يوم الامتحان






يومُ الامتحان .. يُوَزع المرءُ علي اللجان





أزفت الآزفة وقد أتي موعد الإمتحان ..
أنا ماشي.
ذهبت لأمي لأستأذنها أن أمضي ذاهبا وأرجوها أن تهطل عليا بدعائها.,
ماما ..ماما

وجدتها تفترس الحائط بعصاه بلاستيك ., أووه تاني ,لقد دخلت في عراكها الدامي مع الدبان .. طالما حدثتها ناصحا
أنا: ياماما سيبي الدبانة ف حالها ,حرام عليكي


ماما: عشان تحرم تدخل هنا تاني ;بعدوانية;

أنا: هي تحرم إزاي وهي هتموت دلوقتي, وبعدين ما الشباك مفتوح ,غيرها هيدخل

ماما: ما هو عشان غيرها ما لما يشوفوها بيتعمل فيها كده يخافوا يدخلوا هنا (;تخبط دبانة تجيب أجلها وهي بتقول كلمة هنا;)

أنا: ماما.. دا دبان ..مابيفهمش

ماما: أمال أنا هنا ليه .. أنا هفهمه . نياهاهاهاها

التفتُ لأجد أبي هو الآخر يعذب باقي حوائط البيت..الطف يارب ,هو اللي بيعملوه ده مؤازرة لتوتري في الامتحان ,ولا نوع من الطقوس لطرد الأرواح الشريرة..ولا حاجة تانية بعد الشر
أدركت بعد ذلك أن أبي وأمي يتسابقان علي سفك دماء الدبان.
...
وأنا نازل من الباب سمعت أمي تقول لأبي" 16 "فرد عليها"19 وكسرت لواحدة جناح"
..وأخذ يرقص فرحا رقصات الراب ..بينما مالت أمي نادمة طارقة بقبضتيها علي الحائط قائلة بهمس (فعلها الوغد ثانية);.


أنا ماشي رايح الإمتحان وحاسس إن أول واحد هيكلمني هرجع في وشه, أنا أصلن مش عارف أدخل الميكروباص .. مش لاقي باب الميكروباص  أمال اللي قاعدين جوه دول دخلوا إزاي..

بدأت أتوغوش .. 
إدعولي-عشان خاطري- إني أحل كويس,
ياسلام لو قفلت النظري,تعرفوا أنا لو قفلت النظري ممكن ممكن من فرحتي أسقط شفوي
يووه إرحمني يارب ف الدنيا الغير متكاملة دي
مش ناسي كلامي إمبارح بالليل معاهم ف البيت .. وكل واحد عليه ليا شتيمة يقولها ..حتي ما صعبش عليهم شكلي وأنا متوغوش..

 
أخي بيك الكبير : إبقي سطر الورقة اللي هتجاوب فيها سؤال الدكتورة دي وإبدأ بسؤالها الأول عشان تكسبها

أنا:أه وأستفز الدكتور بتاع السؤال الأول .. خليك ف حالك

ولا أمي هي كمان
أمي :إسمع كلام أخوك الكبير.

أنا: لا أنا مابحبش أسمع كلام الإخوات الكبار ,ومش مجاوب السؤال الأول

وأنا إن شاء الله لما أكبر مش هخلف عيال كبار,هخلفهم كلهم صغيرين ومش هخلي حد فيهم يكبر عن إخواته ..بكره الإخوات الكبار بكرهم بكرهم

مش عارف أنا كنت ف إيه ولا فإيه,بس حقيقي كلام الإخوات الكبار بيزود قابليتي للترجيع ,والأغرب التصديق الفوري من الأبهات علي كلامهم ,

 بس خلاص جبت أخري ووصلت مع التعليم لمزنق واللي مكرهني فيه أكتر إن أخويا الكبير اللي كان متابعني في مذاكرة الثانوية الله لا يعيدها أيام ,ومش ناسي لما قلتلهم
إني بفكر ءأجل مادة للدور التاني قالولي:

أنا: ماما .. بابا .. أنا هأجل المادة الجاية .,خلاص أنا جالي تشبّع ومش قادر أذاكر ..معدش فيه مكان أحط فيه معلومات.
ماما وبابا ف نفس واحد : إيه .! ليه ياخويا كفى الله الشر  مالكش نفس ليه هو احنا بنقولك قوم كُل .!
أنا: لا ولا حاجة أنا رايح أذاكر أهوه ..يااه نفسي اتفتحت
أمي :أصلك إنت اللي بتهزر ومش حاسس بالمسئولية, نقولك ذاكر بالنهار تقولنا; "حد يذاكر ف الحر ده,دي المعلومة تسيح  أنا هذاكر بالليل
 نقولك ذاكر بالليل تقولنا :حد يسيب الجو التحفة ده ويذاكر برده,أنا هذاكر بالنهار عشان يبقي الغم كله ف نفس الوقت حر ومذاكرة"

أقسم بالله لو ما إتعدلت ,أجيب سيخ وأسخنه لما يحمر,وأدخله في ودانك وأطلعه من الناحية التانية.!
أنا: إيه ده ,مش دي اللي كنتي بتخوفيني بيها وأنا صغير.!

رَدوا عليا كإني بكلـّم الست بتاعت شئون الطلبة
حتي أمي بقت مش عارفة تفرق بيني وأنا صغير وأنا وأنا كبير .مفكراني هخاف من السيخ المحمي.,وحتى هو يعني بالله عليكوا حد يجيلوا نفس يذاكر ف الحر  ده .. دا الواحد بيكسل يآكل
بس في الآخر الواحد بيعدي بدعا أمي .. لكن إن كان علي المذاكرة فاللي بذاكره ده ما يرضيش مرات البواب .

أنا: ماما ..إدعيلي أنا خايف قوي لأدخل لرئيسة القسم ..ست شرانية و..
أمي :مقاطعة:  إسم أمها إيه ؟؟
أنا: أمها ! , مش عارف ماكنش علينا في المنهج
أمي: ممم .لغوه من عليكوا السنادي طيب سيب الموضوع دا عليا

أنا: ناوية على إيه يا ماما ؟؟ دي عندها عيال
أمي: إعمل إنت اللي عليك وإتنيل ذاكر وأنا هظرفهالك دعوتين ينسوها المنهج ..بس 

طالما أمي هتدعي يبقى كده بقه أنا بره اللعبة يامعلم ,والصراحة أنا بدأت أقلق عالدكتورة وبفكر أدعيلها .. جالها الأقوي منها .. الله يرحمها بقه هي اللي جابته لنفسها 

أنا أول ما دخلت اللجنة إفتكرت حضن أبويا وعوزت أعيط .. العيال واقفة كأنما يساقون إلي الموت وهم ينظرون .. أول ماشفت الدكتور وبطنه اللي ماشية قدامه ..عوزت أروح أحضنه وأعيط .. أنا تاني مرة أحس إني كلب ..أول مرة مش فاكرها
أنا قلت أول ما أمسك ورقة الإجابة هعمل ببي .. أو لو كان الإمتحان سهل هعمل زي الست اللي في فيلم اللمبي في فصل محو الأمية,بتاعت أمك دي ياله في إسماعيلية
رايح جاي ..

أزاكنش يمتحنوني في الأفلام ..ويجيلي سؤال : إكتب من ذاكرتك عن فيلم مات فيه البطل غرقا في النيل وعند نزول التتر قفز خارجا من المياه قائلا : عليا الطلاق إنت إتخضيت..
يااه كل ده فكرت فيه وأنا ف حضن الدكتور ,أقصد وأنا بحلم إني أحضنه .. يارب بقى يمشي من قدامي أنا جالي توتر
إرحمني يارب .. عدا نص الوقت ,بقيلي السؤال اللي في النص.. أذا كان يترجموه عربي .. والله الكلمة دي شفتها قبل كده بس مش فاكر فين
(جنب المدرج .. الإمتحان الشفوي هيكون بعد الإمتحان النظري في مكاتب القسم جنب المدرج .. )

قالها رئيس القسم وهو داخل يشمت في اللي ما حضرش المحاضرات ..
..
 لو سمحت ..عاوز أسلم الورقة ..( نظرات صمت من الطلبة حولي تجاهي 
,
دخل أصحابي واحد ورا التاني في الشفوي ..كل أما واحد يدخل نوصي الباقي ,إدعوا لأخوكم فلان .. إنه الآن يُسأل 

الواد بعد ما يطلع من عند الدكتور تجري الجموع عليه .. كرسي يا جماعة ولمون بسرعة .. ها سأل ف إيه ؟؟
الواد : أنا مش فاكر اجة خالص .. كل اللي فاكره
إحنا: ها
الواد : إنه رسم حاجة مدورة في الآخر !!
إحنا: يسقط العشرات مغمن عليهم ..ويصفق الجمهور

دخلت للدكتور في الشفوي لقيته هيسألني من نفس ورقة أسئلة الإمتحان,هو مفكر إنه كده بيساعدني .! بقي معقولة معقولة يا ناس حد يسقط في الإمتحان مرتين ف نفس اليوم شفوي و نظري .. خلاص خلصت أسئلة المنهج بيسألني من ورقة الإمتحان هو انا كنت عارف أقراها..منه لله  


أه .. الموبايل بيزغزغني .. أكيد أمي بتتصل تطمن
أنا: سلام عليكم  ياماما معلش إنتي كنتي بتتصلي وأنا مع الدكتور كنت عمله فايبريشن
أمي: أيوة يابني عملت إيه ف الشفوي
أنا: الحمدلله, الإمتحان كان صعب جدن وكل العيال طلعين من عند الدكتورة بيعيطوا ..
أمي: طب و دخلت للدكتورة دي ليه ياعم القسورة !
 ثم طخن صوت أمي فجأة ..أه إنه أبي يأخذ منها السماعة': حد فيكوا إتعور ؟؟
 
أنا: خدي منه السماعة ياماما , ماتقلقيش أنا بعون الله دخلت للدكتورة وطلعت هي معيطة .,

مش أنا ..مش أنا يا تعليم اللي يهزني إمتحان
وبمناسبة المناسبة السعيدة دي سمعني : فات الميعاد ياندم ياندم ياندم .

طمأنت أمي أني إن شاء الله من المحتمل أنجح ,ولاعشم في أكثر من ذلك 

بابا: يابني أنا بس كنت عاوزك تجيب تقدير عالي السنادي ,مرة من نفسي .
أنا: (يا ماما قلتلك خدي منه السماعة) , يا بابا بليز إنت عارف إني بدوخ من التقديرات العالية
بابا: وما بتدوخش ليه من الدور التاني .. دور تسعة يا فاشل
أنا: التاني لأ أدوخ من التاني ليه أذا كان إحنا ساكنين في التاسع وعايشين أهوه مش دايخين ولاحاجة.

(وكما تعلمون إخواني أنه كلما إرتفعنا عن سطح البحر يقل الأكسجين ;وبالتالي يقل التقدير; ويدوخ الإنسان ,رغم أن دوخته تكون أكثر ف الدور التاني..اللي هو سبتمبر,ذلك أن الدور التاني يعلو دور مايو بدرجات شاهقة .. علي أقل تقدير .


ورحم الله زمانا كنت فيه إنسان وكان الناس ينهمرون عليّ ببرافوا وإكسلنت.. إنها سُنة الحياة والتفوق كمثل الخيارة يوم في اليد وعشرة على الشجرة
وسلاما لنظام تعليم تحولت فيه الخبرة لقدرة على التخزين
والتفريغ عند الحاجة.

ألقاكم يوم الزينة (النتيجة

لازم تبقى معيد




 ,



أنا: هاي داد,هاو دو يو دو مان
بابا: مش معايا والله ياحبيبي شوفه ف التلاجة
أو إسأل ماما
أنا:دا إيه ده
بابا: أوف,اللهم طولك ياروح,عاوز إيه يابني.
أنا: مافيش خلاص,كنت بدور علي القاموس
بابا:القاموس الوحشي
أنا:هههه ,لا الجاموس الطبي
بابا: إمشي من قدامي عشان لو فضلت أكتر حرجع في وشك
أنا: ليه يابابا هو الحمام مشغول,ولا إنت تقصد حاجة.,ولا إيه (باستغبا
بابا: عاذرك يابني ,عاذرك
ودا إيه اللي فتح نفسك علي المذاكرة كده بعد الشر !

أناوالله لو مضايقاك بلاشها ,فعلن خيرت تعمل شوكت تلقي .
بابا:بس بس إخرس هتبوظ بُقي .,روح ذاكر يافالح ..بدل ما أنا من أول ما خلفتك طالب,إنت عجزت يابني,دا إنت شكلك بقيت قدي,
أنا: أه والله يابابا قلـّهم
أبي: ماهو إنت لو سمعت كلامي ,وتشد حيلك وتطلع معيد
أنا: يابابا أنا طموحي أعلي من كده,أنا بذاكرمش عشان تقدير وجري ورا الدرجات,أنا بذاكر من أجل العلم
بابا: حوش حوش المعلومات المنبعثة منك ,طموحك أعلي من كده كام متر يعيني,طموحك إيه يابو طموح دا يادوب بتنجح علي حرف



بابا: يابني أنا صعبان عليا بس دمااغك ,دي مصروف عليها وكفاية الذكاء اللي إنت وارثه مني,آن الأوان تخدم بيه البشرية.
أنا: (أبوس إيدك إلا دي ,سيب البشرية فحالها) ف سري طبعن, حاضر حاضر يا بابا إن شاء الله.
أبي: يابني تخيل لو إنت بقيت مفتح كده وتكتشف حاجات في الجتت ويطلقوا عليها إسمك ,صعبان عليا بس إن كل واحد شاف عضلة أو لمس عرق ,يسميه باسمه وإنت لأ.!
أنا:فعلن الطب بقه سايب خالص
بابا: يابني ما إنت كنت أولي بالتسمية دي, وتمجد اسم عيلتك .,طب تخيل معايا مثلن تفاحة آدم دي, يكون إسمها تفاحة مدكور مثلن
دا حتى إحنا اولى بيها إحنا عندنا جنينة تفاح
أناياسلام كدهه,الموضوع مش بالبساطة دي,إنت دخلت طب قبل كده,
أبي:لأ
أناولا حتي عديت من قدامه
أبي: برده لأ
أناطيب .,حمدي السيد مش حيسيبني ف حالي
أبي: يابني ماهو مش إنت لوحدك,حتلاقي صحابك هما كمان عاوزين يسموا ,وبعدين الجتة كبيرة وتساعي,كل الأسامي
أنا: إيه ده,هو لحاف..دادي إنت مفكر إن لما أبقي معيد خلاص حيكون الطب بتاعي ويكون ليا كلمة علي جسم الإنسان,هو إتحاد ملاك
بابا: يابني إن ماكنش عشانك وعشان حلم جدك إن إسمه يطلق علي حاجة مهمة ومات ناقص حلم,يكون عشان عروبتك والنخوة
أناالنخوة .! إيه علاقتها باللي بنتكلم فيه.
أبي: .. ,إيييه,معرفش إنت اللي قلت .,وبعدين ماتغيرش الموضوع
يعني بدل ما يكون;فيجس نيرف,يكون مدكور نيرف..أو كور نيرف;نحذف مد للتخفيف برده ,ويابخت من سمي وخفف;,فكر فكر يبني تانيوما هو إحنا برده عندنا جسم,وكل واحد حر في جسمه ويسميه باللي يعجبه مش الأجانب بس
أنا:طب ودي تيجي إزاي أعمل ايه يعني؟
بابا:حب أي حاجة ,أي حاجة تشوفها حبها .,عندك نيوتن لو ما كنش بيحب التفاح وجابته بطنه تحت الشجرة ماكنش لقي الجاذبية ,
أنا: مش فاهم,يعني أول ما أشوف شجرة أجري أقعد تحتيها وأستني التفاحة تقع!! !
ولا أقعد في ظل الشجر زي نيوتن ماقعد وأبعد عن الشمس والحر
.,أنا على فكرة كتيير عملت زي نيوتن وقعدت تحت الشجر واستنيت حاجة تقع
بابا:ها
أناعصفورة عملت عليا ببي
بابا: يالهواااي وإنت هتفهمها منين دي ,طب بلاش دي ., روح إعمل عملية يمكن تتسمي بإسمك,عندك مثلن الريس عمل المرارة بكره يغيروا اسمها ويكتبوا عليها " العضو المبارك..أو يضغطوا الكلمتين في بعض تبقي :المرارك
أو يحذفوا الألف واللام للتخفيف
أنادستور دستور ربنا يجعل كلامنا خفيف عليه,بلاش السيرة دي يا دادي والنبي أصلي ماليش في السياسة
بابا: إنت مالكش ف حاجة أصلن بس إيه علاقة مبارك بالدستور ده عارضة ودي معارضة ... شكلك موهوب ياد طالع لأبوك
أناألا صحيح يابابا شكلك تعرف الراجل نيوتن ده كويس ,هما ليه سموه كده تصغيير نتن يعني.!
بابا:الله يقرفك إنت اللي نتن ,بص يابوجهل .,الأهم من إنك تعرف إسمه إنك تعرف إنك قصدت الشخص المناسب عشان تسأله السؤال ده
أبونيوتن ده كان وحداني وف حاله
وكان شغال بياع سكاكر وجعة على باب معامل أنيس عبيد
وف يوم كانت نازلة مترجمة من المعمل ده فعجبته أوي
المترجمة دي كان عندها ابن من جوزها الاولاني وكان هندي كان باقي من ترجمة آخر فيلم هندي .,وكان الواد ده عاشر إخواته فسمته تن فاشترطت على أبونيوتن شرط جوازهمإنها تسمي الواد الجديد نيوتن ..يعني تن الجديد
والسؤال هنا ياغبي المفروض يكون ليه ماسمتوش إليفن مثلا ..ودا لإنه كان من جوز تاني
أناياااه يابابا يااه دي الدنيا دي صغيرة قوي
بابا:المهم نرجع لموضوعنا
قلت إيه يابني
أنابص يا بابي..,أ
أبي "مقاطعا حديثي: بابي ,أهو دا اللي إنت فالح فيه
أناأنا ماليش في الطب وبغيير لما بسمع سيرته وبحس إن حاجة بتزغزغني ..أنا بحب التجارة والإدخار..عندي موهبة في التحويش
أنا حطلع أخصائي تحويش ,مابحبش أصرف.. بس حب النحو والصرف فممكن أشتغل في المجالين معا ,يعني مثلن أمنع الفلوس من الصرف

أبي: وأنا ..أنا بحب المنع والصرف ,وحمنع عنك المصروف

أنامهما كان مش حيأس ,حواصل,حتحدي;موسيقي إتقدم ..إتقدم; لو منعت عني الفلوس ححوش برطمانات وأكياس بلاستيك زي أمي

-P


بابا: دا أخرك جتها نيلة اللي عايزه عيال,أنا قلت مش هيرفع راسي غير أخوك ابن ضهري صحيح,مش إنت يا أصنج يا بتاع بابي ودادي
أنا: عايزني أبقي معيد ,بعد ما قضيت نص حياتي في الهبل عاوزني أقضي النص التاني أدرّسه
.!



,



إـّنا نسخرُ مـنْ الهم ّ
تحظر المدونة على الإخوات الكبار
يكتبها مراهق,
(هذه المدونة)
♣ لكل إنسان جعل من غمه ضحكة يضحكها الناس..فحبب إليهم فضفضته
♣ وإلى من سخـِر من همه, فهانت مشاكله .. وأصبحت ذاتها حل وراحة لمشاكل الناس
♣ لكل أب سمع ابنه وصدقه وكتم سره وطبطب على كتفه وضمّه
♣ لكل من له شعر صدر ..
♣ إلى الصينيين والأفغان وكل من في آسيا ..لقد نسبت إليكم أكثر مما أنسب لبلدي
♣ لكل مراهق
♣ هدية لكل أخ صغير ..أتى للدنيا كرد فعل لزينة الحياة الدنيا ,بعد ما شبع الأب من الخلفة بإبنه الكبير ..الظالم,فاعتبر الأب ابنه الصغير قضاء وقدر

.

.