الأم ... مهرسة


أنا : ماما
أمي :  -------
أنا : ياماااما 
أمي :  -------
أنا :ماما ..إيه بنده عليكي من زماان مش بتردي ليه

أمي :هو ليه أنا خلفتك ..مش عارفه ليه أنا مش مستريحالك

أنا : أه ..أي ..بجد وجعتيني ..بتتبري مني بعد العمر ده كله .,حقاً ..صحيح الدنيا كمثل الخيارة يوم في السوق ويوم في الشكارة
 بس على العموم ما تقلقيش .,هما حيلغوا الولد التالت ..وحتضطروا تلغوا واحد فينا أو تبيعوه وحتستريحي مني خالص


أمي : .. بعد الشر عليك يا حبيبي ومين بس يجيبلنا العيش لما البواب يكون مسافر
 أنا : خلاص ..! قلبي ...آه .. قيمتي عندكوا برغيف عيش ! وحاف 
أمي : لا لا ياحبيبي ما تفهمش غلط ...أنا ما أقصدش ..مش حاف والله P-:

أنا :لا لا كده اوفر دا بجد بقه أنا فكرتك بتعملي حبتين كده علشان عيد الأم .. لكن إييه مش كفاية ..حراام أنا عمري ماشفت أم بتعمل كده .. بقالي سنين قاعدلكوا في البيت آكل نايم قايم شارب ..عمري ما حرمتكوا مني ..كفاية إني مقضي عمري كله بذاكر ,واحد وعشرين سنة بذاكر وبس لما حسيت إنهم حيجوزوني مادة من بعد التخرج وحخلف كتاب .. يا ماما أنا بخاف ..بخاف أعوذ أرجّع تنزل معلومات أو أتف جـُمَل ..حارم نفسي من الحياة ..عشان دريم ..قصدي عشان رغباتكوا ..وهو أنا كنت بذاكر عشان مين يعني
أمي : إنت بتقول إيه يله ..وإيه دخل المذاكرة في الموضوع ..   ,غبي
أنا : هه ..أمال إنتي تقصدي إيه 
أمي : من يوم ماغيرت حلقة شعرك ..وحاسة إني مش عرفاك ..ودقنك  و...
أنا : من غير ما تكملي .,ولا أنا ..ولا انا بقيت عارف نفسي بعد الكلام اللي بتقوليه ده .. أنا مش أنا ..! قوليلي يا ملايتي ., وبعدين دقن إيه اللي إنتي بتقولي عليها ..أكيد تقصدي حد تاني ..أنا بقالي واحد وعشرين سنة ما طلعليش دقن ..البواب خلــّف إبنه بدقنه جاهزة ..وأنا اللي مصبرني بس شبه الشنب اللي فوق بُقي..تقوليلي دقن
أمي : ودا شنبك ده .,تصدق إفتكرتك  رسمه بالقلم ..قولي صحيح إنت ناوي تربيه ..!
أنا : وبتسألي ليه يعني ..عشان تعملي حسابه في الأكل
أمي : لأ يا هتلر .. عشان ما يبقاش لوحده في وشك وهو مش محصل شنب .. دا أنا حسبتك ما غسلتش وشك النهاردة فطلعلك
أنا : سيبك من شنبي دلوقت..بقولك كل سنة وإنتي طيبة بمناسبة يوم الأم ..وبالمناسبة السعيدة ديا أحب أقولك إني أنا نفسي في عربية 
..نفسي أعيش حياتي وأركب عربية زي بقيت البندمين ..إشمعنى يعني بقيت صحابي .,دا حتى السواقين عندهم عربيات 
أمي : صبرني يا رب .. اللهم إني أعوذ بك من الغباء .. عربية إيه يابو عربية .. مش لما تفلح وتتخرج بدل ما إنت فالح تقولي بقالي واحد وعشرين سنة بذاكر ..عملت إيه بالمذاكرة ..الله يرحم أيامنا كنا بننكفي على الكتاب ما نقمش 
أنا : مابتقموش ..حتلاقيكوا كنتوا بتناموا عليه ..وعملتوا إيه إنتوا بقه ..؟ تقدري تقوليلي اشتغلتوا إيه في الآخر .؟
أمي : ولد .. ما تغيرش الموضوع .. المهم إننا عملنا اللي علينا وكنا بنآكل الكتب أكل
أنا : للدرجادي كنتوا فقره ..ياحول الله
أمي : لا ياخفيف عشان كنا واعيين وناصحين .. مش بنسيب المذاكرة ونقول عوزين عربية .. أذكان إنت بتمشي نصك التحتاني سابق نصك الفوقاني بخطوة ..وبتمشي على كعب رجليك زي دكر البط ..,تركب عربية ليه إنت ..! روح الأول إعمل ترصيص وضبط زوايا لرجليك ..قال عربية قال ..!
أنا : في أم تعامل إبنها كده .. حرام عليكي إنتي خلفتيني زي بقيت الأمهات ولا رجعـّتيني من بقك ..
أمي : إنت يابني اللي أحوالك غريبة ومش عجباني ..وده مش من دلوقتي ..الناس كانت بتتخانق مع بعضها بتضرب بالقلم ..تحدف طوب ..أنا عمري ما كنت أتخيل واحد يتخانق مع أصحابه يعضهم من رأسهم .. دا إنت  متناهي الغباء ..طب نقي حتة طرية 
أنا : على فكرة بقه دي موهبة ..وإنتوا اللي كنتوا بتخوفونا بأبو رجل مشروخة ومنى الغولة اللي بتآكل العيال من دماغهم --
أمي :اسكت دا إنت دايما فاضحني براسك اللي عاملة زي كبوت العربية ..  وجسمك اللي عامل زي المسمار المتني ومشيتك اللي عاملة زي مشية  الإنسان الآلي ..بخاف لا تخلص منك الحجارة تقع تتكسر مانلقيش الكتالوج بتاعك ومانعرفش نصلحك.. فاضحني قدام صاحباتي ..قوم من وشي ..يافاشل

أنا : ياربي أأنا .. أنا بحلم ..ولا دي أمي بحق وحقيقي .. أنا شكلي نسيت أقول  أذكار المساء النهاردة .. اللهم إني أعوذ بك من قهر الرجال



13 اللي يتكسف من مدونة صاحبه مايكتبش فيها تعليق:

Anonymous said...

هههههههههههههههههههههه
هههههههههههههههههههههههههههه
هههههههههههههههههههههههه

لالالالالالالالالالا انت بجد فظيع

جامده جداااااااااااااااا
تسلم ايدك

ستيتة said...

مهما تقوووووووووووول
برضه ها تجيب هدية عيد أم
يا إما ها تدخل المفرمة
مش المهرسة بس :)

مش بمزاجى said...

ملهاش حق
كان المفروض حلت الكيس واديتك تجيب العربية

عاشقه الرومانسيه said...

كلللل ده علشان تهرب بالهديه
ده انت هتتعذب عذاب المسلمين الاوائل ايام فجر الاسلام ياابنى

مشخبطاتي said...

:)

منور ياتالت إخواتك..بس أمانة عليك وقت البيع عرفني علشان أخويا إياه(فاكره) هو كمان رقم 3 وعاوز أريحه وأريح المدرسة منه !

sony2000 said...

طب تصدق وتأمن بالله
كان لسه الدكتور عندنا بيقول عن الموضوع دا
ان فالحلم الامريكي 3 حجات
وظيفه وسياره وحساب فالبنك
ههههههههههههه
والسوال بقي اللي قالهولنا
ياتري الحلم المصري فيه ايه
قام الكل ضحك
وقال عااااااااارف
راح مذود وحده وكتب فيها .....
الزوااااااااااااااااااااااااج
ههههههههههه
بس بجد اسلوبك فكتابه البوست توحفه
تقبل مروري وتحياتي

رحلتنا في الحياة said...

هههههههه لاحول ولا قوة الا بالله
انت حالتك صعبة خالص اغيب اغيب وارجع الاقيك بتعانى فى العيلة دى
اقولك ايه ما تعرض نفسك لتبنى يمكن تلاقى حد ياخدك ويقدر قيمتك صح
وتبطل بقى قهر الرجال اللى بيعملوه عليك كل يوم ده :D

ضحكات الحياة said...

ههههههههههههههههههه
هههههههههههههههههههه

جامده جامده جدا
بوست تحفه و الله عاشت ايديك

لالالالالالالالالالا بس في الاخر هتجيب الهديه و الا هتكتبهالك تهرب تضريبي

Kiara said...

جباااااااااااااااااار ملكش حل بجد

موتنى من الضحك

زهور الامل said...

هههههههههههههههههههههه

لالالالا انت لازم تروح تتاكد انها امك بجد

بقى الام بقت مهرسة

يا نهار الوان مشجرة

كل ده علشان تهرب من هدية عيد الام
برضو هتجيبها
هههههههههههههههه

وحشني كلامك وبوستاتك جداااا


تحياتي

زهرة(جنى)الاسلام said...

السلام عليكم
ندعوكم للدخول الى شات مونتى يوم21/3/2010
تمام الساعة العاشرة مساءا
من اجل نصرة المسجد الاقصى

E-commerce said...

انت ممكن تضع اعلانات على مدونتك وتربح منها الاموال كما انا افعل فى مدونتى ادخل مدونتى وسوف ترى الاعلانات ممكن انت كمان تضع اعلانات وتربح اموال http://international-e-commerce-e-commerce.blogspot.com/
وهذا اللينك اربح الاموال ووضع عداد عالمى فى مدونتك
http://friendfinder.com/go/g1214733
ولما تعمل اعلانات تخش على مدونتى وتضغط على الاعلانات واربح الاموال وانا ادخل على مدونتك واضغط على الاعلانات وتربح الاموال

شوشو said...

ههههههههه

تحفه

ربنا يزيد ابداعاتك

إـّنا نسخرُ مـنْ الهم ّ
تحظر المدونة على الإخوات الكبار
يكتبها مراهق,
(هذه المدونة)
♣ لكل إنسان جعل من غمه ضحكة يضحكها الناس..فحبب إليهم فضفضته
♣ وإلى من سخـِر من همه, فهانت مشاكله .. وأصبحت ذاتها حل وراحة لمشاكل الناس
♣ لكل أب سمع ابنه وصدقه وكتم سره وطبطب على كتفه وضمّه
♣ لكل من له شعر صدر ..
♣ إلى الصينيين والأفغان وكل من في آسيا ..لقد نسبت إليكم أكثر مما أنسب لبلدي
♣ لكل مراهق
♣ هدية لكل أخ صغير ..أتى للدنيا كرد فعل لزينة الحياة الدنيا ,بعد ما شبع الأب من الخلفة بإبنه الكبير ..الظالم,فاعتبر الأب ابنه الصغير قضاء وقدر

.

.