يومـُنْ عـظيـمْ









يوم ما إتولدت .. حقيقة مرصعة بالخيالْ
تذهب الكاميرا فلاش باك
ويأتي صوت الناي من بعيد ويقرب ..يقرب
والكاميرا جاية من جهة قفا اللي بينفخ في الناي
وتظهر صورة مدكور تحت السجرة ..(اللي هي الشجرة)
ورائحة نسيم البرسيم تزهو مختلطـُن بعبق الجـِلـّة
مع نعيير الجاموسات
وصورة زووم من بعييد لفلاحة تأتي من على طول الترعة في عز القيالة شايلة مشنـّة عيش وسـُرّه في منديل وقـُلة ميّه وتتمايل بخطاها
وعلى الضفة الأخرى فلاح تاني خالص (لسة صوت الناي شغال )
بيستحمى في الترعة على أنغام (سلّم عليّ ..سلّم عاالليّ ..لما قابلني وساالّمم عالليّ) وهي تداري وشها في كسوف حتى تصل لمصدر صوت الناي

بيزا:|العوافي يامدكور
مدكور:|بيزا ..ايه اللي جابك السعادي يا ولية
بيزا:|إهييه (أسلوب إعتراض) , يعني كان مين يجيبلك طقتك بعد الواد عليش ما راح الديش (الجيش يعني)

مدكور:|تسلميلي يا ست الستات ,ياما نفسي يا بت بيزا كده أجيبلك واد يشيل الحمل من عليكي ويكون سندي في الدنيا

بيزا:|هانت ..هانت يا خويا بس إنت إدعيلي
مدكور:|ألا إنت صحيح في الكام (يقصد في الشهر الكام )

تتورد خداها خجلن ..وتقول : يووه (أسلوب كسوف ) بجه (يعني بقه ,بس بالفلاحي)..

مدكور:| يا حلاوة يا ولاد على كسوف البنات يا ولااد ولا كسوف القمر ذاته
ويشرب مدكور من القُلة ويمسح الماء الباقي على فمه (بُقه يعني ) بكُم السديري اللي لابسه تحت الجلابية ويقوم متقــرّع ,,
ويكسر لقمة عييش ناشف ويعوصها جبنة قريش ويأكل بيزا
بيزا:| مدكور , ما توديني جنينة الحيوانات ..!
مدكور:| ليه كفاالله الشر
بيزا:|أصل نفسي هفاني أشوف السيد قشطة
مدكور:|مين يا بت السيد ديه ؟ انطقي يابت ..!
بيزا:| هااااه (اسلوب تناحة ) السيد قشطة ديه حيوان مائي ..بس ديه إسم الشهرة
مدكور :| مممم ما انا عارف يابت بس أني أني بختـبرك ,

عارفة يابيزا ,لما ربنا يرزقنا بحتة الواد اللي نفسنا فيه , أنا حخليه أحلى ولد في البلد بحالها ..زي أبويا الله يرحمه ما كان باسطني

(ترجع ذاكرة مدكور لوره ,,وصوته يبهتّ وتأتي موسيقى حزايني ,, ومن ثـَم تظهر صورة راجل بيبرّق على طول وشكله أجشّ (أبوه يعني) ))

كان يابت يا بيزا مابيقطعش فرض في الجامع (يجي صورة واحد قاعد بالأندر وير على المسطبة وعمّال يآكل في جعضيض ,,والناس رايحة تصلّي وهو موارب الباب ومأنتخ) , وكان يا بت حنيّن علينا بيخاف عليـّا من النسمة (تيجي صورة واحد بيودي إينه الغيط بالحمارة والجاموسة في عز القيالة ومن غير ما يركب الحمارة ..يمشي زيّها ,وصورة الواد بيعيط عاوز يلعب بللّي ,وأمـُّه بتبص عليه من فوق الدار وعينيها بتدمع عشانه وبتنظر نظرات غيظ لجوزها )

وكان يا بت مستت أمي ومهننها زي ما بعملّك وأكتر (تأتي صورة واحدة ست طايرة من فوق البيت بتقع على الأرض وبتصرخ ,,وجوزها اللي زقها واقف على السطع وجلابيته بيهزها الهوا زي بالطو سوبر مان وبيضحك ضحكة شريرة وفي إيده فاس)
*****
يستيقظ مدكور من غفلته ..ويقول : كانت أيام يا بت ,,الله لا يعيدها
بيزا:| أهـّااا (بردُه أسلوب تناحة) ليه بس يا مدكور , ببنا يجعل حياتنا كلها زي حياة أبوك الله يرحمـُه وأمك ,,
وهنا يدق صوت موسيقى تصويرية توحي بخطر قادم
مشهد آخر ,,
بالليل وحيث السكون فجأة تأتي صرخة في عز الليل تفزع البيت كله ..وتنتهي الحلقة الاولى وينزل التتر
ونكمل مع الحلقة القادمة .
..

....
.....
* الحلقة القادمة :
بيزا: واضعة يدها على بطنها أااااااااه ..إلحقوني ,إلحقني يامدكور 

يقوم مدكور مفزوع من النوم ويقول في نفسه :: شكلها كده بتولد ..! ألا تكون بتولد ..!!؟
ينزل مدكور ليوقظ أمه ,فتذهب أمه مسرعة لبيت الداية ,وتأتي بها مسرعة فتجد مدكور قاعد على أول سلـّمة في السلالم في الضلمة وحاطط إيده على خده ,فتطمئنه أمه :: ما تقلقش يابني إن شاء الله ربنا حيعوضك مادام إنت ما ظلمتش حد وبتحب الخير للناس , وهنا يحمـّر وجه مدكور وتأتي على ذاكرته (يوم ما ضرب الواد سماعين بالعصا عشان ما رضاش يغششه في إمتحان محو الأمية ..وراح سامملة البهايم (جمع جاموسة ) .... ولا ّ يوم ما سرق القصب من غيط الواد سعد اليتيم وباعـُه في المولد )

وهنا يقوم مدكور ليصلي ركعتين , لا إنت عارفلهم عنوان .؟,لا هما صبح ولاا عِشا ..
ومن غير ما يتوضأ
السلام عليكم ورحمة الله .. السلام عليكم ورحمة الله (قالها مدكور ..بيسلم من الصلاة)

- دي لازم تروح المستشفى (قالتها الداية)
مدكور:|مستشفييه .!!
* يذهب مدكور مسرعن للواد براهيم بتاع الكومبيل (يعني عربية بس بالفلاحي ) فيجـده شغاال على الدائري ,
فيعود ويفك الحمار من الزريبة ويـُركـّب بيزا ,,,فتولد على عتبة الحمار ...فيحملها مدكور هي والحمار (كشاعد عيان على ولادتها) ذاهبن بإتجاه المستشفى ,,وأمه بتجري وراه ومعاها كيس فيه هدوم وفرخة صاحية ..!
- يطلع النهار ,ومع صوت بتاع الأنابيب جنب المستشفى (صورة مدكور قاعد يآكل في سميط ,ومراتـُه بيزا بتنهش في فرخة مدبوحة ..بتقتلها)وصورة لواحد معدّي من جنب سرير المستشفى ساحب جاموسة ورايح بيها للدكتور ..
وتيجي الممرضة تقولّهم :: حتة ولد زي القمر (تأتي صورة مولود ..ياساتر يارب) ..فينظر مدكور لمراته بيزا باستعجاب ثم يعودان للأكل دون مبالاة ... .. .. ... وتنتهي الحلقة الثانية

* حنسميه إيه يا مدكور (صوت بيزا)
* أمـُه : جعيصه , على إسم سيدُه .
مدكور:|عنتر على إسم ظابط النجع .
بيزا:| لؤي على إسم هيفاء وجدي (عشان ما يتحسدش)

ثم يأتي فجأة صوت أجشّ غليظ وغير معلوم المصدر وله صدى صوت , يقــول : مدكــور ,, إتقى الله في عيالك وسمـّي الواد شحلول على إسمي ,يإما قلبي وصوابع رجلي غضبانيين عليك ليــوم العيــد .

وهنا تأتي الكاميرا على وش مدكور وهو صامت وفاتح بـُقـُّه (فمـُه يعني) ..ومِسهّم ..!
وفجأة يطرق الباب :
مدكور:|مـييــن ؟؟
اللي بيخبط
 : أني عباس أفندي من الوحدة الصحية , إفتح يا مدكور
(همس مدكور لمراته بأن تضع إبنه في حلـّة وتقفل عليه بالغطا ... أفلا يتحسد ..!!
مدكور:|مرحب عباس أفندي
عباس :ألف مبروك يا مدكور يتربى فـ صحتك وعافيتـك
مدكور:|عقبالك يا عباس أفندي ,,, ... ... وهنا تأتي موسيقى حزايني وصورة عباس أفندي مكشـّر ..( أصلـُه مش بيخلـّف .
ولكن سرعان ما يعود للمود تاني , حتسمــوه إيه إن شاء الله (قالها عباس أفندي),تتضارب الآراء وفي نفس واحد ينطق الجميع:
بيزا|: لـؤي
مدكور:|عنتــر
أمُـه :جعيصــه
عباس : خلاص يبقى نسميه (السيــّد ) على إسم الســّيد الرئيس ,,ويضحك ضحكة خبيثة (ههييهييهههييه)
,
المشهد اللي بعـدُه

بعد مرور أبيــس ,, أقصــد بعد مــرور ثلاث سنــوات
صورة ولد في الشـارع ,معفن قوي ,, وملحـْوِس ..وفي إيده طمطماية مش عارف يآكلها إزاي ,,
ولابس حاجة كده تقريين فانلة بحمالات (بس بتاعت بنات عشان الحســد)
ومش لابس حاجة تحت قصـادها ..لا بنطــلون ولا حـاجـة ..وماشـي حافـي وبيلـعب مع الحمـارة ,تقوم رفســاه موقعاه على الأرض .. ويقوم تاني زي الجـنّ ويرجع يعاكسها تاني ..(حتى الحمارة مش عاوزة تلعب معاه) .
تندهلـُه جدته من قدام الفــُرن البلدي : جعيصه ..تعالا يا ضنايا خدلك قبورة (حاجة كده بتتـاكـل ..إنتاج فلاحي ) يروح الواد يجري زي ذوات الأربـع
أبوه يشوفـُه : يندهلـُه ,,واد يا عنتــر خـُد ياله .. مايروحش الواد !
في نفس الوقت تطلـع أمـُّه بيزا تندهلـُه :: خــُد يا لـؤي تعالا أحمـّيــك ,, يجري الواد من أمـُّه مش عاوز يستحمى ..وتجري هيّ وراه في الشارع ,

وبكده استقر الجميع على اسم الواد .. وأصبح له كذا إسم ..دا غير دلـعُه الذي لا يمـُت ّ بصلة لإسمُه أساسن (أساساً )

وحتــى مشــهد آخــر , فلـكـُم مـنـِي أحلى بوســة ..... وموعــدُنا يــوم الزينة , بعد الامتحانات هادمــة اللذات .

صور من الريف

 ..



هذه الصورة في الأسفل ليست بيظانة .. إنما هو ضباب
وللعلم .. أنا مصورها بعنيا دول ..

8 اللي يتكسف من مدونة صاحبه مايكتبش فيها تعليق:

المتبهدلون في الأرض said...

شكر خاص ..وقبل التعليق

لناس .. ... جدن (مكان النقط كلام كتيير)

أشكر على وجه الخصوص

دكتور ستيته حسب
الله
المبدع تامر علي

الدكتور ياسر عبدالفتاح

وأخي الصغير سمو الأمير

والمشخبطاتي


والأخت منوش


وحروف

وغيرهم وغيرهن .. ممن أضاف مدونتي عنده ..وحافظ على دوام الزيارة .. دون مقابل مني

وأقدم أسفي على كفني .. (منعن(منعاً) من أخذ الثأر) وأطلب منهم الدعاء لي ربنا يعدي لمتحانات على خير .. وأراكم بعدين

MaNoOoSh said...

على فكرة الريدر عندى قليل الادب لانة لسة شايف البوست بتاعك حالا
بس شحيبر .. قصدى جعيصة.. شكلة هيطلع واد قممممممممممممممممر
اسلوبك جميل قوى على فكرة وبوستاتك بتهلكنى من الضحك
تحياتى ايها المتبهدل وربنا معاك فى الامتحانااااااااااااااااات.

سمكه واحده said...

تحفه اسلوبك جميل
يامتبهدل
والله البوست يموت من الضحك
ربنا يكرمك يارب ويوفقك
ومستنيش العيال التانيه اللي جت بعديه
ولا امه حددت النسل؟
تحياتي

تامر علي said...

أنا لما قريت البوست ده قلت أنت أكيد متأثر بفيلم الأرض (اضرب كمان يا عبدالهادي...اضرب كمان )
لكن بصراحة المؤثرات الصوتية والاخراج المسرحي للأحداث خلى للبوست طعم تالت:)

تحياتي وتقديري واشوفك بعد الامتحانات والبلح الأمهات وكل ما هو آت ...آت :)

ستيتة said...

انت تحفة تحفة
انا بنبسط أيما انبساط لما بتزل شيء جديد
لأن اغلب المدونات تديك هم تديها زعازيع
لكن المتبهدلون غير شكل

انا عاوزة اعمل المسرحية دي وأخلي هيفاء هي بيزا ومش عارفه مين طبعا مدكور ها نختبر الوجوه الجديدة يمكن يطلع شاب حليوة كده في كلية عملية وطلعان عينه من الأب واتنين أخوات ذكور هو البطل
وتبقى قضيت يا معلم
ههههههههههههههههههه

قال لؤي قال

مشخبطاتي said...

بعد مالفيت كده على كام مدونة وعدد 2 موقع وواحد منتدى وكنت هاقفل النت واكمل فى المشروع بتاع الدكتور محمد عبد الخالق رئيس مراجيح مولد النبى....قلت لازم أعدى عليك تكون ضفت بهدلة جديدة ولا حاجة وفعلاً لقيت الجديد كله...
.........
بما إنى فى الأرياف ممكن أقولك إنك بالظبط بتكلم على منطقة فى بلدنا تسمى الجرم-بكسر الجيم- وماعرفش يعنى إيه الجرم..

..ومنتظر الباقى بعد الإنطحانات وندعى لبعض بقى بظهر الغيب..وأسمع سلام..(الأرض لو عطشانة)

المتبهدلون في الأرض said...

السلام عليكم ورحمة الله

بحد أنا سعيد جدن بالتعليقات أكتر من إني حليت كويس في الامتحان النهاردة


وبجد أنا مش عارف أعتذر إزاي عن عدم التعليق .. للإني وللأسف ... متبهدل

المتبهدلون في الأرض said...

منوش .. ولا يهمك .. ما قليل الادب
إلا الشيطان



سمكة واحدة ,, لا لا لا تحديد نسل ولا حاجة .. الدور جاي



قصدك إضرب كمان يا مدكور .. إضرب كمان يا مدكور



دكتورة ستيتة .. أعتبر دي معاكسة .. ؟؟


منورة الاجواء يا دكتورة



المشخبطاتي ... شد حيلك يا هندسة .. وإدعيلي

إـّنا نسخرُ مـنْ الهم ّ
تحظر المدونة على الإخوات الكبار
يكتبها مراهق,
(هذه المدونة)
♣ لكل إنسان جعل من غمه ضحكة يضحكها الناس..فحبب إليهم فضفضته
♣ وإلى من سخـِر من همه, فهانت مشاكله .. وأصبحت ذاتها حل وراحة لمشاكل الناس
♣ لكل أب سمع ابنه وصدقه وكتم سره وطبطب على كتفه وضمّه
♣ لكل من له شعر صدر ..
♣ إلى الصينيين والأفغان وكل من في آسيا ..لقد نسبت إليكم أكثر مما أنسب لبلدي
♣ لكل مراهق
♣ هدية لكل أخ صغير ..أتى للدنيا كرد فعل لزينة الحياة الدنيا ,بعد ما شبع الأب من الخلفة بإبنه الكبير ..الظالم,فاعتبر الأب ابنه الصغير قضاء وقدر

.

.