عاوز بنطلون


بعد ظهور النتيجة ,عاوز بنطلون
أنــا :
أمــي :

أنــا :ماما عاوز بنطلون
أمــي :معلش
أنــا :هو إيه اللي معلش ,هو أنا بقولك إتعورت ,يا ماما بجد عاوز بنطلون
أمــي :كام رِجل
أنــا :لا مش كتيير هما رِجلين بس
أمــي :طب قول لباباك
أنــا :نعم
أمــي :إنت ما بتفهمش إنجليزي ياد ,بقولك قول لباباك أنا ماليش دعوة ,أقولهالك بالعربي عشان تفهم ,
أنــا :لا ,,لا يا ماما خلاص أنا فهمت ,,طب ..طب ما تكلميه كده تليني دماغه وتفتحيلي سكة ,وما تقوليليش الجاموسة والدة ..
أمــي :لا يا حبيبي عادي ,أبوك مش محتاج تلييين أكتر من كده هو أصلن في التليين ,من تقديراتك المشرفة ..يا فاشل ..يا وقح .
أنــا :إنت بتنعتيني بالوقح ..واماااه
أمــي :وأمااك إزاي يعني ,جايب تسعة مقبول ,دا أنا لو كنت مكانك كنت جبت جيدة (عشان أنا أنثى ) بطرف السابوه ,يا فاشل
أنــا : أنا مش فاشل
أمــي :يا فاشل
أنــا :ما تقوليليش يا فاشل
أمــي :لأ فاشل .,ومعوق كمان
أنــا :ما تقوليليش يا معوق (بنبرة حزينة)

أمــي :يامعوق ,وقال ايه عاوز بنطلون .. تداري بيه على عملتك السودة ..,حتروح فين من الأحداث !!
أنــا :ما تقوليليش يا أحداث
أمــي :أه , ما إنت حتفهمها إزاي دي , نسيت ياله إنت كنت ناسي ناسي أفكرك ,
أنــا :تفكريني بإيه ,!
أمــي :بالماضي .,أفكرك بالماضي
أنــا :على فكرة أنا ماليش ماضي

أمــي :يخربيتك فاشل وحيوان .,
أنــا :ما تقوليليش يخربيتك
أمــي :يالهوى , دا ساتر من ربنا إننا مستحملينك ,اللي زيك كان يشتغل في موقف
أنــا :فعلن أنا بحب المواقف الصعبة
أمــي :صبرني يا رب
نسيت ياله ,نسيت إيد أبوك ,اه ما هو إنت ما بتشفش قفاك في المراية ,العيب مش عليك ,العيب على المراية
أنــا :إيه يا ماما كمية الأساوة دي ,كل ده عشان البنطلون
أمــي :اللي زيك المفروض ما يبقاش له نفس لا يآكل ولا يشرب
أنــا :ليه يعني ما هو لكل جواد كبوة
أمــي :أه , كبوة ..,أصل الجواد إتكعبل في البنطلون فاتكب ,وإنت يا كتر بناطيلك ,وبعدين ياريتك حصلت جواد ,دا إنت ما جبتش جحش رضيع
أنــا :يوه بقه كل ده عشان بنطلون , أمشي عريان يعني !,
أمــي :لأ إمشي من قدامي
أنــا :كده ياماما ,في لحظة نسيتي اللي ما بينا ,ياريتني كنت قرد عشان ما أشفش اللحظة دي
أمــي :كنت حتبقى قرد فاشل
أنــا :ما فيش قرد فاشل
أمــي :لأ ,فيه فاشل واحمر كمان
أنــا :تقصدي بإيه احمر
أمــي :والله اللي ... إيده حمره , يحسس عليها , آه اتاريك عاوز بنطلون ! ههههههههههههههه (بشماته)

أنــا :ماشي يا ماما , دا بدل ما تآذريني !
أمــي :لا يا ضنايا , آذر نفسك
أنــا :يا ماما إنتي لو شفتيني في اللجنة وأنا بمتحن كنتي قدرتي موقفي
أمــي :لأ يا شيخ ,(فجأة يعلو الصوت) : ما إنت اللي بتبقى داخل الإمتحان والمعلومات متصلبة ,ومربوطة بأستك ..بتخاف دماغك تتهز حاجة من المادة تقع و تنقص جملة , ولا ّ ساعة ما تستلم ورقة الأسئلة وتلاقي حاجة مش عارفها , بتتوتر وتروح الحمام وتلحوس نفسك هناك ,
بتعمل ببيه توتر ..ها
أنــا :هما اللي بيحطوا إمتحانات ,هما نفسهم مش عارفين لها إجابة
أمــي :وإنت بقى بتبقى متوقع يسألوك : جي جي ماتت في الحلقة الكام ..!
أنــا :يا خسارة , يا خسارة يا ماما .., وانا اللي كنت فاكرك ماما ..أنا حموّت نفسي ..أنا حرمي نفسي من البلكونة

أمــي :مش حتموت , حتتعلق في تكييف الدور السابع ,ما إنت أصلك نحس ..,ولو وقعت حتنزل على رقبتك تتكسح وتبقى معوق ونلملك معونة الشتا
أنــا : أمال أعمل إيه .. أعمل إيه .. أروح فين .,.!
أمــي :روح هاتللي أشرب ,وإقفل باب التلاجة كويس ,وبراحة عشان باباك نايم
أنــا :إيه ..! هو بابا جوة (بصوت خافت)
أمــي :أه , وكان بيسأل عليك
أنــا :وقولتيله إيه ؟
أمــي :قلتله , ما عنديش حد بالاسم ده
أنــا :طب الحمد لله ,قلقتيني يا شيخة ,فيه حاجة تتآكل .؟
أمــي :عندك العيش جوة
أنــا :أه , وبعدين
أمــي :بعدين إيه .؟
أنــا :أيوة , العيش ده المبتدأ ,فين الخبر بقه ..الغموس يعني
أمــي :أه , اصلي تعبانة قوي يا حبيبي ومعلش فما قدرتش ,,,آه ياني

أنــا :طب أنا رايح عند مؤمن
أمــي :مؤمن صاحبك , ولا مؤمن آل فرعون .,!
أنــا :لأ مؤمن بتاع الكاوتشوك
أمــي :إيه حتجنـّط ..!
أنــا :لأ رايح آكل لحمة
أمــي :روح ْ,الحقّ عليا إني خايفة عليك تآكل لحمة عيانة , تصحى من النوم تنعر ..وتعمل ببيه جلة
أنــا :يا ماما رفقا ...رفقا بالقوارير ..
أمــي :قصدك رفقا بالحيوان , وبعدين مش أنا قلت بلاش أكل برة البيت ؟
أنــا :ما هو في البيت ما فيش لحمة عشان إنفلونزا الخنازير ,,ومافيش فراخ عشان إنفلونزا الطيور ,هو ليه بس يارب ما فيش إنفلونزا العدس والفول ..!

911


المجلس بتاع الجامعات
وزارة النتايج والإمتحانات والحاجات دي
الهيئة العليا للدور التاني

نتيجة الطالب / دمااغ تعباان
رقم الجلوس : ya3ene
الــمادة
الـتقـديــــــــر
المادة الأولانية
كويس
المادة التانية
كويس جدن
الفارما
إنت غبي ياله .!!
الميكروبيولوجي
دا منظر واحد في طب .؟!
الباثولوجي
بهيم وما بيفهمش .
التشريح
جامد ياله والدكتورة مبسوطة منك
الفستولوجي
حلو
المادة التامنة
حلو جدن
المناخيير والودان والزور tnt
,إليهي يخرب بيتك
التقدير العام : ناجح ع الحركرك ومنقول للسنة الجاية.
إعتماد ............................................................ إمضاء
رئيس وزارة النتايج وكده................................................. العميدة
السيد الأستاذ العالم الدكتور/ عبده ......................الأستاذة الدكتورة/ أم محمد
وألف مبروك للناجحين وسلـّم على ماما .. ماتنساش

(مش عارف أسمـّيه إيه )



































البداية ..
شخص قاعد (هنا) ,عين تغفو .. وتصحو .. ..تتأرجح الرأس يُمنة ويساارن..عدم تركيز وقلة دراية بالجو المحيط .. غياب تام عن الواقع ..,أصوات بعيدة تأتي من (هناك) .. مشوّشة ,ولا تسمع منها إلا طراطيش كلام كأن حد بيشتمني ويجري...
وإذا اقتربت نحو (هناك) فإذا بشخص فوق ..هناك ,قاعد يتكلم ويبص في السقف ويزعـّق ولا يسمع من صوته شيء ..سوى الطراطيش(اللي قلنا عليها),
كان صوته بيفوق الناس من النوم ..أو النعاس ,حيث أنه كان نعاس جماعي .. وفجأة, يشخط هذا الرجل شخطة يهتز لها شعر الصدر ..فيصحو الكل .
إنها صلاة الجمعة .. في مسجد صغير تحت البيت .. في الحر.
كنت بصللـي بعين واحدة بس , والتانية كانت نايمة ,قريت في الصلاة يجي تلات سوّر ,كلهم (قل هو الله أحد)
كنت أسجد ما أقمش غير لما أحس بالهوا جنبي ..اعرف إنهم قاموا ..فأقوم
كان الراجل اللي جنبي ينام ينام في الخطبة وفجأة يقول (عليه الصلاة والسلام) ويرجع ينام تاني .,بدون مقدمات ولا مؤخرات ,,كانت خطبة أرق ,أرق
يعني حتـى الواحد ما يعرفش يآخد راحته في بيت ربنا ..!! 
الخطيب كان بيتكلم براحة براحة لحد ما ننام على التردد الهادي ويجي فجأة يشخط يقوم يفزعنا .. ما هو مش لاقي حد يسمعه وكل ما يبص لحد ,قال يعني متابعه ,يلاقيه نايم ..يقوم متعفرت أكترويزعق
كان عنوان الخطبة , عقوبة اللي مش بيصلي الجمعة , طب ما هو كده الناس اللي موجهة لهم الخطبة أصلن مش موجودة .. بس عمومن محلولة ما هما بيبقوا واقفين في البلكونة ساعتها أكيد حيسمعوا .. يمكن .
أعرف واحد صاحبي بيته قصاد المسجد .. بيشتغل نفسـُه وبيسمع الخطبة من البلكونة وبيصللي مع الإمام من البلكونة برده..
وفي وسط ما الخطبة شغالة تلاقي اللي داخل من باب المسجد يبص على اللي موجود يشوف حد يعرفـُه ويقوم مشاورله .. صباح الفل يا حاج على ويقوله " ما تيجي يا حاج هنا "يعني يجي يقعد جنبه .. يا ساتر,
ووقت ما يقيم الصلاة ,مش أي حد يقف صف أوّل , كان الكابتن (تييت) اللي بيصللي في المسجد كان من زمان كابتن كرة مشهور بيلعب في النادي .. بس لما اعتزل بدأ يلعب في المسجد ,وقف على راس الصف الأول وبس اللي عاوزه يقف إمام حيقف إمام ولا يجد أدنى حرج في إنه ممكن يرجع الأمام ويطلع الحاج (فلان) صاحبه وعلى مزاجُه , المهم جيت أقف صف أول لقيت الحاج تييت ده بيبصلي بإزدراء (إزدرى - يزدري-مودزاريلا)و بيشاور عليّا بأنمـُله (صابعه )وبيقوللي إنت ياله إرجع ورا , تعالا يا حاج (بتاع ) اللي كان في الصف التاني .. وأهو صف تاني صف تاني أحسن ما يحرمني من الصلاة هنا أصلن ما هو مش على مزاجه ,

المهم , اللي وقف إمام حبكت يقرا من سورة النساء .وبعدين النوم وأنا واقف صعب جدن , ولما حسيت إنه خلـّص ..وركع ..ركعت ,وغاب وبقى ونسينا كنت الصراحة عاوز أقوله : حرام عليك الناس فاطره قرنبيط .. طب بلاش في الركوع
وتسمع بقه لما سجد , تنهيده اللي جنبك( راجل كبير في السن ..(سبحان ربي الأعلى ..آه يابا)سمعتها فعلن والراجل ساجد بس كنت حاسس بيه,ووقفت مرة جنب ولد صغير لقيته بيدعي ربنا في خشوع قوي (يا رب الراجل ده يخلـّص بقه) ..


..مع إن الصلاة أيامنا وإحنا صغيرين كانت غير كده خالص كنا بنصللي اللي إحنا عاوزينه في الوقت اللي إحنا عاوزينه .,والله كمان من غير وضوء ,أفتكر مرة حبييت أخطب .. على المنبر ,وكان بظرفها يوم الحد والجو حار جدن فتوكلت على الله ,وكان عنوان الخطبة عن النار وأبدعت بقه (النااار وعذااب النااااار إسوّد إسوّد إسوّد ) بزعيييق (كما كنت أرى الخطيب يفعل يوم الجمعة ) ,وكان جسمي صغير جدن ملهوش ملامح (دا كانت أمي بتدور على بقي عشان تأكلني,كانت معلمة بقي بعلامة)  ,يعني تحس إن حاجة كده بتزعق من فوق ومن حظي إن حارس المسجد كان راجل أسمر جدن أو إسود مش فاكر ,وكان بيصللي ففكر إني بشتمُه راح سايب الصلاة وجري ورايا لحد البيت , 

لكن دلوقتي فأنا بصللي الفجر وبقول التحيات وجنبي اليمين على أقرب حاجة طرية ..والناس تسجد وتقوم ,وأنا أسجد وما أقمش ..واللي جنبي يتنيه يضرب فيه عشان ينبهني وأنا ولا حياة لمن ينام , وساعات بسمع الأذان وأحلم إني صليت ركعة بركعة وما افتكرش غير على الضهر ..إنه كان حلم ,, زي زماان لما كنت حيوان صغير (قبل ما أكون حيوان كبير) كانت أمي تزعقلي عشان بعملها على السرير . كنت بقولـّها معلش يا ماما أصلي حلمت إني كنت في الحمام بعمل ببيه .. فعملته ..
والصراحة ساعات كنت بعملها وأنا صاحي على السرير عشان مكسل أقوم ..ولسه حروح الحمام والجو ساقعة ...يااااه , دا الدين دين يسر وليس عسر ...وكما يقول الشاعر: إديها ببيه ميـّه ..تديك  تراوة (ياادي القرف)

أحلام واحد مش مستغطي




السلام عليكم ,, عندكو تكييف ...؟؟
طب مش ممكن اللينك بتاعه أعمله داون لوود ,,
أصلي خلاص قربت أتحول للحالة السائلة بتاعتي .. أو ربما جيلي

المهم من زماان جدن وعلى الايميل بتاعي بيجيلي رسايل زي المطرة (الشتا يعني) من ناس غريبة كده وبتكون بلغات العالم المختلفة ::
واحدة منها جيـّالي من جنوب افريقيا وطبعن بالجنوب أفريقي .. واحد بيقولي إن هو مين ومش عارف شغاال ايه وعايش فين .. والمهم بيقول إن الشخص الفلاني كان ماشي ماشي في طيارة وبعدين راحت الطيارة مفرقعة ومات هو ومراته ووعياله وكان يعيني حظه إنه مقطوف من شجرة (يعني مالوش أهل يسألوا عنه) والراجل اللي بعتلي الرسالة بيقولي بقه إنه ناوي يآخد الفلوس اللي الراجل الأولاني (اللي هو فرقع في الطيارة) وعاوز يحولها لإنجلترا بس محتاج وسيط ..
وهو أنا - المفروض , وسايبلي رقم تليفونه .... ومن الرسالة دي يجيي مئات الرسايل عندي في الجنك ميل .. والمفروض إنها بتتمسح أول بأول ... لإنه الصراحة كان بيكتبلي أرقام وهمية يقوللي مثلن عاوز أحول 500.000.000.000$ ... ودا دولار مش بريزه ولا إربع مخرومه ...

فكنت لما أقرآ الرسالة آجي عند الرقم اللي مش عارف أقراه من كتره, وأسرح ... وأسيب الجهاز وأقوم أنام على بطني وأرفع رجللي لفوق وأحلم ... إني دلوقتي في بانكوك بعمل تووور في النيل بتاعهم اللي بيمشوا فيه بقوارب غريبة.. أو في اليخت في المحيط الهنداوي وبشرب عصييير لونه أزرق ... ما هو مافيش حاجة مستحيلة مع الفلوس ... وفجأة
وأنا راكب اليخت يقوم واحد صاحبي متصل بيا على التليفون ... بس طبعن مش حرد .. لإن أنا حكون شاحن أو محول رصييد فئة خمسة جنيه وعليهم ضعف الرصييد هدية ... فأقوم مكنسل وأتصل أنا بيه .. أه من المحيط الهندي .. وألاقيه بيقوللي (إلحق الدكتورة أخدتك غياب عشان ما حضرتش السكشن ... حتى في أحلامي بيطلعولي .. فطبعن ومن ساعتها بطلت أقرأ الرسايل دي عشان بتعيشني في أوهام وبتفكرني بصاحبي اللي إتصل عليا في المحيط..

والأكتر من كده ,
إن أخويا لو قاعد جنبي ومحتاج أغيظه .,أقوم قايلله على الرسالة يقوم مصدق ويقوللي بتلقائية لا إرادية (وأنا؟؟!!) يعني نصيبه من الفلوس ..أو هو فين من ده كله ... فبأقوم أشتغله بقه وأزلــّـُه وهو يصدق ويزعل إني مش حديله من الفلوس اللي مش حخدها ... طيب

ولكن هذه المرة وعلى غير العادة المعتادة .. لاقيت عندي رسالة على الإيميل ممضية في الآخر من الست بتاعت الياهو وحاطة صورتها وتوقيعها مش بخط الكمبيوتر ..لأ بالخط العادي (فورمة يعني)
Uploaded with Avramovic Web Solutions ImageShack Hotspot
وبيقولولي إنهم عملوا إحصائية لكل إيميلات المواقع اللي بتتيح الخدمة دي, زي الياهو وهوت ميل وأختاروا أربع إيميلات تكون فايزة بجائزة قدرها إتنين وسبعين مليون جنيه .. مش مصري ,, إسترلييني .. وكاتبين تليفون الراجل المسئول عن الياهو بتاع منطقتنا ..أصل هما مقسمنها مناطق زي ياهو بولاق ..وياهوو ميدان لبنان في أرض اللوا .. وياهو شبرا .. وكده ... أه .
Uploaded with Avramovic Web Solutions ImageShack Hotspot
المهم رقم تليفونه مدينهولي واتصلت بيه من عند أبويا كتجربه .. ردت عليا واحد إنجليزية وبتتكلم إنجيليزي .. وفتحت عليا بنت الياهو .. ولو أبويا عرف حيدليتني (delete) بس أنتوا أكد مش حتقولولوا ... صح , حديكوا مليون
أنا:ألوووه ,ألووه أيوه يا ست .. ماي ناييم إذ (تييت)
هي : سوري وات دو يو ساي؟
أنا: إهييه , مش عرفاني ولا إيه . ..ألووو ألوو
هي: (تيت) يو.! ,تييت ,تييت..بلييز دونت تراي أجيين

الست دي معندهاش مهارات اتصال ولا بهارات اتصال ,طب أعمل ايه دلوقتي ,أه ..أخويا , جبت بقه أخويا تاني .. أشتغلـُه شوية .. ووريته بقه الإمضاءات وأرقام التليفونات .. ولعبت عليه وسبكتها فمرضيتش أقوم آكل .. وقولتله أنا مشغول ..بس عاوز أبعت الرد عشان ألحق الجايزة ..

وأنا من جوايا مش راضي أصدق أصل تتطلع في الآخر ياهو دي تبع شركة زيرو تسعميه ... وساعتها حقتل الإيميل بتاعي .. وحغتال الماسنجر
وأخويا ده غلاوي .. وعدو نفسه وبيكره الخير لأي بني آدم برجليين ... وأول ما سمع وبسرعة قاللي (حتديني كام)وكان وشه محمر .. ومصفر .. وتبدو عليه علامات الحقد اللا إرادي .. قمت أنا مستغل الفرصة اللي بسمسم دي , وقولت أما أطلع القديم فيه .. قلتله (دا أنا مستني الفرصة دي من زماان عشان أزلك ) .. هو (ليه ؟!! هو أنا عملتلك إيه ؟؟ بلهجة جادة وبعتاب ) قلتله (ولسه .,, دا أنا بس لما يبعتولي الفلوس ,دا أنا حصاحب ظابط  .. وحدي للظابط اللي هو عاوزه .. بس يكحرطك ..وعلى العموم الفلوس خلاص على وصول) ,, وفجأة رن جرس الباب .. فراح أخويا إتخض ,,, فكرهم وصلوا

على فكرة أخويا بجد مصدق وهو مش صغير أضحك عليه .. هو مصدق جدن لإن فيه أكتر من صاحب ليه طلع أمريكا وإنجلترا .. وكملوا تعليمهم بره وإتعينوا معيدين في أمريكا ..ومنهم اللي اتعين في شركات عالمية في مصر ..فهو مستني فرصة زي دي ..وحاسس إنها ممكن تحصل
وبسرعة راح مقومني من قدام النت ..وفتح إيميله !!.. يعيني صعب عليا ..والله صرت أبكي ..والله صرت أبكي ..من كتر الضحك

وبما إني طبعن مش عاوز أصدق لإن الأربعة الفايزين دول لو حيآخدوا سبعمية وعفريت جنيه إسترليناوي .. يعني حيكون (ستة مليون لكل واحد ..يعني كام ؟) .. دي كده نص أسهم ياهوو أو أكتر

بس طبعن لإني خلصت إمتحانات .. فأنا عندي وقت كافي إني انام على ضهري المرادي وأحلم .. وأنا بصرف الفلوس .. دا انا حعمل عمايل ..

أنا مش حعمل ببيه كده زي الناس .. لأ,دا انا حعمل ببيه فلوس ..ودولارات كمان .. وححق حلمي وأنتقم من كل الزبانية اللي قرفوني في حياتي المنقضية (فاكرين) , وحفتح دار أيتام وأحط إخواتي فيها .. وحغير إسمي .. ححطـُّه على دومين (domain) عيلة تانية ..يعني حبقى .. بدل عبده الأعور .. حغير إسم الدومين (الأعور) وأخليه دوت الأكتع مثلن (عبدو.الأكتع . كوم) وهكذا,
لرؤية الصور بحجم أكبر (الروابط1,2,3)

بس ما أخبيش ولإن الموضوع ممكن يكون في حتة أمل .. أنا هدّي لكل واحد من عيلتي ألف جنيه وأقولها بكل ثقة حتى الآن (لإني لسه ما أخدش حاجة )..وحدي لأبويا إتنين مليون بشرط ,إنه يتبرى مني ويشطب إسمي من البطاقة وأبقى مجهود الهوية ,, وأعتقد إنه .., هيوافق P: 

إـّنا نسخرُ مـنْ الهم ّ
تحظر المدونة على الإخوات الكبار
يكتبها مراهق,
(هذه المدونة)
♣ لكل إنسان جعل من غمه ضحكة يضحكها الناس..فحبب إليهم فضفضته
♣ وإلى من سخـِر من همه, فهانت مشاكله .. وأصبحت ذاتها حل وراحة لمشاكل الناس
♣ لكل أب سمع ابنه وصدقه وكتم سره وطبطب على كتفه وضمّه
♣ لكل من له شعر صدر ..
♣ إلى الصينيين والأفغان وكل من في آسيا ..لقد نسبت إليكم أكثر مما أنسب لبلدي
♣ لكل مراهق
♣ هدية لكل أخ صغير ..أتى للدنيا كرد فعل لزينة الحياة الدنيا ,بعد ما شبع الأب من الخلفة بإبنه الكبير ..الظالم,فاعتبر الأب ابنه الصغير قضاء وقدر

.

.