0_0

الواحد خرج من رمضان السنادي سُخن.. ومتظبط ..ومعاهد ربنا إنه هيحافظ على أخلاقه..
فروض وأذكار ..والدعاء وقرآن ..كده تمام وربنا يبعدني عن مفسدات الأخلاق ,للواحد نفسه ضعيفة
أنا  نفسي دلوقتي الحمدلله مفتوحة قوي أقرى قرآن ..
 وعشان ما أملش من القراية لازم بقه أظبط نفسي وأروح حته تفتح النفس ..البلكونة مثلن ., ولا أروح الريسبشن ..!!
لا لأ.. خليني جنب أخويا وأمي ..شكلهم قاعدين بره بيتكلموا ف حاجة مهمة ..
بس تفتكر مش هركز من كلامهم في القراية .!
..لا لا روح وخلاص وأهو لو ضاع منك ثواب الخشوع والتدبر في القراية ,ماتضيّعش ثواب الغتاتة.


إيه ده .. أخويا بيكلم أمي عن واحد شكله متضايق منه قوي وعينه مفتوحة لحد بُقه من الغيظ .. دا مين ده اللي -الحمدلله- مطلع عين أخويا " حبيبي " الكبير ..دا إلا الأخ الكبير يا جماعة ..كل واحد ياخد باله من أخوه الكبير بتاعه ..
الإنسان لازم ....  بأخوه الكبير ,وإلا ماينفعش يبقى بالضبط  زي الناس الوحشة اللي يشتموا بعض بألفاظ قبيحة عاليوتيوب.
بصوا أنا هقرا أنا القرآن وماليش دعوة بيهم.. بسم الله الرحمن الرحيم :
))صورة واحد بيرمي ودانه((
أخي بيك الكبير:(أصله قليل الأدب يا ماما ..وإنتي مدلعاه ,دا مابيسمعش كلامي .,آدي ابنك الصغير)
(إيه ده .. سامعين اللي أنا سامعه ,الكلام ده مش غريب عني ..,يابني ركز في القراية
أخي بيك الكبير :(أمال لو ضغطت عليه يعمل حاجة غصب عنه ,يعمل فيا إيه ساعتها)
(فجأة لقيت صوتي عِلِي لوحده ووصل للآية  :( فطوعت له نفسه قتل أخي ..فقتله )


أخي بيك الكبير :(إمبارح بقوله قوم إعملي شاي ..يبصلي بقرف ويقولي :, و إنت سلامتك .. مكسح., هلب يور سلف )
:(والله لو عمل معايا كده تاني أقتلهولك من الضرب)
أنا :(يا أيها الذين آمنوا كتب عليكم القصاص في القتلى )
أخي بيك الكبير: لأ يا ماما دا مش أخويا ده ..أنا مش عاوزه إديه لحد تاني
أمي: هو عصير ..! لأ يا حبيبي طب أنا هثبتلك إنك فاهمه غلط.
أمي بتنده عليا : خد حبيبي تعالا
أنا :صدق الله العظيم .. أيوه يا ماما ..بصّي طالما إنتوا الاتنين قاعدين سوا يبقا أنا مش مطمّن .
أمي : استنى بس هقولك 
أنا : أنا عارف إنتي عاوزة مني إيه 
أمي : خد يابني اسمعني ..عيب كده ,طب تعالا أعلمك طريقة تخرج الدبان برّه من غير ماتفتح الشباك
أنا : دبان إيه ..؟! إبعدي عني ياست إنتي 
,تعود أمي لأُذن أخي الكبير
أمي : يا حبيبي ما تزعلش منه ,مش كده دا أخوك الصغير وبيتدلع عليك 
(سبت وداني معاهم .,وعملت مشيت)
أخي بيك الكبير : لا ياماما دا مش ممكن .. دا لو الواحد إتزنق في حاجة من عنده وأخدها من غير إذنه يعمل فيا إيه ده؟!! 
أنا :(فاقطعوا أيديهما جزاءً بما كسبا نكالاً)
أخي بيك الكبير :ولو الواحد في يوم إحتاج لحد ولو إتزنق في حاجة هيعمل إيه؟
أنا :أعوذ بالله من الشيطان الرجيم  بسم الله الرحمن الرحيم (يوم يفر المرء من أخيه)
أمي :يا واد متقولش كده دا أخوك الصغير ,طب ما أنا هحتاجه برده لما يتقدم بيا السن..هتشوف هيعمل معايا إيه دا إبني
أنا : (وأمه وأبيه)
أمي :بتقول إيه ..!!
أنا : (بسم الله الرحمن الرحيم " وصينا الإنسان بوالديه حملته أمه وهنا على وهن")
ثم يعلو صوت التلفاز بصوت مشاري :(ولا تجسسوا ولايغتب بعضكم بعضا)
أنا : صدق الله العظيم .

إـّنا نسخرُ مـنْ الهم ّ
تحظر المدونة على الإخوات الكبار
يكتبها مراهق,
(هذه المدونة)
♣ لكل إنسان جعل من غمه ضحكة يضحكها الناس..فحبب إليهم فضفضته
♣ وإلى من سخـِر من همه, فهانت مشاكله .. وأصبحت ذاتها حل وراحة لمشاكل الناس
♣ لكل أب سمع ابنه وصدقه وكتم سره وطبطب على كتفه وضمّه
♣ لكل من له شعر صدر ..
♣ إلى الصينيين والأفغان وكل من في آسيا ..لقد نسبت إليكم أكثر مما أنسب لبلدي
♣ لكل مراهق
♣ هدية لكل أخ صغير ..أتى للدنيا كرد فعل لزينة الحياة الدنيا ,بعد ما شبع الأب من الخلفة بإبنه الكبير ..الظالم,فاعتبر الأب ابنه الصغير قضاء وقدر

.

.