مـجلـس نوم الجـامعـات .. ووزارة الشخير العالــي





أروع ما لقيت في التعليم المصري , وخصوصا الجامعي .. وجود أوبشـن النـوم في المحاضــرة

وبالأخص (جمع خــصة ) من يجلـس بـآخـر المـدرج
وقد لقـيـت أن لـنـوم الـبـينـج طعم آخـر ,,
على صوت الدكتور الذي غالبـا لا يكون مـُدرك ما يشرحـه فهـو يشرح ما لا يفهم .. ومن حولـه يكون حشـاياه الذين يسيرون على منوالـه , ليس في منوال الشـرح وإنما المنوال التاني في عدم الفهم أيضـا .

دخلت لنا دكتـورة ,وكانت هذه على غـيـر العادة من زملائها (ليس لأنها هاف أوبشن) ولكني أقصد من حيث تردد الصوت المسرسع , فلم استـطع الخـلوود إلى نومـي في حضــرتها الشريفة فكانت (مزعجة جدا) , ووصـل بها الأمر أنها حبستنـا رهينــة وبدأت بعرض المطالب , وغـلــّقت الأبواب (أبواب المدرج) وقالت ( أنا لكم ) .. لـيس ما تفهمون {بلاش النوايا السيئة دي} .. ولكنهـا تقصد ..:: يا أنا يا أنتم ,
وضحكت ضحكتها الشريرة المعتادة نياهاهاها التي تردد صداها في أجواء المدرج
وعندما سـولــَت نفس أحدهـم لترك المحاضرة والضيـق ذرعـا ً بهـا ,,
كشرت السنيورة قصد الدكتور عن أنيابها الحـُمـر ,ونزلت من ع المنصـة وبسـرعة النِمـس لحقت بذلـك الشاب المتهور من قـفاه ولكنه فضـّل الاستشهاد بشرفه خير له من الوقوع بين فكــّيها ... فـ لاذ بالفـرار (جمع فار ) .. 
جـِري يعني قامت الدكتورة أخدت نـِمَـرُه (أقصد اسمُـه) وعزمت على سحـب رخصـُه.. ومنعه من التجريش في المدرج وحرمانه من دخول الحمام .. قصدي الامتحان !! وقد أكـدت سيادتها على عزمها الدامي الوطيـد(مش عارف يعني إيه) بعد أن أقسـمت بالغالي (الشرف) بأخذ الغياب في المحاضرة للمتين وسبعين طالب بحالهم ..

حتى يصير ذلك الشاب الأرعن الأهوج عـِبرة لكل من تسول له نفسه هتـك عرض المحاضرة .. ومطاوعة نفسه في الرغبات الانسانية .. فليتعلم الجميع الكبــح .. والصبر ,, وقد كان ذلك على مسمع ومرأى من المدرج كاملـُـه الممتلـيء على بـَكرة أبيه وأمــه وإخواته الصغـيريـن,, وإذا ثم إنما ذلك يتنافى مع سياسة (جمع مذكر سايس)التعليم المفتوح ,والذي يقتضي بوجوب ترك باب المدرج مفتوح لاستقبال إي معلومة من الخارج ,, كزعيق الموظفين ,,
وتلاعـُب الزملاء والزميلات أحياناً ,,بالألفاظ النابية (والله ما أعرف معناها)
وكمان برده للي يعوز يروح يعمل ببييه

اللـهـــم انـفـخــُـه,,


يريدون أن أحلق شعري..!!

ويحـَهـُم البـتــّة

الدكتور : يعني الواحد يجيله إكتئاب لما يبص للعالم دي , اللي عاملة زي الفرااخ الغرقانة
واحد ثالث : بص على فكرة بقه ,, دي حرية شخصية ,وأنا ضد إن حد يتدخل فيها,, وبعدين مش أحسن من القـَـرع برده يا دكتـــــوووز
الدكتور :قرع ..! بكرة تشوف لما أمسك حاجة بس في الكلية دي,,وكل الابراص الجعانة دي حـتـتـنـتـف
أنا: على فكرة أنا بحبك يا دكتور ,, وكمان أعرف واحد صاحبي بيحبك جدن ..إنت بقه كارهني ليه .!
أنا برده : وإنت ليه مزعل نفسك يا دكتور , يخربيت اللي يزعلك (قولت الجملة دي في وش الدكتور بحماسة شديدة لدرجة أن الدكتور ازبهل ..من صمتي لفترة طويلة ,لإني قلتهاله في سري ),,{ربنا ينفخك ياللي عامل زي الكلبة المطلــّقة}
الواحد التالت : طب ما هو على كده , فيه حاجات كتير المفروض تحصل في الكلية دي وما بتحصلش ,, زي مثلا الأناتــيم(جمع أُنتـم بضم الألف ..وهو القرين) المختلطين , التسكع أثناء المحاضرة لشراء السكاكر ,, أيها الوغد
الدكتور: ويحك يا صاح ,, دي لايحة جامعة ,, وبعدين قلتـلك : حتشوف لما أمسك منصب في الكلية دي حعمل إيه .؟؟
(أخرك تمسك نفسك يا أبو السيس,,برده قلتها بصوت عالى جدن , في سري )


بصوت عالي :(مش قوي يعني)
وبأنياب كاشرة خالص :روح يا بعيد إليهي تقــرع :(طبعا بصوت عالى رجرجني.. بس من جوّة)

,,انت برده مُـصـرّ على الإنكار يا سيد يا زبيبة
,ربنا يرحمنا منك
يارب نكون وقتها اتخرجنا , واعمل اللي انت عاوزه ,, يا دكتور ,,,سيــد

,,
,, دار الحوار بين سكشننا (السكشن بتاعنا يعني),, ودكتور اسمه سيد (مش عارف عدا من الرقابة إزاي ..:: فيه دكتور جامعة اسمه سيد !!!)

كان الدكتور سيد مش عاجبه شكلي ,, قال إيه عشان شعري هايش ونايش ,, وبيقول بغييظ واستنزاف
لقواه العصبية (وهو مشيرا بسبابته على وجهي .. وشـّي يعني):: واحد زي ده شوفوا ما حلقش شعره من إمتى !!

الواحد التالت : يا دكتور ما هو لو حلقـُه حيكون شكله أوحش من كده (ماشي يا تالت , حعديهالك)
الدكتور : يعني إحنا بقه يجيلنا إكتئاب لما بنبص في وشه (وجهه,,يعني)؟؟

سلامة نفسيواتك من إكتئاب الشـَعر يا سيس (دلع سيد),,وبعدين خلينا صـُرحـاء . اللي زيك يا ذكتور ما يجيلوش إكتئاب ,دا يجيب للإكتئاب إكتئاب ,ويبعته يحترف بره ,
وهنا دار الحوار كما في الأعلى

ولعل الحوار قد قطعت منه حتت (جمع حتة) كتيير ,فإليكم الايضاح
الدكتور سيد (اللي هو عدا من الرقابة ) مش عاجبة الناس اللى بتلبس كاب ,, أو مطولة شعرها
وعـُقدته في الموضوع أنهم (المدرسين ) كانوا يكدرونه في زماان الابتدائية ,, فبيطلعـه علينا الدكتور سيـّس!
وأنا حاسس إن الموضوع ما هو إلا حقد طبقـي ,, لأنه الصراحة ما عندوش شعر ,,وكان بيتكلم بفظاظة ,

ولو يعرف أنهم كانوا بيحطولي كريم على شعري وأنا في بطن أمي (مامتي يعني),, وما تسألش إزاي

ويوم ما ولدوني ,, من حلاوتي فلقت القمر , أقصد فلقت الدار ,اللى كنا عايشين فيها ,, لإني (بجد) نزلت من بطن أمي بسقف الدار ,, أيوة لحظة الولادة أخدت سقف الدار ونزلت ,
ومن يوميها حرموا يخلفوا من بعدي .وعلى رأي أمير الشعراء (أحمد رمزي),,

([ياللي من حلاوته فلق القمر ..... وحرق دم أبوه لحد ما انتحر] )
،

المهم الدكتور سيــّد (الأقرع) : أو اللي من غير شعر ::بصـّلـي بـَصه (زغرة) قبيحة ,تحمل أسمى معاني الحقد ,
قومت بقه خارج عن شـَعري (قصدي شعوري .. جمع شعر)
وبعدين يا دكتور سيد اعمل اللي انت عاوزه ,,
وابقى خللي الكلية تنفعك يا مااااان ,,

حتروح من ربنا فين ؟؟

حتـتبـرّص يا دكتور ,, وماحدش حيعبرك ,,وبرده مش حيبقالك شعر
,,يعني حتعيش أقرع وتموت برده أقرع,,

اعمل حاجة صالحة في دنيتك وما تمشيش ورا أهل القرف , يا سيد يا ابن بـهـيــجــة

،، وبعدين انت نسيت ,, نسيت يا دكتور زميلك اللي زعــّل طالب السنة اللي فاتت شفت حصله ايه ..!! (انطس في مصالحه يا دكتور) , ومابقاش حد عارف يعمله حاجة

على العـلـوم إنت حر وعلى رأي الشاعر امـرؤ القيــيء {{مش فاكر قال ايه , بس كلامك برده غلط يا سيد}}

وبعدين هو انت ما شفتش (فيلم الكرنك) ,, واللي اتعمل فيهم ,, مش حتتعظ ؟؟
حيطفوا السيجارة في صـِدرك ,, وتطلع دخانها من مناخيرك لحد ما تختفي


ومش بعييد
يعنــي ربنا حيغضب عليك وحـيـسـخـطـك أمين شرطة


... وتصعب علينـا بـقه ونقعد نـلمـلـك فـلوس,,ترضاها على نفسك وعيالك ؟!
،

وربنا يستر السنادي لإن القسم بتاعه أصلا أرخم قسم في الكلية كلها ,,, وما بيرحمش

والصراحة كلهم عاهات ,, واللى بيعملوه في الناس بيطلع عليهم , من كـُســاح , جــرب, واللى منهم يمشي يتخانق على روحه ,,
حتى موظفي القسم نفسه ,اتعـَدُوا منهم وعلى راسهم المعلمة (جسيمة),, وهي مدام بسيمة بتاعت الأدوات في المعمل , ست كفاءة ,كفاءة يعني ,, من أجلها تنهد الأرض هداً,عليها شخطة تخرر الواحد على روحه ,, وبعدين تخيلوا واحدة ست اسمها هريسة (ما قلنا بسيمة)حتكون عاملة إزاي يعني ..!!
وبعدين فيه بني آدم اسمه بسيمة ؟؟
بس كفاية بلاش غيبة وبسيمة أقصد نميمة,,


الرحمة شويـّة ..؟؟

حينما يكون الإنسان مستغرقاً في حـُلمه ,يتبرتع في جنات أوهامه ,,على السرير الطري ..بطانية تحتيه .. وأخرى فوقيه ,والأخيرة تشبه في ملمسها فرو الأرنب الحاف ,, غير اللحاف الحنون أعلاها
ولكن،
لا أحلام تدوم (على رأي الشاعر ),ولا بد للنعيم من أن ينقضي وهذا إذا ما حلّ موعد الاستيقاظ الثاني -بعد الاستيقاظ الأول لصلاة الفجر-للذهاب للكلية...

ولكن ,أين المشكلة ؟؟

هل هي في الكلية ؟؟..... لا ,, لقد سلمت أمرها لله,
هل هي في اللحاف ؟؟ لأ برده ,


تكونش في المرتبة ؟؟ ..لا أعزائي

سأقطع عليكم الحيرة ,, المشكلة تكمن في أعماق من يأتي ليصحيني..وإذن فالأمر ينحصر في إثنان


أبي وأمي
أما أبي ,فعندما يأتيني فإنه يبدأ بالنداء بصوت خافت , كصوت الضمــير ,,وأنا لا أحس بأن هناك أحدا ينادي ,,وإنما أشعربنغمة هادئة تدلك بنات أفكاري وتزغزغها ,, وينجح أبي في أن يغزو ستار الأحلام ,وأبدأ بالهذيان,فإن كنت أحلم ساعتها فإني أشعر أنه أصبح فرد من أفراد الحلم وأنه وصل لما أفكر فيه ساعتها ,فأبدأ بالحديث معه ,,وهنا
يا للفضايح
ربما يسمع ما لا يُحمد عقباه ,وهو حـُر لو سمع ما لا يرضيه ..!!
والأكثر من ذلك لو ما رضيتش أقوم معاه ,فإنه بقلب وبيتحول ,شخيييييط وزعيق على الصبح ,وكأنني ضربته في أفكاره ,فطرحتها أرضا ً

أما ,أمي الأم كلمة واسعة بما تحويه من ألفة ,, معزّة ,, محبة ,, أمّ(أ م م)
بحروفها الألف (السرير).. الميم (مخدة)..الميم التانية (مرتبة)


أنا أمي والحمد لله , ولا إله إلا الله ..والله أكبر
ولا حول ولا قوة إلا بالله ؟,لا تعجز أن تقوم بقدرتها أن توقظ الثعبان من شرنقته في بياتـُه الشتوي ,,ضربة صوت ولا ضرب النار ,وهنا لا أتجرأ على المماطلة في الصحيان (ما فيش هزار),,ولكن ربما ينقطع مع هذا الفزع وهذه(الخضـّة) سيل حلمي ,,

ورب صوتاً أصدرته أمي عن غيظ ,,,فهببت منتصباً أمام الحمام,معطياً التمام, دا إذا ما كنتش لحقت أوصل الحمام ,,وتسلل البلل لخوفي ,,ومن ثم للمرتبة,,ويحدث ما لا يُحمد شمُّه.!!
،
ولولا بس حرص الواحد على (بذر الوالدين) أنا ماكنتش قمت
بس ,, عقوود الوالدين ,, وحش قوي
والنبي وصىّ على سابع جار
برده

أما ثالثهم وهو أخي الكبير (عابدين) الي طلق طلقات صوته في الهواء ,,ومن شدة الغيظ ربما أنوي عدم الذهاب للكلية عمدا على إفزاعـُه لبراءتي.. وتنكشح اول محاضرة بعيدن (بعيداً)
وأخي الآخر ,, هذا وهو يوقظني أحس أنه يلومنني ويعتب عليّ في شيْ ما ..,لا أعرفه ,,لدرجة البكاء وهو يوقظني ,,قوم يا حبيبي ,قوم ياخويا ,, يا سبعي ,,

إـّنا نسخرُ مـنْ الهم ّ
تحظر المدونة على الإخوات الكبار
يكتبها مراهق,
(هذه المدونة)
♣ لكل إنسان جعل من غمه ضحكة يضحكها الناس..فحبب إليهم فضفضته
♣ وإلى من سخـِر من همه, فهانت مشاكله .. وأصبحت ذاتها حل وراحة لمشاكل الناس
♣ لكل أب سمع ابنه وصدقه وكتم سره وطبطب على كتفه وضمّه
♣ لكل من له شعر صدر ..
♣ إلى الصينيين والأفغان وكل من في آسيا ..لقد نسبت إليكم أكثر مما أنسب لبلدي
♣ لكل مراهق
♣ هدية لكل أخ صغير ..أتى للدنيا كرد فعل لزينة الحياة الدنيا ,بعد ما شبع الأب من الخلفة بإبنه الكبير ..الظالم,فاعتبر الأب ابنه الصغير قضاء وقدر

.

.