عاوز بنطلون


بعد ظهور النتيجة ,عاوز بنطلون
أنــا :
أمــي :

أنــا :ماما عاوز بنطلون
أمــي :معلش
أنــا :هو إيه اللي معلش ,هو أنا بقولك إتعورت ,يا ماما بجد عاوز بنطلون
أمــي :كام رِجل
أنــا :لا مش كتيير هما رِجلين بس
أمــي :طب قول لباباك
أنــا :نعم
أمــي :إنت ما بتفهمش إنجليزي ياد ,بقولك قول لباباك أنا ماليش دعوة ,أقولهالك بالعربي عشان تفهم ,
أنــا :لا ,,لا يا ماما خلاص أنا فهمت ,,طب ..طب ما تكلميه كده تليني دماغه وتفتحيلي سكة ,وما تقوليليش الجاموسة والدة ..
أمــي :لا يا حبيبي عادي ,أبوك مش محتاج تلييين أكتر من كده هو أصلن في التليين ,من تقديراتك المشرفة ..يا فاشل ..يا وقح .
أنــا :إنت بتنعتيني بالوقح ..واماااه
أمــي :وأمااك إزاي يعني ,جايب تسعة مقبول ,دا أنا لو كنت مكانك كنت جبت جيدة (عشان أنا أنثى ) بطرف السابوه ,يا فاشل
أنــا : أنا مش فاشل
أمــي :يا فاشل
أنــا :ما تقوليليش يا فاشل
أمــي :لأ فاشل .,ومعوق كمان
أنــا :ما تقوليليش يا معوق (بنبرة حزينة)

أمــي :يامعوق ,وقال ايه عاوز بنطلون .. تداري بيه على عملتك السودة ..,حتروح فين من الأحداث !!
أنــا :ما تقوليليش يا أحداث
أمــي :أه , ما إنت حتفهمها إزاي دي , نسيت ياله إنت كنت ناسي ناسي أفكرك ,
أنــا :تفكريني بإيه ,!
أمــي :بالماضي .,أفكرك بالماضي
أنــا :على فكرة أنا ماليش ماضي

أمــي :يخربيتك فاشل وحيوان .,
أنــا :ما تقوليليش يخربيتك
أمــي :يالهوى , دا ساتر من ربنا إننا مستحملينك ,اللي زيك كان يشتغل في موقف
أنــا :فعلن أنا بحب المواقف الصعبة
أمــي :صبرني يا رب
نسيت ياله ,نسيت إيد أبوك ,اه ما هو إنت ما بتشفش قفاك في المراية ,العيب مش عليك ,العيب على المراية
أنــا :إيه يا ماما كمية الأساوة دي ,كل ده عشان البنطلون
أمــي :اللي زيك المفروض ما يبقاش له نفس لا يآكل ولا يشرب
أنــا :ليه يعني ما هو لكل جواد كبوة
أمــي :أه , كبوة ..,أصل الجواد إتكعبل في البنطلون فاتكب ,وإنت يا كتر بناطيلك ,وبعدين ياريتك حصلت جواد ,دا إنت ما جبتش جحش رضيع
أنــا :يوه بقه كل ده عشان بنطلون , أمشي عريان يعني !,
أمــي :لأ إمشي من قدامي
أنــا :كده ياماما ,في لحظة نسيتي اللي ما بينا ,ياريتني كنت قرد عشان ما أشفش اللحظة دي
أمــي :كنت حتبقى قرد فاشل
أنــا :ما فيش قرد فاشل
أمــي :لأ ,فيه فاشل واحمر كمان
أنــا :تقصدي بإيه احمر
أمــي :والله اللي ... إيده حمره , يحسس عليها , آه اتاريك عاوز بنطلون ! ههههههههههههههه (بشماته)

أنــا :ماشي يا ماما , دا بدل ما تآذريني !
أمــي :لا يا ضنايا , آذر نفسك
أنــا :يا ماما إنتي لو شفتيني في اللجنة وأنا بمتحن كنتي قدرتي موقفي
أمــي :لأ يا شيخ ,(فجأة يعلو الصوت) : ما إنت اللي بتبقى داخل الإمتحان والمعلومات متصلبة ,ومربوطة بأستك ..بتخاف دماغك تتهز حاجة من المادة تقع و تنقص جملة , ولا ّ ساعة ما تستلم ورقة الأسئلة وتلاقي حاجة مش عارفها , بتتوتر وتروح الحمام وتلحوس نفسك هناك ,
بتعمل ببيه توتر ..ها
أنــا :هما اللي بيحطوا إمتحانات ,هما نفسهم مش عارفين لها إجابة
أمــي :وإنت بقى بتبقى متوقع يسألوك : جي جي ماتت في الحلقة الكام ..!
أنــا :يا خسارة , يا خسارة يا ماما .., وانا اللي كنت فاكرك ماما ..أنا حموّت نفسي ..أنا حرمي نفسي من البلكونة

أمــي :مش حتموت , حتتعلق في تكييف الدور السابع ,ما إنت أصلك نحس ..,ولو وقعت حتنزل على رقبتك تتكسح وتبقى معوق ونلملك معونة الشتا
أنــا : أمال أعمل إيه .. أعمل إيه .. أروح فين .,.!
أمــي :روح هاتللي أشرب ,وإقفل باب التلاجة كويس ,وبراحة عشان باباك نايم
أنــا :إيه ..! هو بابا جوة (بصوت خافت)
أمــي :أه , وكان بيسأل عليك
أنــا :وقولتيله إيه ؟
أمــي :قلتله , ما عنديش حد بالاسم ده
أنــا :طب الحمد لله ,قلقتيني يا شيخة ,فيه حاجة تتآكل .؟
أمــي :عندك العيش جوة
أنــا :أه , وبعدين
أمــي :بعدين إيه .؟
أنــا :أيوة , العيش ده المبتدأ ,فين الخبر بقه ..الغموس يعني
أمــي :أه , اصلي تعبانة قوي يا حبيبي ومعلش فما قدرتش ,,,آه ياني

أنــا :طب أنا رايح عند مؤمن
أمــي :مؤمن صاحبك , ولا مؤمن آل فرعون .,!
أنــا :لأ مؤمن بتاع الكاوتشوك
أمــي :إيه حتجنـّط ..!
أنــا :لأ رايح آكل لحمة
أمــي :روح ْ,الحقّ عليا إني خايفة عليك تآكل لحمة عيانة , تصحى من النوم تنعر ..وتعمل ببيه جلة
أنــا :يا ماما رفقا ...رفقا بالقوارير ..
أمــي :قصدك رفقا بالحيوان , وبعدين مش أنا قلت بلاش أكل برة البيت ؟
أنــا :ما هو في البيت ما فيش لحمة عشان إنفلونزا الخنازير ,,ومافيش فراخ عشان إنفلونزا الطيور ,هو ليه بس يارب ما فيش إنفلونزا العدس والفول ..!

22 اللي يتكسف من مدونة صاحبه مايكتبش فيها تعليق:

زهور الامل said...

هههههههههههههههههههههههههههههههههه
ايه يا عم كمية الكوميديا اللي عندك دي والله العظيم انا مش قادرة امسك نفسي من الضحك
وبصراحة مامتك عندها حق تسعة مقبول يا مفتري مفيش حتى واحدة جيد تداري بيها الخيبة
وبعدين المفروض تحرمك من العدس والفول كمان

دمك سكر بجد والف مبروك النجاح ولو انه نجاح اي كلام

تحياتي

بنجاواتى said...
This comment has been removed by the author.
مخبر قمل دولة said...

الا قاتل الله دماغك
عليك خفة دم زي العسل
دا احنا ياعم الواحد ممكن يبهدل الريس نفسه ليل نهار بس مايفتحش بقه بكلمة واحدة على امه
سؤال رفيع : هي والدتك شافت الموضوع ده ؟ وقالت ايه ؟
مدونة اكثر من رائعة .. سعيد جدا بزيارتها

Pink Dreams said...

ههههههههههههههههههههههههههههه

جااااااااااااامده موووووووووت

بس بجد جوار جامد

ههههههههههههههههههه

تحياتى

كيــــــــــــارا said...

هههههههههههههههههههههههههههههه

كل دا عشان بنطلون ههههههههههههههههه

mony said...

انت متأكد ان دى مامتك؟؟؟؟
دى يبنى كرهاك اوى
ربنا يكون فى عونك

عاشقه الرومانسيه said...

هههههههههههههههههههههههههههههه
والله انت عسسسسسسسسسسل
عجبنى البوست قووووى
وضحكت عليه كتير
المفروض بعد كميه التهزيق دى تطلب طقم كامل
بالمره بقى
ههههههههههههههه


اول زياره ومش الاخيره ان شاء الله
مبروك النجاح
وسلامى لمامتك لانها سكررررررر

المشخبطاتى said...

المهم إنك نجحت..ألف مبروك والجاى يكون أفضل إن شاء الله..

من الحق أمى بتتحايل عليا علشان اجيب(كام بنطلون وكام قميص) وأنا اللى رافض....هيييييييييييه دنيا..

تقبل مرورى.

MǿиY El-Shreef said...

ههههههههههههههههههههه

ايه ياعم ده الحوار ده لو حقيقه انا اهاجر احسن :D

وماحدش واخد من التعليم حاجه اساسا مش عاجبها التسعه المقبول :D

ماتسمحش بالحوار ده تاني ياعم وخد حقك بالكلام بعد كده

والبنطلون عليا بس قولي مقاسك هههههههههههههههه

حسام عامر said...

إسلوبك موتني من الضحك
إستمر على هذا المنوال يا صديقي فمن سار على الدرب بالدال لا بالضاد وصل
تقبل تحيتي ومودتي

MaNoOoSh said...

ههههههههههههههههههههههه
دي مامتك خايفة عليك لا يكون البنطلون متسمم وللا حاجة
هههههههههههههه

ستيته حسب الله الحمش said...

هههههههههههههههههههههههههه
والله ما بضحك من قلبي الا بحوار العائلي اللي يفيض حونية ده

طب ماما كانت بتعمل ايه اثناء الحوار ده؟

انا طول الحوار فكراها بتعملك محشي ويطلع في الأخر هي قاعدة كده وانت بتتغسل وتتكوي

ونستفيد من البوست ده أنك نجحت
الف مبروك
وعاوز بنطلون
ها نكتتب لصالح البنطلون
وباباك كان نايم جوه
الحمد لله قدر ولطف

norahaty said...

دى ماما دى؟
دى ماما الغولة
(مافيناش من ضرب)

norahaty said...

مبروك النجاح
تسعة مقبول
تسعة مرفوض
مش مشكلة ابداً
المهم منقول للصف
اللى ورررررررراه

سمكه واحده said...

ايه ياعم ده
يجطع النت علي النتيت
اللله يخربيت الطب واللي بيطببوا
هي الدكاتره بقت دكاتره فاشله من شويه
ال طب ال
(وش مطلع لسانه)
طبعا الحوار يموت من الضوحك يا فاشل يافاشل
سلملي علي ولدتشك
(وش بيغمز)
دمك سكر
تحياتي

7annen said...

ههههههههههههههههههههههههههههههههه

لا بجد مش معقوووووول انت خرجتنى من المود اللى كنت فيه

هههههههههههههههههههههههههههه

هموت من الضحك

مافيش انفلوانزا فول وعدس

هههههههههههههههههههههههههههههه

جميله اوى اوى احييك على خفه دمك

بجد اول زياره ومش هتبقى الاخيره ان شاء الله

حنين

واحد؟؟؟؟!!!! said...

احم احم .....

(صورة واحد ماسك مكرفون وبيعدل لياقة القميص عشان الكلام المهم اللى حيتقال )

مشكلتك يا زى يا خويا انك بتخش غلط انت عارف لو دخلت عليها وقالتلك جايب تسعة مقبول كنت تقولها : يا ماما يا حبيبتى هى البيروقراطية الحكومية بتفرض نفسها فرضا شنيعا على طوائف الشعب المستكين والديماجوجية الاستعمارية هى المنوط الاول بكل ما حدث ويحدث وسيحدث وان لم يحدث بما حدث لى فى الامتحانات


كنت حتلاقيها جابتلك دولاب

عن اذنك بقى انا رايح اطلب من امى
.....
......
.....
.......
.....
......
.......ز
.........












تجيبلى شووووووووورت

المتبهـدلـون فـي الأرض said...

واحد (أربع علامات )
مين الأستاذ اللي دخل من غير ما يخبط ده ,

أنا معاك في كل اللي حضرتك قولته بس ممكن استفسار بسيط من الجملة الواضحة جدن اللي قلتها :::, يعني إيه (شعب)


::::::::::::::
ياريت يكون الشورت بأستيك

ابو صهيب ( الجمعاوي الاصيل)سابقاً said...

هههههههههههههههههههههههههه

اضحك الله سنك

بجد رائعة القصة دي

بس هو في ام كده

معلش يعني دي تبقى حاجة ترلم ترلم خالص

تامر علي said...

كل ده علشان بنطلون ... ياعم البس شورت وخلاص احنا في الصيف :)

لاء بصراحة أنا ملاحظ ان في تواصل فكري عالي بينك وبين الست الوالده وده بيخلي مفيش اي فجوة بين الاجيال :)

تحياتي

حـــلـــم كــــان said...

ههههههههههههههههههههههههههه

ايه الكلام جايبه منين

ضحكات الحياة said...

السلام عليكم

هههههههههههههههههههههههههه

ايه يا عم كل الكلام دهو الفكاهة دى

بس بصراحة الناس دى بتعمل فينا كده ليييييييييييييييييييييييه ؟

بس بوست جامد يا باشا

إـّنا نسخرُ مـنْ الهم ّ
تحظر المدونة على الإخوات الكبار
يكتبها مراهق,
(هذه المدونة)
♣ لكل إنسان جعل من غمه ضحكة يضحكها الناس..فحبب إليهم فضفضته
♣ وإلى من سخـِر من همه, فهانت مشاكله .. وأصبحت ذاتها حل وراحة لمشاكل الناس
♣ لكل أب سمع ابنه وصدقه وكتم سره وطبطب على كتفه وضمّه
♣ لكل من له شعر صدر ..
♣ إلى الصينيين والأفغان وكل من في آسيا ..لقد نسبت إليكم أكثر مما أنسب لبلدي
♣ لكل مراهق
♣ هدية لكل أخ صغير ..أتى للدنيا كرد فعل لزينة الحياة الدنيا ,بعد ما شبع الأب من الخلفة بإبنه الكبير ..الظالم,فاعتبر الأب ابنه الصغير قضاء وقدر

.

.