b

أبي : يابني .., فيه حد بيفطر على كبده ..! .,الناس بتفطر على تمر ومية .,إنت حتهبلني يابني..!
أنا : (فم منتفخ .,وسكوت تام).
أبي : اللهم إني صائم .,(بحنق) .,صبرني يارب ..يارب ترحمني بقه .. يارب ..يارب .,
أنا : إيه يا با ..(مالحقتش أكمـّل)
أبي : بس ..بس ..قلنا ما تتكلمش والأكل في بقك ..إبلع ..إبلع .

:::::::


.,قبل الفجر بربع ساعة .,أمي بتصحيني أسحــّر .,فسؤال بديهي تلقائي مني : هي الساعة كام يا ماما .؟؟

أمي: قوم يلا يا حبيبي ,فاضل ربع ساعة على الفجر .,

أنا : طب وإيه اللي زنقنا على كده يا ماما.,ماهو الليل طويل .,
أمي : معلش يا حبيبي ما هي وقفة التروايح بتتعب .,والشيخ مابيزنقناش غير في الركعتين إللي بعد خطبة الاستراحة عشان ما يبقاش فيه مفر ..ومانمشيش و...
أنا : طب خلاص يا ماما .,إنت عاوزه إيه دلوقتي .؟؟
أمي : لا يا حبيبي ..عوزت الكفن ..قوم ياله إتسحر من سكات .. ولو مش حتطفح نام ..من سكات ,
أنا : طب وأنا حلحق أعمل إيه في العشر دقايق دول ., دا أنا على ما أخلص الجملة اللي بقولها دي يكون خمس دقايق عدوا..!!؟
أمي : خلاص يا حبيبي ,نقضيها تمر بقه النهاردة ., عشان الوقت
أنا : تمر .. دا أنا أكلك .,ليه هو أنا عندي سنام في ضهري بيصبرني بالنهار ..,أنا حاكل وماليش دعوة ..بصي إقفلي الشباك عشان ما نسمعش الأذان ..وعللى التليفزيون على الآخر ...وسيبيني آكل بقه ..حرام عليكوا

وعلى أمي ما راحت تعمل السحور .,كان لازم أختصر الوقت وأكيد المية مش محتاجة توضيب ..قلت أشرب لحد ما الأكل يجهز .,وحتى عشان كل حاجة تنزل من مكانها وبإنتظام .,, لا لا أنا في النظام ما أعرفش بطني من ظهري .

الحمد لله المائدة تم تجهيزها بالماء الساقع والماء الفاتر وماء الحنفية والعيش الأبيض والعيش الفينو والعيش التوست ..و الملح .,
بس وطبق واحد فول تدب وتهرول نحوه عشرة أيادي كاملة الأصابع (عشرة في عشرة ... يبقوا) وطبق جبن من هول المنظر قد تحول للون الأرمادي ...

كلنا (في نفس واحد) : ماما ... بابا ... إيه ده ..إيه ده ...!
أمي ,وأبويا : بس بس ..إخرس يا حيوان منك له .. هو ده النظام , رمضان عبادة وإعتكاف.,مش أكل وإعتلاف .,ثلث لطعامك وثلث لشرابك وثلث لنفسك
أنا: بس ...!
أمي: هوس ..


لأ .. لأ بجد .. كده حرام ( في سري طبعا ..
أنا: الحمد لله
هم : رايح فين
أنا :شبعت ..شميت الأكل وكأني كلته .. سبحان الله ..رمضاان بقه يا جماعة ..
هو كمية الاكل دي مش محتاجة تتشم عشان تخلص .,كفاية نبصلها حتكش وتتكسف ..

وياعيني دخلت أوضتي(غرفتي يعني .. ويعيني طلعت من التلاجة حلة المحشي يعيني بتاعت الغدا السابق ..ويعيني أكلتها ..يعيني كلها وقسـّمتها نص لطعامي ونص لشرابي يعيني.... والنص التالت خليته لنفسي . .. وبعدين النهار لسه طويل وكلها ست ساعات والاكل حيخلص من بطني ومش حعرف آكل ولا أشرب وحيبقى 100% لنفسي .. وبعدين أنا حنام ,فمش ححس إذا كنت عايش ولا ميت أومخنوق أو منشرح أوعاوز أتنفس ولا لأ ..
عديها على خير يا رب .,بطني بقت عاملة زي إنتفاخ التواليت ..ومتحجرة من اللي فيها ., هوأنا أكلت إيه بس ..دا انا حتى مقــنــّع جدن ..,ولا فيه زييّ في الزهد وكبح شهوة الطعام ..يعيني ..!,فجأة
آذاان الفجر .,ماما : أشرب ..أشرب
أمي : يابني ما ينفعش .,
أنا : أشرب ..أشرب .,
أمي : ياحبيبي خلاص .,
أنا : حرام عليكي ..حعمل نفسي مش واخد بالي ..هاتي
وما رضيتش أمي تديني أشرب .,الله يسامحها .. دا يا بخت من روا عطشان ..ورب أخ لك ولدته أمك (اللي مارديتش تديك تشرب ., فأخذ أخي (اللي ولدته أمي ) وبسرعة فتح الزجاجة المائية .. وأعطاني ....الغطاء .,وسكبها بداخل بطنه التي تشبه شمسية البحر ... بس من غير بحر ., ولكني قد قررت بعد ذلك بأن أضبط صحوري على الفضائية المغربية ..وفطاري على (الشارقة ... أنا بحب الوحدة العربية ...نداء الشعوب .. وأمل البتاع ... لبيك يانداء العروبة (في رمضاان بس)...ويا أمل البتاع ...!

نزلت أصللي الفجر .. لقيت حاجة غريبة .. الناس كلها حاطة إيديها اليمين على الشمال وفووووق خالص على صدرها ...أو تحت خاااالص .. بعيد عن فم المعدة ., وسطح البطن المنتفخ.. وكل اللي واقف في الصف يشبه
حرف ال بي سمول b )
, وكأن كل منهم قد
ابتلع تلاجتة الشخصية
بصللي جنب واحد شخص,راح سجد وما قمش .,بقه جاي على الفجر ..أبوركعتين ..وتنام ... ورحت ركلته برجللي ,قوم ياعم دا حتى إبليس مأجز ,ربنا هداه وقام وسمعته بيقرا في الركعة التانية حاجة غريبة كده .. هي مش قرآن .,هي أكيد يا مطلع أغنية ..يا شتيمة ..!! رحت زاغده في جنبه بكوعي جبتله زغطة ..فضل طول الصلاة هأ ..هأ .,وأنا خلاص ..عاوز أضحك ..وعزة بطني منعناني .. مش قادر من اللي في بطني .
ولما جيت سجدت حضرتي .. ضيقوا الصفوف عشان تكفي .. وأنا ساجد راح واحد مستعجل وقام قبلينا مع الإمام وكنت انا وراه راح داسني ..لا لا هو مش داسني ..,هو دهسني برجليه على دمااغي ..طلعلي علامة صلاة إسطوانية الشكل وبزجزاج .. بنفس تطريز السجاد .,

أخ تالت بقه جايب إبنه معاه يصليي ..والواد شكله في التلالا خالص ..كل ما أبوه يسجد يقوم الواد يجري يركب على ضهر أبوه .. ولما أبوه يقوم من السجود .,طبيعي الواد يتزحلق (كان نفسي يكون أبويا بيصللي معانا .,,وطبعا الواد بيتزحلق من على ضهر أبوه تبعا لقانون التفاحة اللي وقعت من على شجرة نيوتن في قانونه الاول : أه يا ليل يا قمر والتفاح طاب ..وسقط .. من على الشجر ... فأنصحكم بأن تحذو حذو نيوتن وأن تجلسوا تحت الشجر في الضل .. وتآكلوا تفاح ..المهم جه لما الإمام يدعي ..الراجل خشع أوي (الراجل أبو ظهر ,وأبو الواد المتزحلق.. وبكى في الدعاء
الواد :بابا ,إنت بتعيط ليه ؟؟
أبوه : مابيردش ماهو بيصللي ..!
الواد :بابا ,إنت بتعيط ليه ؟؟
أبوه : مابيردش ماهو بيصللي ..!
الواد لما زهق .,راح مزعق بصوت عالي (يا ولاد العيوطة .. بتعيطوا وإنتوا كبار .. ياولاد العيوطة .,
وأنا خلاص ..مش قادر أمسك نفسي .. بس حاشني اللي في بطني ,أنا عمري ما صليت الفجر بالطريقة دي ...

بس والله والله ..قعدتكم ما يتشبع منها ..(شهقة )..القاعدة دي بتفكرني بنفسي وأنا واقف قدام المراية .. الله يرحمه ..ماكنتش مخليني عاوزه حاجة ,
وأحلى حاجة فرحتلها في رمضاان ..إن قناة موجة كوميدي ..بقه بيجيلها إعلانات ..القناة دي كانت بتصعب عليا جدن ..وبتفكرني بنفسي وأنا مضطهد وما حدش راضي يعلن عليها ..غير زيرو تسعمية اللي مكسبها ما يشحنش موبايل ... وكنت بتفرج عليا بغصب عني كنوع من المؤازرة .. والتعاطف وأروح أنام وأسيب التليفزيون مفتوح عليها ..يمكن شركة الكهرباء تاخد مني وتديها ..!!.. لكن على رأي المثل : ماشربتش من نيلها .,!!
بس مأثر فيا .. إني ولا مرة ..ولا مرة ..
يجي على باللي إن أنسى وأفطر سهوا بالنهار.. مع إني بحب أفطر بالرز .. بس الله يرحم بقه أيام زماان .. أيام ما كان الواحد هناك .. قبل ما يجي هنا .. ويعاني من تساقط لشعر .., كان رمضاان ده الواحد بيقضيه كله نسيان .. وسهوا ,’ والله ما كان بيبقى في نفسي حاجة .. وما أفتكرش إني صايم غير بعد أذان المغرب .. فييييــن ..فين ..ولما حد يزعقله ويقله يا بني بتفطر ليه والدنيا نهاار ., يرد ببجاحة القطة ( إيه ..أنا ناسي ..,


وقبل ما أنسى بس أحب أذكركم بصيام 13 و 14 و 15 من الشهر الحالي ..

نصيحة أخرى ( لو منكم ما أقراش البوست ..







13 اللي يتكسف من مدونة صاحبه مايكتبش فيها تعليق:

ستيتة said...

تنصحنا منقرأش البوست
هلباط والوز مين العبيط ده اللي يضحي بكوميديا الموقف بتاعتك اللي بتوقف قلبي من كتر الضحك
حاضر ها نصوم التلاتة البيض الشهر ده
ممكن ألوان تانية؟

Pink Dreams said...

ههههههههههههههههههه

بجد دماغك عاليه قوى

يعنى هتفطر وتعمل نفسك ناسى

وكمان المواقف اللى قلتها فى المسجد دى فى حاجات منها فعلا بتحصل

ربنا يهدى

بس بجد البوست تحفه

وخصوصا وانت بتتسحر محشى

حد يتسحر محشى يا مفترى

هههههههههههه

عاشقه الرومانسيه said...

زعلان علشان الاكل مش كفايا
ورايح تاكل حلة محشى لوحدك؟
والله انت دماااغ
وكنت اخدت بابا معاك الصلاه
علشان كان موتك وخلص منك بالمره
مش عارفه ليه بحس انهم كارهينك
(:
انت بينك وبينهم تار؟
بس كويس انك فكرتنى بصيام ال3 ايام دول ده انا كنت ناسيه
(:

كل سنه وانت واسرتك بخير
وسلام مخصوص لماما

زهور الامل said...

ههههههههههههههههههههههه
يخرب عقلك
انت يابني المفروض تروح تمثل افلام كوميدي
انا مش قادرة ابطل ضحك من كلامك
بنت عمي عندها سنتين قاعدة جمبي وانا بضحك اتخضت من شكلي وجالها ازبهلال

دمك سكر والله

كل عام وانت طيب ورمضان كريم

-_- said...

هههههههههههه

مقالة جامدة جدا

Anonymous said...

يخرب عقلك

ههههههههههههههههههههههه

هتقفل الشباك علشان متسمعش الاذان

هههههههههههههههههههههههه

هعمل مش واخد بالى

جامده موووووووووووووووووووووت

تسلم ايدك

حنين

Anonymous said...

http://www.ekayf.com/webdesign.html

صمم موقعك

Jarat said...

عن جد اول مره بفوت على البلوج تبعك بس عن جد كتير مهضوم :)

بتمنى تتقبل مروري

ميرام said...

ههههههههههه
حلو بجد
(:
هكمل قراية بقية البوستات
تحيــاتي
ورمضان كريم

حروف said...

ياولاد العيوطة بتعيطوا لية وانتوا كبار ههههههههههه
ضحكتني جامد بجد هو انت بتفضل تاكل لغاية ادان الفجر طب انت مش بتسمع ادان الامساك؟؟؟؟؟؟؟؟؟؟؟؟
ولا قافلين الشباك

Maryama Qandil said...

اهلا وسهلا
ههههههههههههه
بجد مواقف جاامدة
حلوو اووي الولد لي بيتزحلق على ظهر والده,,, وهو اصلاً مش مستحمل من التلاجة بقى
والفضيحة الي اعلنها انت بتعيط ليه


وحالات التناسي للصيام والتجااهل للاذان
بجد عقل تحفة

ادام الله عليك نعمته
وشكراً على التذكرة الكريمة دي
وجااي على نفسك ليه
كونت تفكرنا بدري عشان مننساش
:D

رمضاان كريم

اقصوصه said...

loooooooooool

حلوه وايد :)

فتوح أبو المفاتيح said...

اسلوب حكايتك جامد
احلى حاجة موقف و الواد
يا ولاد العيوطة
:)
جامد اخر حاجة

إـّنا نسخرُ مـنْ الهم ّ
تحظر المدونة على الإخوات الكبار
يكتبها مراهق,
(هذه المدونة)
♣ لكل إنسان جعل من غمه ضحكة يضحكها الناس..فحبب إليهم فضفضته
♣ وإلى من سخـِر من همه, فهانت مشاكله .. وأصبحت ذاتها حل وراحة لمشاكل الناس
♣ لكل أب سمع ابنه وصدقه وكتم سره وطبطب على كتفه وضمّه
♣ لكل من له شعر صدر ..
♣ إلى الصينيين والأفغان وكل من في آسيا ..لقد نسبت إليكم أكثر مما أنسب لبلدي
♣ لكل مراهق
♣ هدية لكل أخ صغير ..أتى للدنيا كرد فعل لزينة الحياة الدنيا ,بعد ما شبع الأب من الخلفة بإبنه الكبير ..الظالم,فاعتبر الأب ابنه الصغير قضاء وقدر

.

.