ب , م


, ب , م

, لولا الباء و الميم

, لما استطعنا تمييز :
, الزبالة عن الزمالة ,
, والبانجو عن المانجو
, واستحبوا عن استحموا
, وبابا عن ماما
,
وعملاً بقول الشاعر (إمرؤ القيء ) .. الذي يقول :
خش في الموضوع ... والقميص مقطوع
,
,فأنا عائد من عند حــــلاّق .. وبيحلق


أبويا : يابني حرام عليك ,هو مش إنت من يومين لسه حالق ! .. هو أنا بشتغل لحلاقتكوا وشحن موبايلاتكو ..نفسي أعيش يابني..نفسي أعيش ..,حرام عليكوا

أنا: كنت بحلق أربع مرات في السنة ماكنش عاجب .. وقولتللي ما تربيش شعرك دا فال وحش ,أحلق كل شهر مرة تقولي : كأنك كتكوت وغرق في مسقة المية .أعمل إيه عشان أرضيكوا ..أعمل إيه ..أعض نفسي .. ولا أقطع وداني ,


أبويا : يابني على العموم حلقت شكلك وحش ..سيبت شعرك برده شكلك وحش ,أعمل فيك إيه بس,أركبلك جنوط ..!

أنا: هو إيه ده .! مش كفاية ., الحلاق واللي عمله كأني رايح أستئصل وداني ..ما بطلش أكل فيها ..كل شوية (أه) ..سوري ., (أه) ...سوري ..,لحد ما بقت حمراااااااااه (وداني ...ها) من كتر ال سوري ,قصدي من المقص ,وكمان كتفني ورقمني ونسيني على جنب ,كأني جاموسة في مدبح ..وقال معليلي الكرسي عشان يطول .. حسيت إني مرفوع في بنزينة وبتشحـّم ,وخنقني ببالطو باتمان اللي بيحطه بالعكس ده ..بيشوك قوي ,اللي بيحصلـّي دا كتيير ..والله كتيير ,وبيحلق في شعري وعينيه في المرايه اللي حاطتها جنبيه عشان تعكسله صورة التليفزيون ,

أبويا : والله بيفهم .,هو شغاال في وزارة المساحة .؟

أنا: أه شغال مســّاح ..!


أبويا : طب هو مش عاوز صبي ..؟

أنا: مش عارف والله يا بابا إذا كان بيحبهم ولا لأ .,


أبويا : يحبهم ولا لأ ..! هو أنا حوديله قطة ..! يا حيوان بقولك صبي حلاق يشتغل على إيده ويتعلم .

أخويا الرخم :
يدخل في الحوار ببجاحة القطة الجربانة ,والله فكرة يا بابا ..دا حتى مستقبلهم باهر وبتنمي مهارات البرود والتناحة .

أبويا : إخرس ياله .,ياللي شبه البطريق إنت ,دي تنفعلك لما تطرد من شغلك ,قريب .

أنا: هو إنت بتسأل ليه يا بابا ..؟


أبويا : البواب ..البواب قايللي عاوز يشوف لإبنه صنعة تنفعه .

أنا: والله كويس ., بيأمن مستقبل إبنه يعني ., فعلن ..إحسبها صح ..تعيشها صح


أبويا : إنت شيوعي ياد ؟؟

أنا: لا يا بابا لا ..دا مثل رياضي


أبويا : أه رياضي .. بيلعب في مركز الشباب يعني (بتأليس وسخرية وإزدراء

أنا: لأ ..بيلعب في مركز التفكير والذاكرة

أبويا : ألـّه ..ما إنت حلو أهو ., وزيــّـنا , أمال عاملنا فيها ذات البوز الشبرين ليه ., ., بس والله نعيمن ,تسلم إيد اللي حلقلك ,كفاية بس إنه قدر يتعامل مع استراتيجية دمااغك ,وما إتكعبلش في المطبات اللي فيها ..انا عارف كانت أمك بتولد على أسفلت لما نزلتك ..,!

أخويا الرخم برده : لأ .. دي كانت بتتوحم في قلقاسة ..عشان كده طلعت راسه مخبطة .,

تدخل أمي وهي تنادي عليّ ..وفجأة
تسقط السكينة والبصلة من يدها وتقول : ها (شهقة) مين عمل فيك كده يا بني ..!

أخويا الرخم : هههههههه

أنا : عمل إيه بس يا ماما , ما أنا كويس أهوه

أمي : كويس ..! ,لا مش كويس ..أنا سايباك الصبح غير كده خالص

أنا : غير كده إزاي يعني (بتعجب واستنكار

أمي : يعني ..., فيك حاجة ناقصة

أنا : لا , أنا زي ما أنا ,.أنا بس حلقت

أمي : إيـه , يا ألف مبروك

أنا : وفي سري ) إيه العيلة الغريبة دي ,

أمي : بتقول إيه ياد !

أنا : ما بقولش

أمي : لا قولت

أنا : ما بقولش

أمي : أه ,بحسب

أنا : إرحمني يارب , مش كفاية شلفطة الموس في قفايا ..وقال بيقوللي ( الموس عورك في قفاك تعويره ,صغيرة ,معلش بقه عشان تبقى مسامح .! , أرد أقوله إيه ده ., أتصدق على آخر رمضاان بتعويره في قفايا .. وبعدين أبويا يضربني كده إزاي .. ! ويعني الموس هو اللي كان جري منه وراح معورني ..موس شقي ..شقي خالص ,عفريت قوي

أمي : بتقول إيه يابني .,إنت بتتكلم لجوه ليه ..,إنت بتخاف تعللي صوتك تجوع .!

أنا : هو إنتي مش سامعاني .,؟

أمي : إستنى كده .., لأ مش سامعاك

أنا : لا لا ولا يهمك ..,العيب من عندي أصل أنا شبكتي ضعيفة

أمي : مش إنت فوده فون ؟؟

أنا : فوده فون ., أه ..
فوده فون وحازم فوده فون ..وكريم فوده فون
أمي : ألــّه ., إيه الحلاوة دي ياله
أنا : دي مش حلاوة ., دي مربى
أمي : وكمان بتهزر ( قلم على القفا
إمشي يا زبالة روح قوّر البتنجان .,وإحشيه ..وما توصلش المقورة للآخر .,وخلصه وخش على الكوسة ..وبراحة ولو خرمت كوساية واحدة حخرمك ..فاهم
أنا : تخرميني ..! في رمضان ..! يا ساتر يارب ,












16 اللي يتكسف من مدونة صاحبه مايكتبش فيها تعليق:

عاشقه الرومانسيه said...

(:
كل بوست بقراه عندك بحس انك مضطهد من العيله دى والله
ههههههههههههههه
ابقى اعمل اشتراك عند الحلاق
او احلق ببيضه ورغيف علشان توفر لباباك شويه
بطل افترا بقى وبعزقه ومصاريف فارغه


سلام مخصوص جدا لماما
وقولها تبعت لى حله محشى

Anonymous said...

ههههههههههههههههههههههه

ههههههههههههههههههههههههههههههههههههههه

كل بوست احلى من اللى قبله

انت دمك عسل

كل سنه وانت طيب

متحلقش كتير

هههههههههههههههههههه

حنين

حـــلـــم كـــان said...

ههههههههههههههههههههه

ياعم خليها حلقه كل شهرين

ومنها توفير ومنها ترحم ودانك

هههههههههههههههههههه

جااااااااامد

كل سنه وانت طيب

اقصوصه said...

هم مستأصدينك ليه؟

زهور الامل said...

لالالالا ماينفعش الكلام ده
انت لازم تتاكد ان العيلة دي عيلتك وان دول اهلك

مش معقول اللي بيعموله فيك ده
هههههههههههه
نعيما يا باشا على الحلاقة
وكل عام وانت بالف خير وعيد سعيد عليك وعلى عيلتك يا متبهدل

تحياتي

ستيتة said...

الصورة تحففففففففففففففففة
وتسلم ايدك ونفوخك اللي بينقط شربات
كل سنة وانت طيب

MǿиY El-Shreef said...

هههههههههههه

انت عارف يابني لو الكلام الي بيحصل معاك ف كل بوست ده بجد

انا كان زماني يا مت يا قتلت حد

بس حسناتك انك بتضحكنا كللللللنا

ربنا يسهل عليك عيشتك :))

ضحكات الحياة said...

ايه يا عم كل ده
ايه الحلاوة دى ايه الطعامه دى ايه اللى انا شايفه ده
هههههههههههههههه

بوست جميل و رائع و يموت من الضحك
و ربنا يصبرك على قد ما بتضحكنا
ههههههههههههه

و كل سنة و انت طيب
و عيد سعيد عيك

دكـــــتور جدا said...

ههههههههههههههههههههه
ايه الحلاوة دي
انت رائع
وكوميدي كبير
ربنا يكرمك ويضحكك زي ما ضحكتنا

شوشو said...

هههههههههههههه

بوست راااائع ومدونه اروع

بس ياريت متحلقش تانى


منتظرينك فى مدونتى


تحياتى


شوشو

عاشق الجنة من الإخوان صلى على النبى said...

ايه ياعم كل البهدلة دي
ده انت صعبت علي قوي
صلي علي النبي

مشخبطاتي said...

واحشنى والله...

قلت أدحرج التماسى..أصل تقول إن أنا ناسى..

سمكه واحده said...

بوست تحفه
انت فودافون؟
وانا فودافون
كلنا فودافون
بس كان اسفلت صحيح ؟؟؟؟؟؟؟؟؟
(وش مطلع لسانه وكمان اسنانه برخامه)
وبعدين بتتكلم لجوه ليه صحيح
متخليك شوجعان كده زي زمان
هو انا تعليقي راح فين
انا دخلت هنا من زمان
هو انا معلقتش قبل كده ولا ايه؟
فين الجديد

nigro said...

و عهد الله انت دمك زي العسل
إيه يا عم الدماغ دي
يخربـ..... يعمر بيتك يا جدع
تسلم على شوية الضحك اللي م القلب دول
تسلم يا متبهدل


يلا سلام

فتوح أبو المفاتيح said...

تحفة
رااائع مووووز
انت لازم تطالب بالحكم الذاتي و الاستيلاء على مواردك الشخصية
خير خير
بس حاجة حلوة انه في اكشن عندكم و اخد ورد
اللهم إلا إذا كنت بتتخيل الحوار دا
يبقا دي حاجة جديدة
جوود بوي
تدوينة لذيذة اوي اوي اوي

زى الهوا said...

هههههههههههههههه


ايه الناس اللى بتكرهك وعايش معاهم فى بيت واحد دول ؟

بسيطه اطفش


:)

إـّنا نسخرُ مـنْ الهم ّ
تحظر المدونة على الإخوات الكبار
يكتبها مراهق,
(هذه المدونة)
♣ لكل إنسان جعل من غمه ضحكة يضحكها الناس..فحبب إليهم فضفضته
♣ وإلى من سخـِر من همه, فهانت مشاكله .. وأصبحت ذاتها حل وراحة لمشاكل الناس
♣ لكل أب سمع ابنه وصدقه وكتم سره وطبطب على كتفه وضمّه
♣ لكل من له شعر صدر ..
♣ إلى الصينيين والأفغان وكل من في آسيا ..لقد نسبت إليكم أكثر مما أنسب لبلدي
♣ لكل مراهق
♣ هدية لكل أخ صغير ..أتى للدنيا كرد فعل لزينة الحياة الدنيا ,بعد ما شبع الأب من الخلفة بإبنه الكبير ..الظالم,فاعتبر الأب ابنه الصغير قضاء وقدر

.

.