يوم الامتحان






يومُ الامتحان .. يُوَزع المرءُ علي اللجان





أزفت الآزفة وقد أتي موعد الإمتحان ..
أنا ماشي.
ذهبت لأمي لأستأذنها أن أمضي ذاهبا وأرجوها أن تهطل عليا بدعائها.,
ماما ..ماما

وجدتها تفترس الحائط بعصاه بلاستيك ., أووه تاني ,لقد دخلت في عراكها الدامي مع الدبان .. طالما حدثتها ناصحا
أنا: ياماما سيبي الدبانة ف حالها ,حرام عليكي


ماما: عشان تحرم تدخل هنا تاني ;بعدوانية;

أنا: هي تحرم إزاي وهي هتموت دلوقتي, وبعدين ما الشباك مفتوح ,غيرها هيدخل

ماما: ما هو عشان غيرها ما لما يشوفوها بيتعمل فيها كده يخافوا يدخلوا هنا (;تخبط دبانة تجيب أجلها وهي بتقول كلمة هنا;)

أنا: ماما.. دا دبان ..مابيفهمش

ماما: أمال أنا هنا ليه .. أنا هفهمه . نياهاهاهاها

التفتُ لأجد أبي هو الآخر يعذب باقي حوائط البيت..الطف يارب ,هو اللي بيعملوه ده مؤازرة لتوتري في الامتحان ,ولا نوع من الطقوس لطرد الأرواح الشريرة..ولا حاجة تانية بعد الشر
أدركت بعد ذلك أن أبي وأمي يتسابقان علي سفك دماء الدبان.
...
وأنا نازل من الباب سمعت أمي تقول لأبي" 16 "فرد عليها"19 وكسرت لواحدة جناح"
..وأخذ يرقص فرحا رقصات الراب ..بينما مالت أمي نادمة طارقة بقبضتيها علي الحائط قائلة بهمس (فعلها الوغد ثانية);.


أنا ماشي رايح الإمتحان وحاسس إن أول واحد هيكلمني هرجع في وشه, أنا أصلن مش عارف أدخل الميكروباص .. مش لاقي باب الميكروباص  أمال اللي قاعدين جوه دول دخلوا إزاي..

بدأت أتوغوش .. 
إدعولي-عشان خاطري- إني أحل كويس,
ياسلام لو قفلت النظري,تعرفوا أنا لو قفلت النظري ممكن ممكن من فرحتي أسقط شفوي
يووه إرحمني يارب ف الدنيا الغير متكاملة دي
مش ناسي كلامي إمبارح بالليل معاهم ف البيت .. وكل واحد عليه ليا شتيمة يقولها ..حتي ما صعبش عليهم شكلي وأنا متوغوش..

 
أخي بيك الكبير : إبقي سطر الورقة اللي هتجاوب فيها سؤال الدكتورة دي وإبدأ بسؤالها الأول عشان تكسبها

أنا:أه وأستفز الدكتور بتاع السؤال الأول .. خليك ف حالك

ولا أمي هي كمان
أمي :إسمع كلام أخوك الكبير.

أنا: لا أنا مابحبش أسمع كلام الإخوات الكبار ,ومش مجاوب السؤال الأول

وأنا إن شاء الله لما أكبر مش هخلف عيال كبار,هخلفهم كلهم صغيرين ومش هخلي حد فيهم يكبر عن إخواته ..بكره الإخوات الكبار بكرهم بكرهم

مش عارف أنا كنت ف إيه ولا فإيه,بس حقيقي كلام الإخوات الكبار بيزود قابليتي للترجيع ,والأغرب التصديق الفوري من الأبهات علي كلامهم ,

 بس خلاص جبت أخري ووصلت مع التعليم لمزنق واللي مكرهني فيه أكتر إن أخويا الكبير اللي كان متابعني في مذاكرة الثانوية الله لا يعيدها أيام ,ومش ناسي لما قلتلهم
إني بفكر ءأجل مادة للدور التاني قالولي:

أنا: ماما .. بابا .. أنا هأجل المادة الجاية .,خلاص أنا جالي تشبّع ومش قادر أذاكر ..معدش فيه مكان أحط فيه معلومات.
ماما وبابا ف نفس واحد : إيه .! ليه ياخويا كفى الله الشر  مالكش نفس ليه هو احنا بنقولك قوم كُل .!
أنا: لا ولا حاجة أنا رايح أذاكر أهوه ..يااه نفسي اتفتحت
أمي :أصلك إنت اللي بتهزر ومش حاسس بالمسئولية, نقولك ذاكر بالنهار تقولنا; "حد يذاكر ف الحر ده,دي المعلومة تسيح  أنا هذاكر بالليل
 نقولك ذاكر بالليل تقولنا :حد يسيب الجو التحفة ده ويذاكر برده,أنا هذاكر بالنهار عشان يبقي الغم كله ف نفس الوقت حر ومذاكرة"

أقسم بالله لو ما إتعدلت ,أجيب سيخ وأسخنه لما يحمر,وأدخله في ودانك وأطلعه من الناحية التانية.!
أنا: إيه ده ,مش دي اللي كنتي بتخوفيني بيها وأنا صغير.!

رَدوا عليا كإني بكلـّم الست بتاعت شئون الطلبة
حتي أمي بقت مش عارفة تفرق بيني وأنا صغير وأنا وأنا كبير .مفكراني هخاف من السيخ المحمي.,وحتى هو يعني بالله عليكوا حد يجيلوا نفس يذاكر ف الحر  ده .. دا الواحد بيكسل يآكل
بس في الآخر الواحد بيعدي بدعا أمي .. لكن إن كان علي المذاكرة فاللي بذاكره ده ما يرضيش مرات البواب .

أنا: ماما ..إدعيلي أنا خايف قوي لأدخل لرئيسة القسم ..ست شرانية و..
أمي :مقاطعة:  إسم أمها إيه ؟؟
أنا: أمها ! , مش عارف ماكنش علينا في المنهج
أمي: ممم .لغوه من عليكوا السنادي طيب سيب الموضوع دا عليا

أنا: ناوية على إيه يا ماما ؟؟ دي عندها عيال
أمي: إعمل إنت اللي عليك وإتنيل ذاكر وأنا هظرفهالك دعوتين ينسوها المنهج ..بس 

طالما أمي هتدعي يبقى كده بقه أنا بره اللعبة يامعلم ,والصراحة أنا بدأت أقلق عالدكتورة وبفكر أدعيلها .. جالها الأقوي منها .. الله يرحمها بقه هي اللي جابته لنفسها 

أنا أول ما دخلت اللجنة إفتكرت حضن أبويا وعوزت أعيط .. العيال واقفة كأنما يساقون إلي الموت وهم ينظرون .. أول ماشفت الدكتور وبطنه اللي ماشية قدامه ..عوزت أروح أحضنه وأعيط .. أنا تاني مرة أحس إني كلب ..أول مرة مش فاكرها
أنا قلت أول ما أمسك ورقة الإجابة هعمل ببي .. أو لو كان الإمتحان سهل هعمل زي الست اللي في فيلم اللمبي في فصل محو الأمية,بتاعت أمك دي ياله في إسماعيلية
رايح جاي ..

أزاكنش يمتحنوني في الأفلام ..ويجيلي سؤال : إكتب من ذاكرتك عن فيلم مات فيه البطل غرقا في النيل وعند نزول التتر قفز خارجا من المياه قائلا : عليا الطلاق إنت إتخضيت..
يااه كل ده فكرت فيه وأنا ف حضن الدكتور ,أقصد وأنا بحلم إني أحضنه .. يارب بقى يمشي من قدامي أنا جالي توتر
إرحمني يارب .. عدا نص الوقت ,بقيلي السؤال اللي في النص.. أذا كان يترجموه عربي .. والله الكلمة دي شفتها قبل كده بس مش فاكر فين
(جنب المدرج .. الإمتحان الشفوي هيكون بعد الإمتحان النظري في مكاتب القسم جنب المدرج .. )

قالها رئيس القسم وهو داخل يشمت في اللي ما حضرش المحاضرات ..
..
 لو سمحت ..عاوز أسلم الورقة ..( نظرات صمت من الطلبة حولي تجاهي 
,
دخل أصحابي واحد ورا التاني في الشفوي ..كل أما واحد يدخل نوصي الباقي ,إدعوا لأخوكم فلان .. إنه الآن يُسأل 

الواد بعد ما يطلع من عند الدكتور تجري الجموع عليه .. كرسي يا جماعة ولمون بسرعة .. ها سأل ف إيه ؟؟
الواد : أنا مش فاكر اجة خالص .. كل اللي فاكره
إحنا: ها
الواد : إنه رسم حاجة مدورة في الآخر !!
إحنا: يسقط العشرات مغمن عليهم ..ويصفق الجمهور

دخلت للدكتور في الشفوي لقيته هيسألني من نفس ورقة أسئلة الإمتحان,هو مفكر إنه كده بيساعدني .! بقي معقولة معقولة يا ناس حد يسقط في الإمتحان مرتين ف نفس اليوم شفوي و نظري .. خلاص خلصت أسئلة المنهج بيسألني من ورقة الإمتحان هو انا كنت عارف أقراها..منه لله  


أه .. الموبايل بيزغزغني .. أكيد أمي بتتصل تطمن
أنا: سلام عليكم  ياماما معلش إنتي كنتي بتتصلي وأنا مع الدكتور كنت عمله فايبريشن
أمي: أيوة يابني عملت إيه ف الشفوي
أنا: الحمدلله, الإمتحان كان صعب جدن وكل العيال طلعين من عند الدكتورة بيعيطوا ..
أمي: طب و دخلت للدكتورة دي ليه ياعم القسورة !
 ثم طخن صوت أمي فجأة ..أه إنه أبي يأخذ منها السماعة': حد فيكوا إتعور ؟؟
 
أنا: خدي منه السماعة ياماما , ماتقلقيش أنا بعون الله دخلت للدكتورة وطلعت هي معيطة .,

مش أنا ..مش أنا يا تعليم اللي يهزني إمتحان
وبمناسبة المناسبة السعيدة دي سمعني : فات الميعاد ياندم ياندم ياندم .

طمأنت أمي أني إن شاء الله من المحتمل أنجح ,ولاعشم في أكثر من ذلك 

بابا: يابني أنا بس كنت عاوزك تجيب تقدير عالي السنادي ,مرة من نفسي .
أنا: (يا ماما قلتلك خدي منه السماعة) , يا بابا بليز إنت عارف إني بدوخ من التقديرات العالية
بابا: وما بتدوخش ليه من الدور التاني .. دور تسعة يا فاشل
أنا: التاني لأ أدوخ من التاني ليه أذا كان إحنا ساكنين في التاسع وعايشين أهوه مش دايخين ولاحاجة.

(وكما تعلمون إخواني أنه كلما إرتفعنا عن سطح البحر يقل الأكسجين ;وبالتالي يقل التقدير; ويدوخ الإنسان ,رغم أن دوخته تكون أكثر ف الدور التاني..اللي هو سبتمبر,ذلك أن الدور التاني يعلو دور مايو بدرجات شاهقة .. علي أقل تقدير .


ورحم الله زمانا كنت فيه إنسان وكان الناس ينهمرون عليّ ببرافوا وإكسلنت.. إنها سُنة الحياة والتفوق كمثل الخيارة يوم في اليد وعشرة على الشجرة
وسلاما لنظام تعليم تحولت فيه الخبرة لقدرة على التخزين
والتفريغ عند الحاجة.

ألقاكم يوم الزينة (النتيجة

5 اللي يتكسف من مدونة صاحبه مايكتبش فيها تعليق:

safa7_karmooz said...

والعلم نور والنور من الكهرباء والكهرباء سعرها حراق فلا داعى للتعلم :D

nigro said...

و ربنا يا معلم أنا أول ما مدونتك تفتح عندي بألاقيني ضارب الوش المبتسم قبل حتى ما اقرأ بنت كلمة من شخبطاتك

يا ترى هاعيش يا دكتور ولا انا كده كويس ؟؟

sony2000 said...

بص ياابني
انا لسا مخلصه من كام يوم الامتحانات
فأنا وفي هذا الموأف بقولك
ربنا معاااااااااااااااااااااااااااااااااااااااااااااااك:))

كــركــبــة دمـــاغ ㋡ said...

هههههههههههههههههههههههههههههههههههه
هههههههههههههههههههههههههههههههههههه
هههههههههههههههههههههههههههههههههههه
هههههههههههههههههههههههههههههههههههه

والله العظيم ما بلاقيش كلام اقوله هنا غير الضحك


والله والدتك ووالدك دول عسل جداااااااااااااااااا ربنا يخليهوووملك يارب

كلامكم سوا ولا كانكم اب وام وابن ههههههههههههههه

ربنا ينجحك وتخلص على خير وانت بعقلك


اسبوع تحدي الاعاااااااقه ده خطييييير

هههههههههههههههههههههههههههههههههه

انت بتجيب الكلام ده ازاي .. وبتكتبه منين

ههههههههههههههههههههه انا عماله اضحك وخلاص بجد عملتلي دماااااااااااغ اخر حاجه

اما اروح اذاكر الامتحان اللي عندي بقى

ربنا يسعدك يارب زي ما بتضحكني كده

اه صحيح .. انا عايزه انزل " بلاش تولديني " بس مش عارفه اجيبها منييييييييين

ما تعرفشي انت طريقه اجيبها بيها ؟؟

و
شاكرين تعاونكم ^_^

كــركــبــة دمـــاغ ㋡ said...

احم احم ،، جيت تاني

هو انا ممكن اتحدف باللي في ايدك عشان اللي هقوله دلوقت

بص

بصراحه دخلت اللينك اللي سبته
لقيتها اشتغلت

اشطه

قعدت ادوس الكلمه الانجليزي " دوانلود " اللي بالاخضر اللي معناها تحميل يعني بالعربي

طلعلي حاجه تتحمل بش مش عرفه هيا ايه !!

بس هيا مش بلاش تولديني

هو برنامج اظن

اما حملتها اسمها كده eSnipsDownloader

ولازم اثبته ع الجهاز او كده

بس انا مش فهمت حاجه

لانه كله بالانجليزي

وانا بعيد عنك فاااااااااشله في الانجليزي وبتووووه في الحاجات اللي زي دي

ياترى هو ايه البتاع ده

اثبته يعني وهلاقيها فين طيب بعد كده بلاش تولديني !!!

هو انا كل اسئلتي غبيه

بس انا طمعانه في كرم اخلاقك

:-$

وعايزة اعرف التحميل منين بالضبط لانه مفيش الا داونلود واحده

وانا تايهه مش عارفه اعمل ايه وبقالي يومين بدخل اسمعها في اللينك ده وخلاص

معلث هنتعبك معانا

وبوظت صفحه التعليقات والدنيا اخر كركبه هنا
:-$
وشاكرين تعاونكم تاني :-$


وشكراً بعنف لانك جبت اللينك وعملت اللي عليك بس البشريه فيها ناس اغبياء زيي كده

إـّنا نسخرُ مـنْ الهم ّ
تحظر المدونة على الإخوات الكبار
يكتبها مراهق,
(هذه المدونة)
♣ لكل إنسان جعل من غمه ضحكة يضحكها الناس..فحبب إليهم فضفضته
♣ وإلى من سخـِر من همه, فهانت مشاكله .. وأصبحت ذاتها حل وراحة لمشاكل الناس
♣ لكل أب سمع ابنه وصدقه وكتم سره وطبطب على كتفه وضمّه
♣ لكل من له شعر صدر ..
♣ إلى الصينيين والأفغان وكل من في آسيا ..لقد نسبت إليكم أكثر مما أنسب لبلدي
♣ لكل مراهق
♣ هدية لكل أخ صغير ..أتى للدنيا كرد فعل لزينة الحياة الدنيا ,بعد ما شبع الأب من الخلفة بإبنه الكبير ..الظالم,فاعتبر الأب ابنه الصغير قضاء وقدر

.

.