بكره الإخوات الكبار

منه لله اللي ابتدع إن يكون في كل بيت شاي وقهوة .,
  أنا إنتاجي من الشاي والقهوة غلب كوستا وشيلـنترو
أبويا ما بيصدق حد يطلع من أوضته ويصطاده عشان يعمله شاي أو قهوة ,أنا مش فاهم بدل مرارة الانتظار ليه ما يقمش هو ويعملها  ... أنا رفعت في البيت ِشعار "هلب يور سيلف" ..فرفع أبي عشرة جنيه عقب كل فنجان ..فأسقطتُ شعاري وأعلنت خير الناس أنفعهم للناس

صحيح إنه لشعور حميد حينما تجد ما تحتاجه أمامك بغير مجهود أو أن تستريح بينما يتعب غيرك.. لأجلك,..على الأقل أنك لن تندم إذا وقعت أو طلعت وحشة .. ف وأنت قاعد ما بتعملش شيء حد يجيبلك الأكل ..ويجيبلك ملح لإن الأكل كان ناقص تلات حبات ملح ..ويروح يرجع الملح تاني المطبخ لإنك مش حتحتاجه تاني ..وهو هناك بالمرة يجيبلك ماء ساقع ..وياريت تحطلي حبتين من الثلج .. في المج بتاعي .. والأدعى للانفجار أن يختمها ب" لو سمحت .. الله على ذوقك ..
أعرف واحد صاحبي يزعل جدن لو حد غيره قام عمل شاي ..أتمنى أن يعثر على أبي وأن يعثر أبي عليه ..سيحبان بعضهما كثيرا وهما الآن يحتاجان لبعضهما




بعدما بدت حركاتنا في البيت تؤدَى كدبيب النمل لئلا يسمعها الأب فنفتح نفسه فجأة ولا حول ولا قوة إلا بالله ويعوز فنجان قهوة .. ويختم طلبه" أصلي ما شربتش النهاردة بعد المغرب ..ولعل منبع ذلك إنما هو إحساسه بالتقصير في حق الكنكة أو إن ممكن الكنكة تضمر من قلة الاستعمال .. خُضت أنا كل التجارب المضادة والمكافِحة., من وضع الملح بديلاً عن السكر ..ومن عمل القهوة تمام والتعثر أمام قدم والدي فأسكبها عليه ..وأيضاً أختمها بـ "سوري داد"أو أن أسكب وش القهوة ..والتي لا يشربها أبي من دونه ..أمام عينيه  طلباً لسد النفس ومدعاة للتحسر والإعراض ..ومن وضع القهوة بجوار الكمون ..ولكن يبدو أن ثقته بي لا تنتهي .. وليتني علمت ما فعله أخي الأكبر لينجح في أن يجعل أبي لا يفكر البتة في طلب القهوة منه  .. فبالاختصار هو يُعد لأبي كوباً بُنياً به عذابٌ أليم ٌ.


وطالما أتت سيرة أخي الأكبر .. ولأن أبي هو أخاً أكبر ..فإن لنا في حياتهم باع .. وب أدوارهم فقد خضنا سوياً شوطاً مديد ..

أنا مرة يعيني حبيت أستقيم بقه وأهتدي وكنت ساعتها في أولى إبتدائي وكنت بفتري كتيير في عمايل الـ..... على السرير وتعبت امي بصراحة وحبيت أكفـّر وأتوب وقررت أصوم يوم من رمضان ..
رحت لأخويا الكبير أسأله عن إزاي أصوم عشان ينورني ويفتحلي طريق الاستقامة .. الظالم قالي بص , إنت ما تكلش حاجة خالص ولا تشرب ولا تبلع حتى ربقك وماتتنفسش كتيير ..فضلت طول اليوم أتف وأشهق لحد ما أمي شافتني .. وأول ما شفتها إستلقيت على رجليها (موسيقى تأثيرية .. وإبطاء سرعة الفيديو) ورمشت بعيني وقولتلها سامحيني ..(لسه الموسيقى شغالة + الحركة البطيئة) أنا خلصت عصير المانجة كله .

وفي يوم مسكني قال يعظني ..لما إتخنق من شكوتي لبابا منه لما هو يدايقني.. قعد يحكيلي عن ناس غلبانة وهدومهم مقطعة ومش لقيين يآكلوا وإني لو ما إديتوش فلوسي ربنا حيخليني زيهم ويوميها أخد فلوسي اللي محوشها كلها ليه ,حتى سندوتشاتي الله يهبله أخدها وراح أكلها هو وصحابه .
ودا غير يوم العيد لما كل واحد أخد مصروفه راح سلطني انا وأخويا إننا نجيب شيبسي وكراتيه وإننا ما نبقاش بخلا عشان حرام ونآكل كلنا لإننا إخوات .. وبعد ما أكل الطفس الضلالي جري على بابا وإدحلب وقاله :يا بابا انا حوّشت مصروفي كله والعيال دي راحت إشترت بمصروفها شيبسي وحاجات من اللي بتوجع البطن وقعد يحلف إنه ياما نصحنا وإحنا هجرنا نصحه القويم إبن التيييييييييييييييت .
   
         وهو من يومه كده أبويا كان بيدينا مصروف الشهر تيجي آخر الشهر تلاقي معاه قد المصروف مرة ونص أنا أصلاً شاكك فيه وباين عليه أصلاً , كان بيمسك البت بنت عمي الصغيرة ويحاول يقنعها إن الربع جنيه أفيد وأحلى من العشرين جنية عشان عارف إنه لازم يديها مصروف .. ولما يلاقي إن البت حتروح تقول لأبوها إنه إداها ربع جنيه وشكله حيبقى وحش يروح يقنع أخويا التاني إنه برده يديها ربع جنيه عشان يبقى زيه ولما اخويا يفهمه وما يوافقش يتخانق معاه ويقطع من لحمه خمسة جنيه يديها للبت ويخليها تشتري حاجات ويقاسمها في أكلها 


      في يوم عزمت الانتقام لإنه دايقني ودخلت أوضته وهو مش موجود وفتحت دولابه لكي أحط من برفاناته المتعتقة, لقيته مليان لبان تشكلتس منتهي الصلاحية وكنزات حاجة ساقعة بتصميمات قديمة جداً و شرايط  حبوب أدوية كتييرة جداً لكل حاجة لكل أمراض الجسم أصله بيخاف على نفسه مووت وعايش في الدنيا ضامن حقه إيشي صداع وإيشي إسهال  وإيشي لآلام الظهر والولادة D:  ربنا يجيبله تبول لا إرادي ومايكنش معاه علاجه 

يُحكى أنه كان في إمتحان ومزنوق تقريباً في الورقة كلها ونفسه وزته على الغش., قام بسبس لواحد صاحبه قاله إديني إجابة السؤال التاني ب,ج ومش مهم أ .,صاحبه قاله ماشي بس أنا مش عارف السؤال التالت .,حديك اللي إنت عاوزه لكن تديهوني.
أخويا قاله ماشي ,راح صاحبه كاتبله إجابة السؤال التاني ورامي الورقة لأخويا .أخد أخويا الورقة وكتب الإجابة ..وجه الدور على صاحبه .. قام قالب الورقة اللي صاحبه بعتهاله وكتبله (والله العظييم ما أعرف حاجة في المادة ) ..وراح راميها لصاحبه تاني ., صاحبة كان متشوق للإجابة ومستني الورق .,وأول ما فتحها  وقرا اللي فيها وشه إحمر وبص لأخويا بغييظ لقاه مش قادر يمسك نفسه من الضحك . قام المراقب لاقط أخويا .. قاله : بتضحك على إيه يابني بص قدامك .. أخويا : فضل يضحك .,المراقب إفتكر إنه مش طبيعي وسابه ومشي ,,بيفكرني بـ ابن البواب لما بعت ابنه لأخويا يحلله واجب المدرسة,وكان في الحساب عن الأكبر من والأصغر من ,أخويا عارف إن الواد ماشي ببطنه والحاجة الوحيدة اللي إتعلمها إنه إزاي يآكل: بيقوله يابني معاك تلات برتقانات في إيد,وخمس برتقانات في الإيد التانية أنهي الأكبر .!! مايردش ,طب تآكل أنهي فيهم ,الواد قاله:أكلهم كلهم.
   أخويا دا كان بيقعد يحكي لصحابه على قصص من خياله عن النهايات المأساوية لناس كانت بتذاكر وإزاي القدر إنتقم منهم .. قال يعني بيخوفهم من المذاكرة وعاقبتها السوء عشان ما يذاكروش ويكونوا أحسن منه ويلم أصحابه ويقنعهم إنهم يطلعوا الرحلات معاه ويأكدلهم إنه طالع ..وقبل الرحلة بيوم يقلهم  مش طالع .., عشان بكده يكون خدعهم وضللهم وضحك عليهم ومذاكروش وبكده ما يكنش حد أحسن منه .

على العموم كل الأخوات الكبار كده ..ظلمة ..وبيبقوا أخدين اهتمام الأب كله وبيخلصوا على فرحتهم بالعيال ويتظلم الصغيرين ..بُص لأي مصيبة في التاريخ حتلاقي أكيد سببها أخ كبير وإن مالقيتش دور تاني ..وإن مالقيتش يبقى إنت أكيد واحد منهم  ..آه قول ما تتكسفش إنت أكيد أخ كبير ..وظالم ..يا ظالم




أنا حقوم بقه كفاية أصل ميعاده على الكمبيوتر جه والصراحة لما بيجي وانا قاعد بحس إن قضائي حان وإن أجلى أشرق .
 بس قبل ما أقوم ياناس
أنا جبتلكوا صورته بنفسه عشان تتعرفوا عليه أكتر .. ولبسته أحسن ما عنده .. وحتلاقوه هو اللي بيشاورلكوا في الصورة ده


ويحتل أبي_العزيز..زيز ..زيز_ مكانة مرموقة ضمن أحلام السادية ومخططات السيطرة والتحكم قد تتفوق علي من يحاول تجميد الكرة الأرضية ضد الفتيات الخارقات أنا مش هقول حاجة, يروح إليهي المحقق كونان يقبض عليه
بس.. هو ده اللي عندي للإخوات الكبار والأبهات ..أما الأم ..فالأم شيء عظيم ,الأم ..حاجة حلوة خالص .,لهن فلسفتهن الخاصة في الحياة وهي (روح ذاكر هي المذاكرة بتخلص يا فاشل) .. إلي ..(حط الرز السخن على الطبيخ البارد وهما يسخنوا بعض .,ماتسخنش الإتنين سوا وتملالي الحوض مواعين).

9 اللي يتكسف من مدونة صاحبه مايكتبش فيها تعليق:

زهور الامل said...

ههههههههههههههه
قسما بالله ما شوفت في خفة دمك حد

على فكرة انا الكبيرة ومش ظالمة خالص وحياة ربنا
بالعكس انا الظلم كله واقع فوقي
ومن كتر الظلم اللي انا شايفاه وتحمل المسئولية نفسي اطفش واسيبلهم البيت

وكمان اختي لازقة على الكمبيوتر وبقومها بالعافية ودلوقتي انا ما صدقت انها نزلت تجيب لبن وقعدت مكانها واول ما دخلت من باب الشقة قالتلي قوووووووووووووووومي ده ميعادي
ههههههههههههه شوفت بقى
ظلم في ظلم

بس بجد البوست جاااااااامد

وعلى فكرة زعلانة منك ومفتقدة تعليقاتك عندي جداااا

تحياتي

هراء لا داعى له ..... said...

إنت فظيع

كوميديا تلقائية

سمكه واحده said...

هههههههههههههههههههههههههههههههه
عسل عسل عسل
وربنا عسسسسسسسسل ياناس
هو يُعد لأبي كوباً بُنياً به عذابٌ أليم
موتتني من الضحك
لا كل كلامك انا متخيله كل كلمه وكل نظره وكل حركه يخرب عقلك بجد انت فوق الفظيع والله وعسل يابني عسسسسسسسل
لما باجي هنا بغير منك وبحس اني دمي تقيييييييل اوي بالنسبالك وست زهور الامل بحالها شهدت بكده وانا بعتز بكلمها جدا وهي من الناس اللي بتفهم اوي ياله ياعم ابسط
انت بجد مبدع
بقلك ايه
البوست ده من اقرب البوستات لقلبي بجد
هو احنا قريب ولا حاحه!!!!!!!
ولا دي توارد افكار
انهارده المغرب كده بابا قالي اعملي شاي يابت ياسمكه
وانا اصلا قرفتهم كلهم وبعمل شاي ميتشربش بس باين ابويا بقي عنده امل انه يغظني اكتر ممكن ميشربوش بس اعمل بردو
بقيت هعيط والله قلت في سري وانا بجيب الشاي يارب بقي يمنعوا الشاي يارب يحرفوه يموتوه يمنعوه ويمنعو استيراده لو كان بيسترود ولا زرعه ولا اي نيله
انا من الحجات اللي نفسي تتغير في البلد انه يمنعو الشاي وكمان الي يشربه ياخد غرامه او اسرته تشتكيه في الشرطه

واخوك كان بيعطشك ومش بيخليك تتنفس
منه له
وانت شربت المانجو كلها ياله ياعم بالف هنا مطرح مايسري يمري

متغبش كتير كده
اصل لما باجي هنا بحس ببيتي التاني
(.

دمت متألق وزي العسل وخفه دم وابداع في كل شئ
ربنا يحفظك

تحياتي

safa7_karmooz said...

تكونشى انت انا؟؟

كيــــــــــــارا said...

ههههههههههههههههههههه فقر فقر

منا اخت كبيرة مش بعمل كووووووووووول دا ليه

احاسيس آيوشه said...

هههههه انت بتعصب عليا كل مرة اكتر من المرة اللى قبلها وبقول الحمدلله انا فى نعمة والله
ربنا يعينك على البيت ده ويعينك على اللى فيه
بس مش كل الاخوات الكبار ظلمة بالعكس بقى انا اصغر واحدة واكتر واحدة مفترية فيهم :))

ويكيبيديا الإخوان المسلمين said...

السلام عليكم ورحمة الله وبركاته

ويكيبيديا الإخوان المسلمين الموقع الرسمي الرابع لجماعة الإخوان المسلمين .

http://www.ikhwanwiki.com

الموسوعة الحرة التي يستطيع الجميع تحريرها وهى تسع جميع الآراء ( السياسية – الاقتصادية – الشرعية – التنموية - ....وغيرها) .

وإهتماماً منا بدور المدونين البارز في علم الإنترنت تم تخصيص قسم خاص بالمدونين على الموسوعة هو قسم " مدونون ومدونات " .

سجل الأن وأنشىء صفحة خاصة بمدونتك على الموسوعة في قسم " مدونون ومدونات " يعرض بها جميع ما تحرره من مقالات ومشاركات .

معنا تستطيع نشر أفكارك ومقالاتك ليقرأها أكبر قدر ممكن من القراء والباحثين فالموسوعة تعد مصدراً كبيراً للبحث العلمي.

وقد يتم ترشيح مقالتك لتكون مقالة مختارة على الصفحة الرئيسية للموسوعة .

فى مجتمع الويكيبيديا يمكنك التواصل مع عدد كبير من المستخدمين والمدونين والكتاب المشهورين .

شاركنا من أجل الإفادة والإستفادة .

لمزيد من المعلومات عن كيفية الإشتراك في الموسوعة وإنشاء صفحة خاصة لمدونتك يرجى زيارة الموسوعة والإطلاع على قسم مدونون ومدونات .

http://www.ikhwanwiki.com

واحد؟؟؟!!! said...

سلام عليكم

ازيك يا ziee

حبيت اشقر عليك بس ...لو عايش رد


واحد؟؟؟؟!!!!

زهرة(جنى)الاسلام said...

السلام عليكم
ندعوكم لمشاركتنا حملة إصلاح الجيل من أجل التحرير .
(حملتنا حملة أفعال مش بس كلام )

ونرجو منكم وضع لوجو الحملة فى المدونة

والتفاعل مع الحملة

ونفع الله بنا وبكم الأسلام والمسلمين
http://forelaqsa20.blogspot.com/

إـّنا نسخرُ مـنْ الهم ّ
تحظر المدونة على الإخوات الكبار
يكتبها مراهق,
(هذه المدونة)
♣ لكل إنسان جعل من غمه ضحكة يضحكها الناس..فحبب إليهم فضفضته
♣ وإلى من سخـِر من همه, فهانت مشاكله .. وأصبحت ذاتها حل وراحة لمشاكل الناس
♣ لكل أب سمع ابنه وصدقه وكتم سره وطبطب على كتفه وضمّه
♣ لكل من له شعر صدر ..
♣ إلى الصينيين والأفغان وكل من في آسيا ..لقد نسبت إليكم أكثر مما أنسب لبلدي
♣ لكل مراهق
♣ هدية لكل أخ صغير ..أتى للدنيا كرد فعل لزينة الحياة الدنيا ,بعد ما شبع الأب من الخلفة بإبنه الكبير ..الظالم,فاعتبر الأب ابنه الصغير قضاء وقدر

.

.