sms

هل تعلم : 
 يقول الحكيم الصيني الشهير من زماان : (لما تعمل حاجة في حد وهو مش بيحبها ,ربنا حيوعدك بحاجة ما تكونش بتحبها تتعمل فيك ..وتقرفك ..وتفضحك ) الحكيم الصيني سعيد يانج 2.5 ق.م .
لما يكون باباك ذكي ذكاء الرجل الذكي , وبذكاء الرجل الذكي يقوم هذا الأب بتخبئة برفاناته التي يشتريها عن عياله(لإنه عارف إن الرخامة فيهم موهبة) في مكان خفي خفاء الرجل الخفي ., ولم يعلم بأن ابنه الذكي ذكاء ابن الرجل الذكي يتتبع الروائح الزكية زحفاً على الأءناف (جمع مناخير).
نخش في الموضوع : اشترى أبي برفانه المفضل .,والذي نقوم نحن بكل تطفل ومن باب الرخامة لا غير .. بتجربته فقط .. حتى ينتهي على بكرة أبيه ,وأمه .. ومن سوء حظ الابن الذكي ذكاء الرجل الذكي أنه بغبائه الذي يشبه غباء الرجل الذكي قد تتبع البرفان ووضع منه ..بانتقام.. لإن أبوه ضايقه يوميها .. على تي شيرته الأبيض بياض الرجل الذكي .. ومن العمل السيء يُولد الجزاء ..فقد بقع البرفان التي شيرت ..وعندما سألت أمي "قالت : دا باباك هو كمان هدومه بقعت .. بس هو بقعت من برفانه..!! ياترى إنت بقعتك جت منين ..!!" سؤال وجيه من إمرأة رجل ذكي ذكاء الرجل الذكي .. فأجبت : الناس ما بقاش عندها ضميير..أروح فين بس ..أقطّع هدومي يا ناس ..! (نظرة خبيثة من إمرأة الرجل الذكي ..لابن  الذكي ذكاء الرجل الذكي).

تعودنا أن نستيقظ كل صباح على أنغام بعضا البعض تغرد في انشراح ,, صُباع الخير يا حبايبي ..,صُباع الخير يا بابا ,
ويكون ذلك باكراً عقب صلاة الظهر .,
ولكن لأمي -زوجة الرجل الذكي - عادة تختلف كاختلاف ....... فلا يحلو لها تلحين موسيقى الحِلل وعزف نغمات الترزيع إلا بعد الفجر ..ولأن أمي من طائفة "البكوريات " التي تتبع مذهب الشاعر العريق امرؤ القيء الذي يقول في مطلع الكوبري "اللي ينام بدري .. يقوم بدري .. واللي ينام متأخر ..عُمرُه ما يشخـّر" .. وقد رد عليه في هجائه الشاعر المعروف أبو الكسوف "من نام وارتاح ..حيشتغل فلاح .ومن سهر الليالي فدايماً على بالي ..ومن نام بين البينين حيروح من ربنا فين " والتي ردت عليه الشاعرة نوسة قائلة "نوم العوافي يا سبعي يا أحمش من دكر البط .. وإبقى نام حافي ياروحي إليهي تتشال وتتحط" .

تقول الحكمة : الرخامة ما تفوتش على عطشان .,خاصة لو اللي حتفوت عليه هو رجل ذكي ذكاء..... ., عندما قررت أمي أن تلدني في يوم مولدي - مثل هذا اليوم- حيث أنها يوميها كانت ما ورهاش حاجة وعندها وقت فراغ ..خاصة إنها ماكانتش ضامنة ظروف الأيام الجاية ..فملقتش حاجة تعملها فقررت الوضع .
ما كانت تعلم المسكينة أني كنت في الداخل حينها ما عندي علم .. وغير مستعد ..فكيف لها أن تتخذ مثل هذا القرار الأشنج الأحوب ..إفرض كنت قالع ..!! أو بتكلم في التليفون ..!! الواحد ما بقاش يعرف يآخد راحته .. المهم أنا ساعتها كنت قد غفوت بُرهة أثناء قراة كتاب "كيف تقيس حبلك السري" ورواية "مدكور وفرفور " وهذا بعدما كنت قد فرغت من قراءة سلسلة "الجاسوس الدسيس في فن الترفيس". 
المهم استعجلت أمي وقذفتني خارجاً على حين غفلة ..ونزلت فجأة مغمضاً عيني ..طبعاً لإن النور كان قايد ., مما أثار دهشة الشارع أني وبكل جدارة وفي سابقة لم يسبق لها مثيل نزلت من بطن أمي بكوعي ..أي والله بكوعي .. وبرجل على رجل (أليط يا إخواتي  من يومه ..يخربيتي ..عثل ..عثل)
والذي أثار دهشة الشارع كمان مرة غير الإثارة الأولى الذي إدعى بعض أهله أني أعود لسلالة الطمبوس الوليق ..وهو حيوان آدمي ..يأكل ولا يبيض .. وبدون قشرة (الفضل يعود ليهد آند شولدرز). 
ضجرت أمي من ضجة الإعلام ومنعتهم من أخذ صور لي على حد زعمها لأنها كان وراها تمرين الجيم.

 يحترف أبي فن الرجولة ., وحيث أن الرجولة أدب مش لمس أكتاف .,فقد اكتسب موهبته -التي تعلمها بنفسه - من الفنان ممدوح فرج .. وإذا ذُكرت الرجولة ..يجي وراها خير مثال ( لما بيجي أبويا بالليل ويلاقيني نايم .,نومة الرجل الذكي ....., وحيث انني أنام كما ولدتني أمي (أنام بمهارة ..مهارة الرجل الذكي ذكاء.....) .,يقوم أبي بإيقاظي من نوم أغط فيه بعمق ليقول لي بكل هدوء (الساعة تلاتة الفجر وربنا) .."نام كويس يا حبيبي ..وما تعملناش فيها معوق يا بن التييييييييت تيييييت تيييييت ...ثانية ..فاضل حتة تييت )
يقومني من النوم عشان حاطط رجل على رجل ..  ويروح هو ينام برجل على رجل ..!  ألبي وصابع رجل غضبانين عليه ليوم العيد ..!!

ابتلاني الله -وحيث أن المرء يبتلى على قدر دينه- بأخ ليس له تفسير .,
أخويا ربنا يشفيه دائماً لما بضايقه -ودا ما بيحصلش إلا كتيير- ..لا أعرف ما الحكمة إنه يآخد القلم السنون(قلم الرجل الذكي ذكاء...) ويجري بيه لآخر الريسبشن ., وعلى مرءى ومسمع مني (وقلبي بيتقطّع) يقوم رافع القلم لفووق وموجه سن القلم لتحت ..ويسيبه فجأة ..قال عشان القلم يقع على سنّه على الأرض فيتـّني ..لا أعرف هل هذا له علاقة ما بالعقل ..ووظائفه 
أم انها الطبيعة السادية التي اكتسبها من أفلام محمود المييجي ..أو المايجيش .,و حنروح بعيد ليه ..!!

حد بينادي ..!! 

13 اللي يتكسف من مدونة صاحبه مايكتبش فيها تعليق:

ستيته حسب الله الحمش said...

مدونتك دي المكان الوحيد اللي فيه بضحك بجد
ضحك الست الذكية ذكاء المتجوزة الراجل الذكي :)
ربنا يحظك ومبروك الواحد وعشرين والحرية
مين ها ينولك الحرية دي؟

عاشقه الرومانسيه said...

كل سنه وانت طيب
وعيد ميلاد سعيد
يازكى
هههههههههه

MaNoOoSh said...

ربنا يسعد ايامك ايها الرجل الذكي ذكاء ابن الرجل الذكي

كل سنة وانت طيب
وعقبال 100 سنة بس تكون اتحررت بقى من العالم اللي مبهدلينك دول
هههههههههههههههه


وانا لو منك محرمش واخلصلة البرفان الجديد اللي هيجيبه بردو
نياهاهههاهاهاهاها

سمكه واحده said...

لا محدش بينادي خاااااااااااااالص
كل سنه وانت بالف خير
كل سنه وانت اسعد من اللي قبليها ان شاء الله
كل سنه وانت الرجل الذكي بن الرجل الذكي القوي(وش بيغمز)
بوست تحفه
وموتني من الضحك بجد
وياتري 2010
السنه دي هيحصل في مامتها اييييييييه
تحياتي

إسكندرانية said...

انا لسة مقرتش الساعه الان 4 وتلت صباحااا

انت وصلت لمدونتي ازاي هههههههههههه

وبعدين غيرت اسمك ؟؟؟؟؟؟
اصلي قريتلك زمان

بس الاول انت اسكندراني ؟؟؟؟؟؟؟
جاوب بسرعه

هههههههه

كل سنه وانت طيب

نورتني بزيارة

وشكرا علي كلامك انا فعلا بعشق تراب اسكندرية

نـــــــــــــور said...

:))

تصدق حقيقى وبد دمك خفيف
اضحك الله سنك ضحكتنى من قلبى والله

كل سنه وانت طيب ياراجل ياذكى ذكاء الراجل الذكى :)
وبطل تحط برفانات الراجل الذكى عشان كده سرقه :)

العيسوى الصغير said...

انا قرات دا كله ازى مش عارف احنمال عشان خطك حلو

نكهة مغربية said...

شكرا جدااا شرفت مدونتي البسيطة بزيارتك
و مدونتك تحفة بتموت من الضحك
ألف شكر

شوشو said...

جزاك الله كل خير

انا فغلا مشفتش الصور دى قبل كده

وجزاك الله خيرا مره تانيه

شوشو

عرب بس said...

مدونتك راااااااااائعة ومفيدة .. اسأل الله لك التوفيق

أتمنى منك زيارة مدونتى والتعليق فيها وإبداء رأيك
عرب بس http://arabbas.blogspot.com

safa7_karmooz said...

مين راح فين بس

اتقل كده وخلى بالك للشاى يتحرق عالنار وبعدين الرز يطلع وحش

نايس بلوج

وربنا يقلل بهدلتك فى الارض كمان وكمان :D

^_^

مشخبطاتي said...

ايه دا؟!
هو أنا ماعلقتش..!!
طب تصدق بإيه يادكتور..انا قريت البتاعة دي أكر من تلت أربع مرات ومفكر نفسي علقت طلعت لا علقت ولانشرت حتى..

لكن يالا..
التوهان وحش بعيد عنك والواحد لما بئى عاطل بئى بينسى كتير أوي..!!

أبو مصعب said...

انت يا عم انت ؟؟؟
ايه الكلام ده كله ؟ ؟؟
انا هموت على نفسى من الضحك

وبالنسبة للتدوينة بتاعت المسئول بتاعك
شكلك خارب الدنيا وتستحق التعذير
اعترف
اصل انا طلع عينى من الاخوة انا كمان

إـّنا نسخرُ مـنْ الهم ّ
تحظر المدونة على الإخوات الكبار
يكتبها مراهق,
(هذه المدونة)
♣ لكل إنسان جعل من غمه ضحكة يضحكها الناس..فحبب إليهم فضفضته
♣ وإلى من سخـِر من همه, فهانت مشاكله .. وأصبحت ذاتها حل وراحة لمشاكل الناس
♣ لكل أب سمع ابنه وصدقه وكتم سره وطبطب على كتفه وضمّه
♣ لكل من له شعر صدر ..
♣ إلى الصينيين والأفغان وكل من في آسيا ..لقد نسبت إليكم أكثر مما أنسب لبلدي
♣ لكل مراهق
♣ هدية لكل أخ صغير ..أتى للدنيا كرد فعل لزينة الحياة الدنيا ,بعد ما شبع الأب من الخلفة بإبنه الكبير ..الظالم,فاعتبر الأب ابنه الصغير قضاء وقدر

.

.