أقراص ...تنــّـح




رحت لواحد مختص "مخـتص يخُـص خــص ّ" .."يعنــي عامــل فيها خصـّة"..وقلتله إني مش بستحمل القرف والتحكم الإرادي و اللا إرادي ،والتدخــُـل في الإستراتيجيات الدولية المحلية للوحدة الإشتراكية لشخصيتي وشركاه...
قالي "التناحة" إيه ..."التنااحة" ..اتعود التناحة في حياتك ولما ما تقدرش تستحمل "تنح"...ودي اعزائي المستمعين والمشاهدين واللي حتى مش بيشاهد واللي عامل نفسه شاهد وهو ماشفش حاجة واللي رامي ودانه وعامل نفسه مش سامع...التناحة دي عبارة عن حباية لونها أصفر مصفر تاخدها لما تتعرض للغتاتة ويزول مفعولها مباشرة بعد استقرار الأحوال وتوقف هطول "جاية من هطل" رياح العنف والشخيط والزعيق..
المهم جربت الحباية دي وأخدت واحدة تحت اللسان ورحت داخل الوكر اللي إحنا عايشين فيه ..(("_")) {0,0}

مدكور: كنت فين ياله...هه رد ردت الميه في زورك ؟
متبهدل "اللي هو أنا" : كنت خارج مع صاحبي

مدكور :ما أنا عارف إنك كنت خارج مع صاحبك انت حتستهبل يا ابن الـــ ل ل ل....تيـــــــــت (كلام عيب)..... أما حتكون خارج مع مين يعني ,وبعدين إيه اللي إنت لابسه ده انت حتفضل طول عمرك مخك وسخ مش حينضف أبدا وشعرك عامل كده ليه مرجعهولي على وره إنت مش نافعلك صلاة أبدا"كل ده عشان رجعت شعري وره" ولابسلي القميص على العري زي العيال الصايعة ...يا ابن الـــ"هوهو"يا فاشل ......ودا منظر بنطلون ده "أيوه كدا وهي حتيجي على البنطلون ...يلا أصل يزعل" يلا يا ...تيت....تيت....يا ابن الــ...تيت..تيــــــــــــت... (عـُذرن لقد تم قطع الإتصال لعطل فني ...وجار الإصلاح)
مدكور..:يا بني دا أنا استعوط ربنا فيكوا ...دا انا لما كنت قدك كنت بين صحابي زي ( برارة بنت شويح )
وكانوا لما يشوفوني يسدوا مناخيرهم ...قصدي يسدوا بقهم وما ينطقوش ببنت شفه"فعلا هما كانوا ما ينطاقوش" ..وكنت لما أعوذ من أبويا بنطلون كنت أقف قدامه زي التمـلــّـي.."ماحدش يسألني يعني ايه "...لحد ما يعبرني.
..
ولّا عمك "شاليط" اللي كان في وسط صحابة زي ... زي .. زي برده أخو "برارة بنت شويح" أقصد "سمارة ابن كحيح " يوووه "عمارة ابن رميح" اللي فتح مدينة كفر الحمار , كفر الجرار أقصد كفر الدوار وفك رموز حجر أبو ظبي وأم ظبي والواد ظبي الصُغيّـر
كل ده وأنا يعيني بسمع أمجاد العائلة العريقة
ومش لاقي ليها أي أثر (يمكن هو دا الأثر الخفي)
مدكور "أخيرا ً " :غور يابني إنت منتش نافع في حاجة أبدا وروح اليهي لا تنجح ولا تسقط ... تفضل كالمعلــَّـقة...أنا استعوضت ربنا فيك
هو مافيش غيره ابن ظهري بصحيح الواد "بُحبح..
"بضم الباء وكسر الألف مع ضرب النون" ...حنعرف بعدين مين دا كمان ...ماهي نقصاه

طبعاً أنا بعد الكلام ده كله بتنزل عليا طبقة جيلاتينية حساسة مرنة لصد وردع أي محاولة استفزاز ،لإلتزام الصمت المحكم والحد من الإنهيار المفاجئ الناجم عن ضحايا الإعصار.

المهم قلت مفيش حل للراحة من وجع الودان
ده إلا إني أجرّب "الحباية "بتاعت المختص ,وأشوف حتعمل إيه ؟؟

المفعول بتاع الحباية فعلا طلع بجد والمواقف تكررت مرارا وتكرارا والحمدلله "وجعلنا من بين أيديهم سدا ومن خلفهم سدا فأغشيناهم فهم لايبصرون" ولا سمع ولا حس..
.وبقيت رَخص "لفظ عامي سوقي يعني ذروة البرود"
والمفعول بتاعها إنه بيحمي الجلد من التصدعات الأخاديدية المتحرشفة على كلٍ من الوش والقفا (وهي أماكن الإعتداء المباشر لمدكور وشركاه
)
لمنع وصول أثر الضرب والقرف لطبقة "الميزوبتاع" اللي هي تحت الجلد واللي بتأثر على نفسية الواحد


المهم من اليوم وبإسم الشعب ومن الشعب وللشعب..:: مادة واحد..تؤمم الشركـــ..... أنا بقول ايه !....إني أدعوكم للتناحة من اليوم
،وإذا كان هناك أي أحد بيقرفك في حياتك وزاد القرف عن درجة 6.6 ريختر ميجاترمس .. اتصل فورا على رقم مساعدة المتبهدلين زيروزيرو زيرو مافيش اطلب ما تلاقيش ...وحيحولك موظف الاستهبال لأحد عملائنا لتلقي الجرعة المناسبة


ملحوظة : المشكلة اللي مضيقاني إنهم "الكلام على الزبانية " بعد الضرب المبرح يقوموا يتفوا عليا ...وأهوا دا بقه اللي مزهقني في الموضوع كله ...ودا محور التمفصل لنقطة الموضوع ..وإزاي يتف على نعمة ربــُـنا ,,والظاهر إني حشوف مختص تاني يديني حاجة ضد الشعور بالتف والنف وما سواهما ادعولي ...المتبهـدل على عينـه.

6 اللي يتكسف من مدونة صاحبه مايكتبش فيها تعليق:

Dr.Mohammed Gohary said...

مساء الفل
انت دمك خفيف جداً وعندك افيهات حلوة

بسسسسسسس

حاول تظبط الموضوع أكتر من ناحية الكتابة


وخف شوية من الابتسامات

دا مجرد رأي
ممكن تاخد بيه
أو تديها اتنين تناحة تحت اللسان


تقبل تحياتي

سمكه واحده said...

ايه ده كله ايه ده كله طب ملقيش عندك حبيتين تناحه ولا اقلك خليها بعد رمضان اساسا اسيو احنا متنحين خلقه

ماشاء الله عليك ربنا يذيدك تتنيح ربنا يكرمك يابني روح وتعالي بسرعه

تحياتشي

Anonymous said...

هههههههههههههههههههههههه

و أنا مبطلتش ضحك مش ساعة ما قريت البوست


بص من الآخر مفيش أحسن من التناحة


و كل سنة و انت طيب

maha zein said...

امممممممممممممممممم
يا مساء التباتة والاتامة والسفاقة
اذيك بقه دلوقت
عموما يا عم الحج
انت حصل ورحت رجعت في مدونة الضاحكون
وانا رديت عليك
عارف وعشان التناحة
مش هرجع عندك بردو
هسببك كده متبهدل في الارض
اه
اصلي بتنح وبتبت وبغتت
انا هحاوةل اعمل بنصيحتك وابقه تلمة
مفيدة بردو التلامة
ايه رايك بقه في السفاقة؟

مقاطعـــــــــــــون said...

تبع مبدا تلحم تعيش ولا ايه
جزاك الله كل خير
نحن ضد ان يصل قرشا واحدا من العرب الى اسرائيل حتى ولو سيصل العرب اضعاف اضعافه.. قاطعوهم بلا هواده واثبتوا عروبتنا
تابع حمله مقاطعه كوكاكولا
سر الاثيلين جليكول

المتبهدلون في الأرض said...

غير معروف (الأخراني
إنت متأكد من الكلام ده ..؟!
كلامك يحمل معلومات خطيرة جدن.,
فيه كي بوردات عربي على فكرة ..أه والله

إـّنا نسخرُ مـنْ الهم ّ
تحظر المدونة على الإخوات الكبار
يكتبها مراهق,
(هذه المدونة)
♣ لكل إنسان جعل من غمه ضحكة يضحكها الناس..فحبب إليهم فضفضته
♣ وإلى من سخـِر من همه, فهانت مشاكله .. وأصبحت ذاتها حل وراحة لمشاكل الناس
♣ لكل أب سمع ابنه وصدقه وكتم سره وطبطب على كتفه وضمّه
♣ لكل من له شعر صدر ..
♣ إلى الصينيين والأفغان وكل من في آسيا ..لقد نسبت إليكم أكثر مما أنسب لبلدي
♣ لكل مراهق
♣ هدية لكل أخ صغير ..أتى للدنيا كرد فعل لزينة الحياة الدنيا ,بعد ما شبع الأب من الخلفة بإبنه الكبير ..الظالم,فاعتبر الأب ابنه الصغير قضاء وقدر

.

.