اللـهـــم انـفـخــُـه,,


يريدون أن أحلق شعري..!!

ويحـَهـُم البـتــّة

الدكتور : يعني الواحد يجيله إكتئاب لما يبص للعالم دي , اللي عاملة زي الفرااخ الغرقانة
واحد ثالث : بص على فكرة بقه ,, دي حرية شخصية ,وأنا ضد إن حد يتدخل فيها,, وبعدين مش أحسن من القـَـرع برده يا دكتـــــوووز
الدكتور :قرع ..! بكرة تشوف لما أمسك حاجة بس في الكلية دي,,وكل الابراص الجعانة دي حـتـتـنـتـف
أنا: على فكرة أنا بحبك يا دكتور ,, وكمان أعرف واحد صاحبي بيحبك جدن ..إنت بقه كارهني ليه .!
أنا برده : وإنت ليه مزعل نفسك يا دكتور , يخربيت اللي يزعلك (قولت الجملة دي في وش الدكتور بحماسة شديدة لدرجة أن الدكتور ازبهل ..من صمتي لفترة طويلة ,لإني قلتهاله في سري ),,{ربنا ينفخك ياللي عامل زي الكلبة المطلــّقة}
الواحد التالت : طب ما هو على كده , فيه حاجات كتير المفروض تحصل في الكلية دي وما بتحصلش ,, زي مثلا الأناتــيم(جمع أُنتـم بضم الألف ..وهو القرين) المختلطين , التسكع أثناء المحاضرة لشراء السكاكر ,, أيها الوغد
الدكتور: ويحك يا صاح ,, دي لايحة جامعة ,, وبعدين قلتـلك : حتشوف لما أمسك منصب في الكلية دي حعمل إيه .؟؟
(أخرك تمسك نفسك يا أبو السيس,,برده قلتها بصوت عالى جدن , في سري )


بصوت عالي :(مش قوي يعني)
وبأنياب كاشرة خالص :روح يا بعيد إليهي تقــرع :(طبعا بصوت عالى رجرجني.. بس من جوّة)

,,انت برده مُـصـرّ على الإنكار يا سيد يا زبيبة
,ربنا يرحمنا منك
يارب نكون وقتها اتخرجنا , واعمل اللي انت عاوزه ,, يا دكتور ,,,سيــد

,,
,, دار الحوار بين سكشننا (السكشن بتاعنا يعني),, ودكتور اسمه سيد (مش عارف عدا من الرقابة إزاي ..:: فيه دكتور جامعة اسمه سيد !!!)

كان الدكتور سيد مش عاجبه شكلي ,, قال إيه عشان شعري هايش ونايش ,, وبيقول بغييظ واستنزاف
لقواه العصبية (وهو مشيرا بسبابته على وجهي .. وشـّي يعني):: واحد زي ده شوفوا ما حلقش شعره من إمتى !!

الواحد التالت : يا دكتور ما هو لو حلقـُه حيكون شكله أوحش من كده (ماشي يا تالت , حعديهالك)
الدكتور : يعني إحنا بقه يجيلنا إكتئاب لما بنبص في وشه (وجهه,,يعني)؟؟

سلامة نفسيواتك من إكتئاب الشـَعر يا سيس (دلع سيد),,وبعدين خلينا صـُرحـاء . اللي زيك يا ذكتور ما يجيلوش إكتئاب ,دا يجيب للإكتئاب إكتئاب ,ويبعته يحترف بره ,
وهنا دار الحوار كما في الأعلى

ولعل الحوار قد قطعت منه حتت (جمع حتة) كتيير ,فإليكم الايضاح
الدكتور سيد (اللي هو عدا من الرقابة ) مش عاجبة الناس اللى بتلبس كاب ,, أو مطولة شعرها
وعـُقدته في الموضوع أنهم (المدرسين ) كانوا يكدرونه في زماان الابتدائية ,, فبيطلعـه علينا الدكتور سيـّس!
وأنا حاسس إن الموضوع ما هو إلا حقد طبقـي ,, لأنه الصراحة ما عندوش شعر ,,وكان بيتكلم بفظاظة ,

ولو يعرف أنهم كانوا بيحطولي كريم على شعري وأنا في بطن أمي (مامتي يعني),, وما تسألش إزاي

ويوم ما ولدوني ,, من حلاوتي فلقت القمر , أقصد فلقت الدار ,اللى كنا عايشين فيها ,, لإني (بجد) نزلت من بطن أمي بسقف الدار ,, أيوة لحظة الولادة أخدت سقف الدار ونزلت ,
ومن يوميها حرموا يخلفوا من بعدي .وعلى رأي أمير الشعراء (أحمد رمزي),,

([ياللي من حلاوته فلق القمر ..... وحرق دم أبوه لحد ما انتحر] )
،

المهم الدكتور سيــّد (الأقرع) : أو اللي من غير شعر ::بصـّلـي بـَصه (زغرة) قبيحة ,تحمل أسمى معاني الحقد ,
قومت بقه خارج عن شـَعري (قصدي شعوري .. جمع شعر)
وبعدين يا دكتور سيد اعمل اللي انت عاوزه ,,
وابقى خللي الكلية تنفعك يا مااااان ,,

حتروح من ربنا فين ؟؟

حتـتبـرّص يا دكتور ,, وماحدش حيعبرك ,,وبرده مش حيبقالك شعر
,,يعني حتعيش أقرع وتموت برده أقرع,,

اعمل حاجة صالحة في دنيتك وما تمشيش ورا أهل القرف , يا سيد يا ابن بـهـيــجــة

،، وبعدين انت نسيت ,, نسيت يا دكتور زميلك اللي زعــّل طالب السنة اللي فاتت شفت حصله ايه ..!! (انطس في مصالحه يا دكتور) , ومابقاش حد عارف يعمله حاجة

على العـلـوم إنت حر وعلى رأي الشاعر امـرؤ القيــيء {{مش فاكر قال ايه , بس كلامك برده غلط يا سيد}}

وبعدين هو انت ما شفتش (فيلم الكرنك) ,, واللي اتعمل فيهم ,, مش حتتعظ ؟؟
حيطفوا السيجارة في صـِدرك ,, وتطلع دخانها من مناخيرك لحد ما تختفي


ومش بعييد
يعنــي ربنا حيغضب عليك وحـيـسـخـطـك أمين شرطة


... وتصعب علينـا بـقه ونقعد نـلمـلـك فـلوس,,ترضاها على نفسك وعيالك ؟!
،

وربنا يستر السنادي لإن القسم بتاعه أصلا أرخم قسم في الكلية كلها ,,, وما بيرحمش

والصراحة كلهم عاهات ,, واللى بيعملوه في الناس بيطلع عليهم , من كـُســاح , جــرب, واللى منهم يمشي يتخانق على روحه ,,
حتى موظفي القسم نفسه ,اتعـَدُوا منهم وعلى راسهم المعلمة (جسيمة),, وهي مدام بسيمة بتاعت الأدوات في المعمل , ست كفاءة ,كفاءة يعني ,, من أجلها تنهد الأرض هداً,عليها شخطة تخرر الواحد على روحه ,, وبعدين تخيلوا واحدة ست اسمها هريسة (ما قلنا بسيمة)حتكون عاملة إزاي يعني ..!!
وبعدين فيه بني آدم اسمه بسيمة ؟؟
بس كفاية بلاش غيبة وبسيمة أقصد نميمة,,


16 اللي يتكسف من مدونة صاحبه مايكتبش فيها تعليق:

بـسـمـــة صـــــلاح said...

يانهووووووووووووووووووووووي
انت تموت من الضحك
ولا عنوان البوست خطيييير
حضرتك عليك خفة دم فظيعه
وربنا يعينك على سيس وجسيمه
هههههههههههههه
دمت بكل ود
تحيـــــــاتي(:

بـسـمـــة صـــــلاح said...

اه صح نسيت اقول هيييييييييييييييي
أول تعليق ليا انا

ست البنات said...

السلام عليكم
أنا أيضا اعرف دكتور اسمه سيد :) ومن غير شعر كمان :) فإذا هي غيبة لو كان المقصود هو نفس الدكتور :)

واضح أن كليتك تاعباك جدا ربنا معاك لكن موضوع الشعر ده أنا أتحفظ عليه فكل واحد حر لكن الكلية لها قدسيتها

تدوينة جميلة جدا
:) تحياتي

maiosha said...

ههههههههههههههه
بجد انت دمك خفيف موووت

واضح كده إن لعنة دكاترة الجامعة دول مش هتنحل غير بفناء كل الطلبة على وجه الارض

بجد الله يسامحهم كلهم

وعلى رأسهم دكتور سيس ده
هههههههههههههههههه

تحياتى

سمكه واحده said...

وسااايد يا سااايد سيد جيت احبه سييييد
ايه يا عم انت حتي انتوا يا بتوع الطب بتشتكوا انتوا كمان من كليتكوا
روح يا شيخ
وسيب عم سيد في حاله سلملي علي خلتك بسيمه اقصد فكيه يوه حليمه
ربنا معاك
دمت بكل خير
العنوان تحفه

سمكه واحده said...

وبعدين مش بتقص شعرك ليييييييه اهو شعرك ده اللي موديك في دهيه هو عشان مبسوطلي بيه حبتين مفيش حد غيرك شعره حلو شوباب فاضي صحيح ياله خليت سيد
الاقرع يتكلم عليك اهو
علي فكره الاغنيه جميله اوي
اختيار موفق يا متبهدل

مشخبطاتي said...

بصراحة أسلوبك جامد...وعناوينك أجمد..يلا ربنا يورينا فى سيد وإخوانه فى الكليات كلها يوم ولاقلك خليهم ترم بحاله....وعلى رأى جدة حمزة ربنا يهديه يا يهده..

سلاااااااااااااام

حروف said...

البوست والاغنيه جامدين جدا جدا ودمك خفيف بجد
سلاموز بلهريسه

Anonymous said...

يابني اية اللي دخللك المدونة دية دية بتاعه الفرنجة روح التانية احسن ههههههههه

Anonymous said...

انت جيت يا مرسي نورت

انا حطاهاااااا من زمان وميرسي لذوقك يا مرسي هههههههههه مين مرسي دة معرفش

تامر علي said...

فعلاً بعض الدكاترة عندهم عقدة "الكترا" من بعض الطلبه والكترا دي ماركة عربيه أوبل 2000 سي سي وعقدتها بتخلي اللي عنده العقدة دي وشه (وجهه يعني ) فيه شبه من وش السلندر بتاع العربيه دي علشان كده سموها على اسمها .
وأخيراً وكما يقول الشاعر
مره فار بشنب قابل فار من غير شنب ..قاله تيجي نلعب جبنه وحلاوه ... قاله ليه ؟ انت شايفني اوتوبيس ؟ ... راح خاطف الشماعه وجري.
هييييه دنيا... اللي يشوف الناس وهي بتعيد ... لايمكن يكون عنده دكتور اسمه سيد

Lady E said...

هههههههههههه ده شكل الدكاترة الرخيمين والمنفسنين في كل الكليات مش بس عندنا

بجد اسلوبك حلووووووو اوووووووي

أبو العريف said...

ايه يا غم الحج هو سيد سلكه مضايقك للدرجادي
بس عالعموم انا اعرف واحد كان سيد ودلوقت بقي كويس خالص
يا اخي هما الدكاتره دول خنقه كده ف كل حته
جاتكو نيله
مليتو البلد

life said...

والله يا ابنى البوست ده احلى من مسرحية مدرسة المشاغبين
بجد أسلوبك رائع فى سرد المواقف
بطريقة ترسم الضحكة فى اى عيون تقرا الكلام
واضح أن عم سيس محتاج سايس يروضه أقصد دكتور نفسانى
لا والمشكلة ايه أن انت لو حلقة شعرك واقرعية برضه مش هيعجبه وهيقولك خبى البطاطسية دى بأى كاب
وعلى رأى الزمل أذا كان شكلك بشعرك مش ولا بد ما بالك لما تكون من غيره

تسلم ايديك
روح يابنى ربنا يسعدك زى ما خففة شوية من أكتئاب آخر الليل عندى

ربنا يوفقك وترتاح من هم الدراسة وتتخرج

المتبهدلون في الأرض said...

لايف ,, على رأيك ,,وبعدين ما تنسوش موضوع الحقد الطبقي أكيد ليه دور ,,صعب قوي إن الواحد يتحمل إنه يكون أقرع ,,أو من غير شعر (واحخد مطلع لسانه اليمين)

,,

الباشا تامر على ,,منور وعلى رأي المثل بتاع الكترا واوديب ,, رب ضرة نافعة


"""

ست البنات

الاسياد (جمع سيد )كتييير ,,وما أكثر القرع

:::

بسمة صلاح

منورة التعليقات ,, ولو تعرفوا بسيمة والدكتور سيد بيعملوني إزاي دلوقتي وكأنهم قرروا البوست ,,يلا الدور على اللي بعديهم

::ميوشا

دي فعلا لعنة ,,بس هناك دكاترة ودكتورات زي البوفتيك ... بس قليل


:::
حروف مدونتك العبرية دي حلوة قوي لدرجة إنيب ما عرفتش أخرج منين ..الباب كان مكتوب باللغة نفسها

::::
استرينجر

أخبار مدونتك ..؟؟ مستني فضفضتك يا ملتقاوي

:::
ليدي ,,,من الي بيتعمل فيهم والكبت اللى شايفينه بيعملوه تاني فينا ,,مع إن هناك ناس حلوة بس مع الزمن بيتعلموا من باقيت دكاترة القسم
بس هناك جيل مجدد كله تفهم وقرب من مرحلتنا ,,, دا إذا عينوا حد جديد معييد ..!!

:::
أبو العريف

طبعن لازم نملى البلد ... والواحد لو ما ملاش بلده ...يعملها فين بس ؟؟

المتبهدلون في الأرض said...

سمكة واحدة بحالها .... جيتي في وقتك جعان وأمي معتصمة وعاملة إضراب موظفيين ؟؟؟

إـّنا نسخرُ مـنْ الهم ّ
تحظر المدونة على الإخوات الكبار
يكتبها مراهق,
(هذه المدونة)
♣ لكل إنسان جعل من غمه ضحكة يضحكها الناس..فحبب إليهم فضفضته
♣ وإلى من سخـِر من همه, فهانت مشاكله .. وأصبحت ذاتها حل وراحة لمشاكل الناس
♣ لكل أب سمع ابنه وصدقه وكتم سره وطبطب على كتفه وضمّه
♣ لكل من له شعر صدر ..
♣ إلى الصينيين والأفغان وكل من في آسيا ..لقد نسبت إليكم أكثر مما أنسب لبلدي
♣ لكل مراهق
♣ هدية لكل أخ صغير ..أتى للدنيا كرد فعل لزينة الحياة الدنيا ,بعد ما شبع الأب من الخلفة بإبنه الكبير ..الظالم,فاعتبر الأب ابنه الصغير قضاء وقدر

.

.