن وفودافون بكلمة "حق مكتسب" اللي مابسمعهاش غير من المستعمرين  .. وإيه علاقة أبويا بالاستيطان ..لأ لأ أنا فاهم غلط أكيد .!
ساعات برده يقول "أنا هنا سيد القرار" .."كل فرد حر في اتخاذ قراره" .."إنت ليه كسرت المج بتاع أخوك ..انا أدين بشدة مافعلت" ..وآخر ما قال "الإبن الذي لايملك قوته ..لا يملك بسكوته".
أنا عارف إن كل الألفاظ الكبيرة دي مش منبعها البيت ..الحاجات دي من بره .. المشكلة :.لا يمل أبي مطلقن.. من قنوات الأخبار ..إنّ هذه الألفاظ هي اللتي تقال وحسب في نشرة الأخبار...وبرامج التحليل السياسي و التمجيد في حرب أكتوبر
 والتي حفظناهاعن بطن قلب رغم إننا إتولدنا بعديها
والغريب إنها دي آخر حاجة سجلوها للتاريخ المصري مع إن فيه حروب جت بعد كده كتيير لكن أهملها التاريخ وأهمل ذكر أهلها ..,زي مثلن  حرب أطاليا للقائد أحمد السقا .,وحرب طروادة بتاعت البطل المحنك والفتى المغوار براد بت ..,والغريب إنه يسمع البرنامج لحد أول دقيقتين ويصطاد بقه اللي قاعد جنبيه يحكيله باقي تاريخ الحرب وإننا كنا شجعان مافيش كده|..ومغاوير(جمع مغوار) آخر حاجة ,جيل عبدالحليم بقى والتنفس تحت الماء ..
وجمال عبدالناصر كان بطل ..لأ كان ليث ..وطبعاً حكايات الطيارات اللي كانت هتشتي علينا بس الطيران المصري كان بيستخبالهم ورا السحاب ويخرج عليهم فجأة تقولهم بخ ,تقوم تسقط بفعل (بخ) فيموتوا م الخضة ويعملوا ببيه عشان كده في وقت الحرب الناس بتستخبى من الببي جوا البيوت والسراديب
وكمان حكالي لما أسرنا منهم طيارتين بدون طيار لما جندي مصري باسل كان بيتمطّع فراحت وقعت الطيارات من خبطة دراعه, فقاموا فكوها وباعوها خرده 
الأجمد من كده إنه بعدما يخلص كلام ..أكتشف في الآخر إنه ما حضرش الحرب أساسن .. 
وإن كل الحاجات اللي حكالي عنها دي اقتبسها من أفلام العظيمة نادية الجندي ومن جيب الأستاذ محمود ياسين اللي الرصاصة لسه فيه ..أنا ساعتها بكون نفسي أهرب من قدامه إن شاالله حتى أخش الحمام .,أنا عاوز اتفرج على التليفزيون حرام كده
أموت وأعمل زي واحد صاحبي بيقولي إنه مفهم أبوه إنه ليه في التليفزيون نشرة تسعة ,وبعد كده يخش ينام ..ومعوده على كده من صغره 
طبعن بهزر صاحبي عمره مايعمل كده لإن مافيش داعي لكده ..أبوه أصلن مالوش في الحرب ولا نشرة الأخبار  هو بيتفرج بس على المصارعة النسائية.!
أرجو الآباء أن يرحموا عيالهم ويبتعدوا عن  نشرات الأخبار..
  الغريب إني بعد ما أبي يسمعني الحرب أوديو مع بعض المؤثرات الصوتية..تدخل أمي تقوله اسكت معرفتش ...مش الرز غلي ؟؟ والطماطم بقت باتناشر جنيه ..يقوم باصصلها جامد قوي .,وشاتم في الحكومة .. وفي حرب أكتوبر .,وفجأة تختفي الشجاعة والبسالة اللي كان بيحكيلي عليها في الحرب وتنطمس المروءة ويستحي الانتماء ,ويطفي التليفزيون ويسب ويلعن في البلد ويقوم ينام غضبان ..ويصحى على ميعاد النشرة الجاية كأن شيئاً لم يكن .
أنا اتضايق قوي من اللي يشتم في بلده بحجة إنها مش مدياه حاجة ..لإنه في الأصل مش مستعد يديها حاجة .. ,حتى لو غليت الطماطم ..إوعى تشتم في بلدك مهما حصل ..حتى لو الحكومة لغت الطماطم  ..إنت بكده تكون زي اللي بيرمي حيوانات نافقة في النيل ماتفرقش عنه حاجة..أو اللي بيحط ميّة نار في مواسير الحمام 
يقول الشاعر : كل إنسان عنده بلاد عليها يعيش ..إلا إحنا بلادنا مثل الروح فينا تعيش ...وأه ياااانا ... خبلااانة



أنا مش صيني

هل أنا صيني؟


يدخل عيّان العيادة ..فيسأل بفمٍ مملوء بالرزالة
.:دكتور ممكن تعملّي تركيبة فوق سنتي ؟؟
: طب مش إنت متابع مع دكتور ولا أول مرة تيجي هنا .؟
:أنا كنت مع دكتور عملي تركيبة بس وقعت ..فقالولي لازم يعملهالك دكتور صيني..
: أه .. واضح إنك واخد راحتك أوي .. بعد إذنك على جنب كده شويه
:يادكتور 
:نظرة حادة ..(إنت عيان غتت..
ربنا يقوّم عليك ضروس البشر كلها ..وتقوم عليك إنت لوحدك ..توجعهم وتتألملهم إنت ..يا ظالم
 دلوقتي أنا مش عارف أنا ف أنهي سكشن فلازم أنزل أسأل الدكتور ..بعد ماسألته فضل باصصلي وما ردش باصص عليا ومركز بتعجب ..أول مرة يشوف واحد من الفيرجن ده بيتكلم ..والآخر قالي هو إنت مصري؟؟


 تاني وأنا ماشي في الشارع يجي عيل صغير موقفني :عمو إنت صيني ؟
يعني بدل ما يسأل عن الساعة ,بقى شكلي شاغلة قوي كده..يعني أعمل إيه أفكك نفسي عشان يستريحوا ومالقيش حد يجمعني (لإن الصيني مالوش كتالوج..ولو ليه إبقة قابلني لو حد فهمه)

يكونش أبويا "يانج" وأنا مش عارف ,ولا أمي "مو تشو يوكا ها".. تكون ضحكت عليا وأنا مش ابنها و اشتروني عبد صيني ..لا لا استغفر الله العظيم طب ول نفترض إنه اشتراني , أنا أسمع عن عبد حبشي ..عبد مملوك .. لكن عمري ما سمعت عن عبد صيني ..
الغريب إني شايف نفسي عادي ..وعمر ما حد في البيت ما قالي إنت صيني .,يمكن خايفين على مشاعري ..! لا لا ,دول حتى شتموني بأسماء الإنس والجن وماسبوش حيوان إلا وندهوني بيه لكن عُمر ماحد جرحني وقالي إنت صيني..!
طب بلاش ,إحنا أهوه نعرف بعض من زماان ..من طريقة كلامي شكلي صيني ..! طب عشان خاطري..!
لا ..لابد من حل ..رُحت لأمي وسألتها هيا أكيد عندها معلومات عني وتعرف أكتر مني .. يا ماما يا ماما والنبي هو أنا صيني  ..! وليه عيني ديّقة ..!
:لا يا حبيبي بعد الشر عليك ..والله ولا حصل
تُدرك أمي جيدا معنى كلمة صيني ,فـ"صيني "تعني أنه لا قطع غيار .. ولا ضمان والمنتج كله واقف على حتة بلاستكة لو اتكسرت يبقى عليه العوض البضاعة بتبقى مصنوعة للتجربة فقط تيجي تستخدمها ماتلحقش .. ربنا يخليكي يا ماما
أنا مصدق أمي ..أنا عارف إنها بتحبني ومش هتخدعني ..أي نعم إحنا لينا اختلافات في وجهات النظر مش كتيير لأ, دي بالعبط ,لكنها أمي ..أيوة مش قادر أنسى عمْلتها يوم ما اتفرجت على قناة فتافيت وقمت بقه أطبّق اللي شفته وصِحيِّت هي من النوم لقيتني مطلع اللحمة اللي في الديب فريزر وبجرب .. وعلى كده كذا يوم ,جت هيا تعمل أكل الأسبوع بتفتح الديب لقاته خاوي على عروشه ..ومن غير ماتقولي ولا تعرفني إنها عرفت بفتح الديب الأسبوع اللي بعديه عشان أكمل المشوار لقيت الديب فريزر كله مليان أكياس عيش ..ولا كإن طابونة انفجرت جواه وأكياس لبن معرفش جت إمتى ومنين تكونش مربية جاموسة جوّه كإنها بتتحداني أنا وفتافيت ولسان حالها بيقولي :إبقى وريني فتافيت هتقولك تعمل إيه بالعيش واللبن.!
أو إنها تخش المطبخ تلاقيني فيه تقوم تتجن .. تقولي إني بتطرتش مية السنين .. وأنا أدخل ألاقيها حطالي الخس فوق طبق الرز على براد الشاي كل ده مثبت فوق كباية صغيرة على الحوض في حركة أكروبات منقطعة النظيير لا أدري ما الدافع بداخلها لفعل ذلك ..تقوم إنت تسحب خساية تلاقي كل الحاجات دي وقعت فجأة .. لكن رغم كل ده عمرها ما قالت عني صيني ..ولا إطلع بره إنت مش إبني  إنت صيني ..أبدا


الواحد بس خايف ليكون فيه حاجة في الأكل بتغيّر شكل البني آدم ..والصراحة الأكل كله بقى صيني ..الدليل على كده إن الواحد يآكل ويحس إنه ولا كل حاجة ..الجزراية تُقع من هنا ..خلاص تبوظ مانعرفش نستنفع بيها والسفندي الصيني بقه شبه البطاطا .. وبعدين لو الموضوع كده وإن كل أكل فيه حاجة تودي ناحية بلده اللي جيباه ,أنا أروح جري على أمريكانا ..أي نعم هي عربية مية في المية ..لكن برده الغالي تمنه فيه
الموضوع يضايق .. أصل مش معقول فجأة كدهه بقه شكلي صيني .. لا والناس تفنن بقه واحد يقولي لا لا إنت مش صيني إنت مدي على ماليزي أكتر .. وتالت يقولي لا يبني ماتصدقهمش إنت تشبه الأفغان ..آخر واحد لقيته بيبصلي ومركز قوي وقالي على فكرة أنا هسميك سويدي ..إنت شبه السوايدة تعرف عاصمة السويد إيه .. قولتله:لأ بس أنا رحت قناة السويد قبل كده
وبعدين ماهو أكيد لو أنا صيني  مش هفهم سؤالهم أصلا ..وكمان مش هعرف أجاوب ..

أنا مش عاوز أبقى صيني ... أصلي لو بقيت صيني مش هعرف أدخل الجيش ..ولا هترشح للإنتخابات  (هيحرموني منك يا مصر .. ياحبيبتي يا مصر يامصر

ومش بعيد مايرضوش يطلعولي بطاقة جديدة ..ويقولولي إثبت إنك مصري وإنت مش إنت ..لكن لأ.. أنا أعترض وبشدة وأطلب الأستاذ عبدالباسط حموده

عشان كل ده , قررت أكمل حياتي في جنوب شرق آسيا وأعيش هناك من غير ماحد يقولي إنت صيني .. لإن الطبيعي هناك إن الإنسان يكون صيني
الخوف ليقولولي بقه هناك : هو إنت مصري ؟
ساعتها بقه هقتلهم هناك ويبقوا يشوفوا بقه هيحسبوني بالقانون المصري ولا الصيني .

أسرع إمام في رمضان








رمضان كريم فعلن ..
    .. سبحان مِن صبّر اللي زييّ على الصيام .....رغم إني سبحان الله بكون في رمضان مصحصح عن الأيام العادية بالنهار ..
في الأيام العادية بكون زي عبدالسلام بلهارسيا (اللي ماشفهوش ولا سمع عنه يشوف الواد بتاع إعلان تي إي داتا ..بتاع أجمد مشروب طاقة) بالضبط وعيني مزغلله طول الوقت ,وبكون في المحاضرة مش شايف إتجاه الدكتور,وبنام تلت محاضرات السنة .. وطبعاً لذلك أكون من أصحاب البنج الأخير .. 
حتى أنا كنت بقول إن ده سببه إني ما بفطرش الصبح وعايش على النسكافيه (اسم المادة وليس ماركة) ..لا دا حتى في الأيام اللي كنت بفطر فيها كنت بروح هناك أبص للدكتور جاامد ..وأبرّق.. وأزووم.. وأنام ,برده
في رمضان بقه بركة الصيام أي نعم أنا بآجي على بعد العصر ومابعرفش أفرق بين ماما وبابا وبحس إني بدأت أنصهر وتتصاعد مني أبخرة ..وبحس باصفرار في الجو والناس بدأت تخبط في بعضيها ويقعوا.
لكن على الفطار وأول ما المغرب يأذن ...ماحدش بيحُشني عن الأكل ..حلالي ..ولو إيد واحد جت يَمتي ماأضمنلوش إنها ترجعله سليمه ..أو ترجعله أصلاً
بفضل أكبس في بطني وأربي سنام أمامي وأحط كل حاجة كان نفسي فيها وأنا صايم على الأكل ..ولا بد إني آكل من كل حاجة حاجة ..وبروح بقه أنا أصلي التراويح بكون مطجّن وباصص قدامي ومابلتفتش حواليا زي الإنسان الآلي ,من البطن اللي شايلها قدامي عاملة زي بطن بوحة .. بحس بكرشة نَفس ,وبيتجسد أمامي صورة ظلم الإنسان لنفسه.
 أثناء الصلاة بحس إني وهمّا ساجدين هصرخ فجأة بصوت واطي وأعوّص ..وأعيط وأعوي مثل الذئب أو الكلب اللي حد داس عليه والناس تبص عليا  ..ويبقى شكلي وِحش .,
وإحنا قبل الفجر في وقت السحر ..بعد السحور يامعلم ..بيكون المسجد ساكت مش عارف دا خشوع ولا من الأكل برده زيي ..والناس بتدعي وببص ماأشوفش حد بشوف ألوان وجلاليب بتتحرك بحس إني هقول حاجة غصب عني وبصوت عالي والناس هتبص عليا .. وبخاف أكتر لتطلع شتيمة ,فبحط إيدي على بقى وأتأكد إني قفله كويس وأدعي إن الراجل ينجز ويأذن بقه قبل ما أفضح نفسي
حاجة غريبة ..!
لأ دا الغريبة بجد في رمضان., المساجد المستعجلة اللي تحت البيوت دي .. كل واحد عنده بيت مش عاوز يدفعله ضرايب يعمل مسجد وبيكون تحت تصرفه ..هو اللي بينقي الإمام ..والمصليين ..ولو الإمام طوّل بينفـُُخه 
الإمام من خوفه بقى محترف قصار السوّر 
أنا بكون لسه بتوضأ عشان أنزل أصلي ألاقي المسجد اللي تحتينا جاب نص التراويح ..جزء عمّ ده إتحفظ من وراه خاصة جميع قراءات قل هو الله أحد..والفاتحة فـ التشهُد وإديله
أما بالنسبة للمصليين ,زي اللي ربنا مديله صحة في جسمه يقوم يطلعها على خلق الله من حواليه في الصف
الراجل يسجد يقوم يفرد دراعاته يآخد بيها نص الصف كإنه بيستعد للطيران ويخلي كوعه في عين اللي ساجد جنبيه ..,واللي يدهس برجليه يعيني رجلين الضعيف اللي وقف جنبيه.. ومُصِر إنه لازم يسد الفـُرج وإحتياطي يدوس على رجل اللي جنبيه ليسحبها فجأة ويفتح الفرجة, 
ومن ناحية القرف العلني بقه .. فمنه لله الإنسان المفتري اللي يعمل أكل على الفطار ببصل ..خاصة لو هياكله إنسان ظالم تاني مابيرحمش نفسه ولا اللي جنبيه في الصلاة من التجشؤ (يتقرع بسلامة مامته) 
بقمة في القرف ..قال يعني ده ما يفسدش الصلاة وينقضله وضوءه كمان.
ومن هذا المنطلق بتساءل ..ليه الإعلام مقصر في حق صلاة التراويح ..ليه ماشفناش مثلن إعلان عن (عايز تصلي التراويح..مكسّل ..نفسك تهبد الحداشر ركعة من غير ماتحس ..الحل عندنا..فقط مع مسجد الحاج أحمد,يابخت من صلّى وخفف) 
أو إعلان تاني (لصلاة التراويح بفاعلية وأمان ..في رمضان .. اتصل على 0900)
نرجع لموضوع الأكل أحسن
..,اللي مش فاهمه إن أول ما التراويح تقرب تخلص فجأة بحس إن كل اللي في بطني اُجهَض أو إتهضم ..
وجُعت فجأة ..وأنا لما بجوع بعيّط 
لا بجد ..أنا جعت قوي ..هو الشفع والوتر ما جاش ,الناس بتمشي من الصفوف القدمانية وأنا بتقدم 
ناحية الإمام وهو ماشاء الله شغال صلاة ..هو بيعِدّ ولا لأ.,أنا خايف يسجد ويقوم مايلاقيش طرف جلابيته ويلاقي حته منها ف بقي وبعدها أتف زراير ..وأتقرع
الحمدلله الوتر جه ..دا أنا استويت ..والدعاء ده جالي فرصة أدعي ربنا إنه يغفرلي ..الناس بدأت  تأمن ورا الإمام ويبكوا ..من الخشوع طبعاً ..وأنا كمان استغفرت ربنا وبدأت أبكي .. من الجوع طبعاً ..أنا ماعدتش قادر استحمل ,فين زنقة الرز في أحشائي زنقة ركاب الميكروباص  ..وحشتني المعلقة
.. ماتقلقيش يابطني أنا جاي ي ي.

واحد




-والنبي .. والنبي يادكتوووور تخلصني ورايا عيّل بيرضع  سيباه في البيت لوحده

أه ..إبتدينا ,أنا أصحى الصبح وأشد المئذر أكني رايح أحفر قناة السويس, حارم نفسي من لذات الحياة عشان آجي ألاقي كل واحده مستنيه عيّل ترضعه , تشوفني تقولي الكلمتين دول كإنها كلمة سرعشان أشتغلـّها ..
يارب إرحمني يارب كان حد قالها إني عضو جمعية تحسين الأسرة وتشجيع الرضاعة الطبيعية  مالوا لبن البودرة., بينفخ ويخلي الواحد شبه الجنط المنفوخ  ويبقى زي الفرخة البيضة اللي ما بتبضش .. تعرفوا لو باض أهو يكون حتى بيعمل حاجة مفيدة 
شكلي أنا اللي هبيض ..أرجوكوا رضعوا عيالكوا صناعي عشان أعرف اشتغل براحتي,
 -الله يكرمك ياستي إنتي إقعدي دلوقتي في الإستراحة لحد ما يجي دورك ومش إنتي اللي جاية متأخرة ..قبليكي ناس 
-يادكتور .. يادكتور 
إحشيلي ضرسي الله يكرمك  ظروفي صعبة ومابخرجش غير يوم الإتنين وحماتي ست مفتر...أه كملت 
 ..  كملها على خير يارب
....
-أيوة حضرتك خير بتشتكي من ايه
-بص يادكتور ضرسي حاسس إنه بياكلني
-يا ساتر يارب ..بياكلك إزاي.! افتح بقك بسرعة
-بس والنبي يادكتور تخلصني بسرعة 
لأ بأه دا أنا اللي شكلي هسيبكوا وأروّح ..ولا هقعدهم كلهم على نفس الكرسي  سوا واشتغلهم مع بعض كل واحد خطوة وبالدور زي اللي بيأكل عياله التوأم ..
كل واحد جاي وكإنه رايح للحلاق ..هيخبطوا موس ويمشي


بالمناسبة., لازم يعملوا كلية حلاقين.., ..وهو بيعمل إيه أقل من اللي بنعمله..أهو كله في الصحة .,وبعدين ما عندوا كرسي برضه بيترفع وبيحط فوطة .؟طب ما أنا بعمل كده ..وكمان لما بخلـّص للعيان( قصدي بخلّص عالعيان) بقوّمه وأنزل بيه الكرسي
(( ياما نفسي اشتغل لناس بتقدر .. ناس واعية وفاهمة ..ناس جاية تكشف على سنانها ,مش جاية عاوزة بُق جديد
نفسي أكشف على جون واليزابيث ..يارب يارب نفسي اطلع أمريكا اشتغل هناك مع عيانين نـُضاف..يعني اصطبح بديفد وماكس ولا برضا وبسيوني..! الحمدلله راضي.. يارب راضي)


          الكرسي ما بينزلش  ..الكرسي مابينزلش رفعت الكرسي بالعيان ودلوقتي مش راضي ينزل ..شكلي هتضرب .. أو هيستنى أما انزله وأضِّرب برده ..أنا هقوم أروّح

واحدة قعدالي فتحالي بقها براحه كإني هسرقه لو فتحِت أكتر شويه ,أو هقول عليها بلدي .. ماتخافيش ياستي أعرف ناس محترمة بُقها زي الكهف ويعدي قطر وبيفتحوه كإني داخل جواه
عادي خالص..فوالنبي ياحاجة أنا عارف إنك رقيقة وفاطرة جاتوه وبتحبي الإتيكيت إفتحي بقك بقه أكتر شوية ,دا لوأنا ما كنتش دخّلتك في دورك كنتي هتفتحيه وتحطيني جواه وتحبسي ورايا بمحلول جلوكوز وسرنجتين .. افتحي مش مستهلاكي كفاية اللي بتسربعني من ورايا ونفسها ترضّع.!

مش لو كنت بشتغل لجون دلوقتي كان زمانه حاطط برفان وجاي سنانه أحسن من سناني أصلا بس جاي لإنه قزقز بضعة حبات ٍ من اللب وجاي يعمل إتشك أب ,,وكفاية إنه مكنش هيكون بيرضّع.,

يلا أهو اللي قدامي ده إن شاء الله هخيطله بقه , نفسي يغور من الصبح بحاول أطفشه.. "-يا أستاذ هديك بنج واحتمال يوجعك تلات تيام لتلات سنين هي بس شكة بسيطة هتخليك تصاصي وإن شاء الله هتحس واحتمال تموت ..
-"هيعههههيع والله يادكتور انا استريحتلك ومأمنك على نفسي اعمل اللي انتي شايفه يادكتور .." منك لله أهو هو يقولي الكلمتين دول ودلوقتي يفتحلي بقه وينام كإنه حوت وفاتح بقه لحشرات البحر تنضفهوله وتآكل مابين السنان
نام يابعيد مش مسامحك ..قال بخوّفه بالبنج   دا شكله بيبلبع سرنجات ..,فين ياربي بس العيانين اللي بنشفهم في فيديوهات الشرح ..والله ما بعرف العيان من الدكتور ..إوعدنا يارب

-قولي ياحاج قبل ما أدي البنج ..بتشتكي من حاجة ولا بتآخد أدوية لحاجة
-لا يابيه ..الحمد لله كله تمام
-أكيد يا حاج؟
 -,إتوكل على الله يا دكتور..هو أنا بس بآخد أنسوليم
- أنسوليم ..! وماله يا حاج مش عيب , وإيه كمان؟
- لا لا مافيش أنا الحمدلله ,هو بس كل جمعة بعمل غسيل كِله بس لكن الصحة الحمدلله تمام 
-اه ..واضح يا حاج ربنا يزيدك
-خش يا بيه على بركة الله

وماله كإني هزق مقطورة .. بس هبلعها وهو أنا أقدر اتكلم مع ده دا شكله آكل واحد زيي  على الباب وهو داخل
كويس أصلا إنوا اقتنع بيا كطبيب وحياتك لطلعه على جتتك ..إن ما خرمتلك سنانك ووصلتهم كلهم ببعض من جوّه زي مترو الأنفاق ,جايلي تقولي إنك سليم وإنت نص أجهزة جسمك عايزة سوفت ويير ؟
فينك ياجون إنت وإليزابيث 
خلصت على ..أقصد خلصت للراجل سنانه وقولتله ألف سلامه عليك  لو حسيت بوجع خلال يومين ما تقلقش ولو الوجع زاد قوي وقومك من النوم إوعى تقلق بس قوم صلي ركعتين لله 
-بتقول احاجة يادكتور
-جت عالودان .. بقولك  اتصل بيا لو اتشليت., خلاص  
تسلم اديك يا دكتور الله ينور
قوم ربنا يزهقك زي ما زهقتني دا أنا كان المفروض اتخصص بيطري عشان اشتغل ف سنانك

وواحد تاني داخلّي مبوّذ وبوذه جايب آخر العيادة.. ومخلي الجو حار ,جاي يقرفني أكتر ما أنا فاتح القميص لحد تحت مابقيش إلا زرار..ماله ده.! واحد شعر صدره ماشاء الله منبثق وطارح ومفرّع ..يكون عنده مشاكل إيه ده في حياته تخليه يبوذ كده .!! ..,الله يرحم رمضان اللي فات ,قضيت التهجد كله والتراويح أدعي ربنا إن شعر صدري يطرح (زي أشباه القرود .. كان هدفي إني أشتغل شيفت في الجبلاية).. لكن الحمد لله ربنا ما بيخيبش رجا حد  الحمد لله طرح ربنا أعطاني ..وزيادة (دقني برده أبدت بوادر خير وبدأت تندّع وبقيت أشبه الرجالة في حاجات كتيير ,,, يلا  
دخل الأخ ساكت صامت زي الموبايل اللي مابيرنش أول ما أقرب منه يفتح بقه ..أبعد يقفل ,سبحان الله  أحب أنا الناس دي ..في حالها.., ربنا حاميها من داء الرزالة وبرود الحلاقين 

أخيرا ,آخر حالة.. واد رزل رزالة القرود قاعد يتنطط ويرش ميّه في بقه ..وبجح بجاحة القطط مابيخفش., أطلعله الحقنة اللي شبه حقن البهايم والواد يضحك وعاوز يمسكها ..جايبينه منين ده وأمه تضحكله وتقولي دا بيعرف يغني ..غني ياسمسم للدكتور يلا غني شااطر شاطر ...لا لا ياستي أنا مصدقك ..لا والله لازم تسمع منه ياخويا ..ياخويا وماله ..اتنين شاي بالمرة ..وماله غني يا حبيبي عاوز أخلص  "... قالوا مجنون اللي يفكر ..الدنيا فيها أكتر ..دول فين وإزاي ومنيين .. !!
الله يهبلك دا أنا وقعت ..بتغنيلي إعلان .. هيه شاطر يا حبيبي الله صوتك حلو  خلاص نشتغل بقه.!؟.. الواد تنح وقال أنا لسه مخلصتش .. قالوا مجنون اللي يخلي ..الدقيقة بتسعتاشر ,بدل تسعة وتلاتين..
خلاص ياحبيبي بقه لرصيدي يخلص ..عاوزين نشتغل بقه والله لأنفخك لحد ماتطرشق عشان تغور وأبقى عيّل لو اشتغلت لعيّل تاني.. العيب مش عليك العيب على أمك العاقلة إنها خلفتك ..قال وبتسقفله وهو بيغني ..روح إليهي تفرقعوا سوا 

إـّنا نسخرُ مـنْ الهم ّ
تحظر المدونة على الإخوات الكبار
يكتبها مراهق,
(هذه المدونة)
♣ لكل إنسان جعل من غمه ضحكة يضحكها الناس..فحبب إليهم فضفضته
♣ وإلى من سخـِر من همه, فهانت مشاكله .. وأصبحت ذاتها حل وراحة لمشاكل الناس
♣ لكل أب سمع ابنه وصدقه وكتم سره وطبطب على كتفه وضمّه
♣ لكل من له شعر صدر ..
♣ إلى الصينيين والأفغان وكل من في آسيا ..لقد نسبت إليكم أكثر مما أنسب لبلدي
♣ لكل مراهق
♣ هدية لكل أخ صغير ..أتى للدنيا كرد فعل لزينة الحياة الدنيا ,بعد ما شبع الأب من الخلفة بإبنه الكبير ..الظالم,فاعتبر الأب ابنه الصغير قضاء وقدر

.

.