كوابيس



 تستيقظ أمي صباح ً;صباحا ًهذا ظرف زمان وليس اسم أمي;علي رنات نغمة <قومي يا قطة..قومي ياجميلة..قومي ياطعمة>.
لتعد السندوتشات لجميع من بالبيت ..فالسندوتشات عندنا إجباري<زي السؤال الأول في إمتحانات السنوية العامة<الأصح السنوية لأنها كل سنة,حتي لما شالوا سنة سته فضلت برده موجودة,وأيضا أنها لم تعد " ثانوية " وإنما "أساسية" ومصيرية <ومصرية> في حياة كل إنسان مصري غير صحيح> 
.,حتي أبي تحتم علية حياته الزوجية والميثاق الغليظ اللي أمي أخدته منه ,إنه ياخد سندوتشاته رغم إن بينه وبين المعاش قاب قوسين أو أدني..
أما أخي <حمؤه> الكبير فيذكرني منظره وهو يحمل كيس السندوتشات ,بمنظر اللمبي حينما كان رايح شغله في السجن والكلاب راحت جريت عليه وأكلت منه كيس السندوتشات>
استيقظت أنا ..أخدت حمام .. وكوب القهوة وهممت أقوم بتمارين الصباح
ورحت أزن نفسي,
كالعادة ومنذ تسع سنين وزني 59 كيلو
لابد من أن هناك حل ما لزيادة وزني ,
أه الأكل
رحت فتحت التلاجة ..أكلت سندوتش ورجعت وزنت نفسي .. زيادة 100 جرام ..
بسرعة رحت إلتهمت التاني.. وزنت نفسي., وزني زاد 15جرام  ..الله أكبر ..الحمدلله الحمدلله
 قمت علي حلة المحشي عالصبح كدهه وطرحتها أرضا .. خلاص أخيرا حلمي إتحقق وهتغير هتغير ,
بوزن نفسي (بعد ما بطني بقت شبه حرف البي سمُال) لقيتني أقل إتنين كيلو ..
نعم .. هنكدب من أولها ..دا الخضار اللي في المحشي لوحده يجي نص كيلو,دا أمي كانت داخلة بيه من السوق كأنها هتعشي حمار.., 
 ماعلينا ,أسيبه يتهضم وأبقي أشوف.,
,
إستيقظ أبي من نومه علي مهل كعادته 
مستمسكا بمبدأه "لسه بدري..هي الدنيا هتطير"
بعد تأدية تحيات الصباح المألوفة لدينا
: صباع الخير ياحبيبي;
: صباع الخير يابابا
,همّ أبي متسائلا:
أبي: مالك يابني متشلفط كده ! أنا بدور علي وشك عشان أقوله صباح الخير مش لاقيه
أنا: أصلي وقعت إمبارح بالليل  وأنا ماشي
أبي: خير.. مش تبقي تآخد بالك .., حصلك حاجة
أنا: لا .,بس ضافري إتكسر
أبي: وإيه علاقة ضافرك بالوقوع
أنا: أصلي وقعت علي ضافري
أبي: ,إزاي يعني وقعت علي ضافرك الناس لما بتقع بتقع علي إيدها, ركبتها
رقبتها
أنا: لأ ,أنا لما وقعت وقعت علي ضافري نفسه,أصلي كنت بتكلم في الموبايل وكنت خايف ليقع
أبي: وإنت مش عارف إن اللي يتكلم ف الموبايل وهو ماشي تعتبر مخالفة .! 
 ,صاحبك اللي كنت بتكلمه ده إنت لازم تقاطعه  
أنا: لا ماهو رجع إتصل بيا تاني ..
بابا: طب خلاص كلمه
أنا: بس تقريبن السبب النضارة مش صاحبي .,أصلي مش بشوف بيها فوقعت 
أبي: مش بتشوف بيها لابسها ليه !
أنا: قولت عشان أغض بيها بصري يعني :D
أبي: يارب إرحم عبدك الضعيف أنا .. قدري قدري وحرضي بيه.
أنا: إيه يابابا ..,عادي يعني إفتكرت الفريم بتاع النضارة درجة من درجات السلم وطلعتها
أبي: وطبعا لما جيت تطلعها مالقيتهاش .!
أنا: أه هاااا ;فم مفتوح; عرفت إزاي .! 
أبي: أكيد الناس هي اللي حسدت خطوتك. أو الأصح قفزتك,ما إنت لو بتمشي زينا ماكنش جرا اللي جرا ..لكن مش عارف إزاي كعبك بيجي عند ركبتك وإنت ماشي
أنا: (;نظرة حانقة;) طيب ..أنا هنزل عشان أنا رايح أزور واحد صاحبي
عاوز حاجة من تحت
أبي: طب تقل علي نفسك شوية إنت مالك مخفف كده
أنا: ما هو يابخت من زار وخفف ..خخخخخخ
أبي: يارب يارب ..إرحمني
أبي: إنت ياحيوان, تمشي من شوارع واسعة ,بلاش غباءك اللي يقولك إن الشارع الضيق بيوصل بسرعة.. الاتنين نفس المسافة 
وماتمسكش الموبايل في إيديك 
أنا: ما تقلقش يا دادي,الحرامي لوشاف موبايلي ده هيسرق ويديني
أبي: هيديك على قفاك ..وإنت ما فكش قلم
أنا: دا الظاهر ..لكن القوة بالعقل والفكر.!
أبي: يابني إنت طول عمرك مافكرت أبدا,ويوم ماتفكر تفكر بغباء.! إسمع اللي بقولهولك من غيرماتفكر فيه.
لما توصل لصاحبك إعمل الموبايل صامت,
أنا: حاضر
بابا: وعينك تكون في الأرض لما تدخل بيتهم
أنا:حاضر
بابا: وتوطي صوتك ,مش ضروري تسمع اللي بتقوله,قوله من غير ماتسمعه..
أنا: حاضر
أبي: وماتعملش صدي صوت
أنا: ماتروحله إنت يابابا 
بابا: إمشي بلاش لماضة,..معاك فلوس .!
أنا: مستورة يابيه
قلتها وأنا علي الباب,خرجت بعد الإسطوانة ما خلصت و
أغلقت الباب(;كده يبقوا 65 مرة للسنة الجديدة); ..
للأسف ,لم يقدر لي أن أستفز أبي هذه المرة .,إن أبي يستفز عندما أتعمد الخروج دون أن أخبره .. أو أكثر من أن أستفزه ,أن أترك له ورقة مكتوب عليها أنا فين ,والأكثر أن كل الورق يحوي جملة ثابتة<معلش يابابا لوإتصلت بيا ولقيت الموبايل مقفول ..هيكون فصل شحن>
أو أفعل الكبرى وأطلب من أمي فلوس قدامه ..إذا فعلتها ,فبذلك أكون قد أعلنت الحرب
ينتفض عرق الرجولة وتعلو نسبة هرمون الكرامة في الدم وينشد أبي ويغرد بأعذب الألحان الموجعة ..أتفادي دوما استفزازه إلا وقت الثأر..وأكون حريصا إتقاء أن تقوم يده بمكيجة خدودي,
أحد أصحابي حينما يريد استفزاز أحد ,فإنه يقلب له الشبشب D: أموت وأفهم : من أنهي إتجاه
.,
أنا قايم من النوم النهاردة متوتر قوي وقلقان قوي..حتى مش فاكر ليه
بعد الفجر ,الواحد بينام كسل ,وهروب من الوقت ده بالتحديد
 منه لله يارب جعيدي أخويا الكبير ..هو السبب ..هو اللي كرهني في الصحيان بدري.. كان الوغد بيصحيني قال إيه أذاكر في الوقت ده لإن النشاط بيكون علي رمته ..يعني خلاص لو نمت براحتي هقوم مش هلاقي المذاكرة هياخدوها ويمشوا..طب ياريت
أصلا هو كان بيصحيني عشان كان بيخاف يذاكر لوحده  كان بيحتاج مِحرم بينه وبين الكتاب
,من قلبي بقولها ; أنا بكره حاجة إسمها إخوات كبار.. وأي أخ كبير من غير حتي ماأعرفه هتلاقية إماظالم ,أوجبان وبتاع نفسه......, بكرهم عمياني
المهم,بعد السيرة اللي عكرت دماغي دي .. لما بنام في الوقت ده بحلم بكوابيس مش منطقية ..مثلا إن أبويا بقي ذئب وكان رايح ياكل أمي وهي نايمة ..فصرخت بصوت عالي, فلقيت أمي داخلة بكباية مية وبتقولي خير اللهم إجعله خير,فقولتلها إنتي سليمة ,قالتلي فوق ياد أنا ماما,

أو أحلم إني كنت ف صحرا وعطشان ..عطشان وأبويا معاه مية سقعة مشبرة وبيبصلي من بعييد ويطلع لسانه ,ومرديش يديني أشرب ,

أو زمان لما كنت بعوز أعمل حمام وأنا نايم بس بكون بحلم إني نزلت البحر ,وأنا أكتر حاجة تغريني وتشجعني إني أعمل ببي لما أكون في البحر , فاعمل الببي وأصحي من النوم ألاقي الببي جنبي عالسرير ..يعني مايتحققش حاجة من الحلم غير الببي.! دا إيه الحظ المقرف ده
وتيجي أمي بقه تقولي إيه ده, ببيه ياماما (في منه كتيير على فكرة ..إيه السؤال الغريب ده) أقولها أصلي إمبارح كنت في البحر والظاهر جيت نمت بهدومي المبلولة فبليت السرير,
ولعلمكم بس الببي بيبقي "يورن " مش "ستول"
..لأ لأ  لا حياة في العلم ولا حياء في التين ولا حياء لمن تنادي..دا كلام علمي ,طب علي فكرة بقه الرغوة اللي في البحر دي مش زَبد البحر ولا حاجة دي أصلاً خلاصة الببي ,أيوة
 أقولكوا علي حاجة كمان مش ساعات بتلاقوا ناس نازلة البحر بمايوه وفجأة تلاقو المايو إتنفخ زي الباراشوت ,وبيبقلل ,رغم إن بق الراجل بعيد خالص ,لأ وإيه تلاقوه مخلي واحد تحت قال إيه بيبقلل ببقه., قال يعني البقاليل دي من البق,استحالة طبعاً...دا لو بق حوت عمره ما يجيب الأداء ده, دي قدرة يامعلم.
  ما علينا المهم إني حلمت أمس حلم مفزع ,كابوس يعني.., حلمت إن أمي كانت تاجرة سمك بس مش فاكر نوعه,وصوتها عريض وبتشيش وحاطة كحل كتيير وعندها عضلات,وأخويا الكبير طفل شوارع معفن قوي ..وملحوس وكان باين أمي رايحة تخطبله بنت العجلاتي ..اللي اسمه عم منفاخ وكان بيقول لأمي: <تظهر بقليلة كبيرة عالشاشة تعبير علي أن الموقف من الذاكرة>

أخويا: ماما عشان خاطري ,لو سألك أنا شغال فين قوليله في شركة أدوية 
أمي: مين ده اللي شغال في شركة أدوية ياض..أنت
أخويا: <يا ماما قوليله كده بس ,
أمي: أه  إنت قصدك علي مخزن الأدوية اللي الراجل طردك منه عشان كنت بتروحله الشغل الساعة إتناشر, 
أخويا: وكمان قولتله إنهم سلموني عربية للشغل بتيجي تآخدني وتوديني
أمي: دا بقه إنت أكيد تقصد التروسيكل ,دا حتى كان من غير كرسي تقعد عليه يامعفن,دا إنت كنت ياله بتزحف بيه كأنه عجلة حربية  من بتوع الهكسوس
أمي: <والمرتب ,<أكيد قلتلهم ألف ونص ,دا غير الحوافز
أخويا: <لا لا أنا قلتله بيوصلني بالكريدت كارد
أمي: <قول ,قول كمان ,يخربيتك..إشحال ماكانتش بنت عجلاتي ,وأبوها اسمه منفاخ
        يدخل أخوي التاني ف نص الحلم مقاطعا\; وكان شكلة قايم بدور المتعلم المتنور زي محمد رياض في "لن أعيش في هدوم أبي
أخويا: <ماما ,عاوزك في موضوع 
أمي: <خير يا حماصه إنت صحيت
أخويا: <تهاني بنت طنط أماني فاكراها.!,بتشوفيها.! 
أمي: <يااه,من زمان قوي ما شفتش طنطك أماني,من أيام ماكنا في ثانوي
أخويا: <ثانوي,ثانوي إيه ياماما ,تقصدي الدبلوم
أمي: <هه,الدبلوووم آه , أصل الدبلوم أيامنا كان بيخرج ثانوي ,ماتغيرش الموضوع,و إتهد بدل ما أقوم أكلك بالشلوت *..
وفجأة ألاقي أبويا بيبصلي من وراهم وهو شايل المية الساقعة ,وبرده بيطلعلي لسانه
وشوية شوية يختفي وأفتكر إني فوقت من الحلم ألاقيه راح حط تلج في الكباية, والمية سقعت أكتر ..وجاي يرفعلي الكباية في نور الشمس عشان أشوفها أكتر وهي سقعة الظاهر إن الأحلام بتخش في بعضها.
*(عمر دي ماتكون أمي أبدا .,أنا مش متصور أمي  أصلاً تعرف تضرب بالشلوت ولا لأ)
والغريبة إني ساعات بحلم أحلام وألاقي حد من صحابي حلم نفس الحلم .. معقولة  كانوا بيزيعوا نفس الحلم ,وإحنا الاتنين كنا بنشوف نفس القناة <دريم طبعا>.
أنا عاوز حل أنا تعبت ..وعطشت.. ونفسي في مية سقعة مشبرة.!

تررم


تررم

بوست استثنائي






(تخيل إنك بتسمع موسيقي بيانو هادية جدن)
                     ;البداية: كان عندنا بنت اسمها تررم
..ضحكتها مش طبيعية ..

حنينة زي حنان الأم .,
طيبة طيابة البطاطس المهروسة ., جميلة جمال اللمبة النيون .,أحلي ماتشوفها وهي متنرفزة ..في عصبيتها ..يُحبب إليك نرفزتها,ضحكتها حية ترغب في الضحك,روحها شقية ..بخفة ,وعقلها رزين..ببساطة ., وقلبها أبيض أنضف من الهدوم المغسولة بتايد,والكل يحس إنها بتاعته هو بس واللي يكلمها يحس إنه خلاص إمتلكها من أكبر حد إتعامل معاها لأصغر حد,لكن روحها دي مش هتكون لأي حد إجتماعية  أكتر من الدراسات الإجتماعية نفسها,وغضبها مضحك جدا ومن بعيد تحسها غامضة,وأكتر حاجة غامضة فيها سترها لمشاعرها ,عمرك ماتسمعها بتتكلم عن حب ,رغم إنها عاطفية ومش متحجرة.. حسّاسة حسَاسة الترمومتر بس من تحت لتحت ,وفي المواقف اللي بجد مش بتاعت نفسها خالص
هي بس بتكره 3 أفعال فعل يدفع ,فعل يعطي ,فعل يشتري ..شيالة هموم الغير .,بجد,وتحب دايمن تسعد غيرها باللي ف إيدها ,بجد إحترت عشان أطلع فيها عيوب .
                     كنا بنتجمع (ضمير نا ضمير غايب تقديره مقبول قصدي يعود على أطفال العائلة)عند تيتا ربنا يطول ف عمرها ,ف رمضان قبل العيد ,ف العشر تيام الأواخر ..ورغم إن قيام الليل والصيام كان ده أعز وقتهم ,كان ممكن تلاقينا نروح المسجد نتريق علي الناس اللي بتبكي ف الصلاة,وكنا نوزع بعضنا البنات يصلوا مع الستات ويقعدوا يحكوا معاهم ويشتغلوهم بإنهم غلبانين ومش لاقيين ياكلوا,وكنا ساعات نلبس جيبات ونروح وياهم عند الستات وبينتهي اليوم بالطرد شر طرده بره المسجد خاصة لما حد ما يقدرش يمسك نفسه ويضحك ويكشفنا
وكان إنتقامنا إننا نروح نقفل باب الستات من بره ومنخليهومش يعرفوا يطلعوا .,يقوموا باعتين واحدة منهم تلف من عند الرجالة ..وإحنا نضحك ..أو نرمي حاجة تزحلقهن وهن طالعات;
وف سنة جابت تررم باروكة وعزمت تنتج الكاميرا الخفية بأسلوبها الخاص وبإخراجها ..,وكان لازم تختار شخصية عندها مهارة وموهبة ولايق عليها الطبع الأنثوي,ومايتعرفش من الناس وطبعا راجل عشان يستحمل الضرب
ووقع الإختيار علي أخويا اللي أكبر مني رغم إنه طبعه شديد جدن وراجل بس دمه خفيف جدن ,لإنه حقيقتن وبشهادة الناس يشبه الصينيين ,
ومش عارف ليه! مع إن أبويا مش صيني ولا أمي بايركس,يمكن عشان بنتفرج كتير علي سبيس بور,
كنا نستني الناس من بعد التراويح ,ولينا مستهدف سني معين وهما الرجالة العواجيز قوي ,وخاصة لو معاه عصاية لإن ده كان عامل إغراء قوي إننا ناخدها منه,والستات كلهم والشباب الذكور;لإن الشاب الولد أرعن وأهوج خاصة لو أخ كبير p-)وما هيصدق بنت بجيبه قصيرة وبلوزه وميك أب من عمايل تررم يتألف من كحل تحت العينين وأحمر شفايف من اللبان المدور أبو شلن وأصفر وأخضر فوق العين;من اللبانة الصفره اللي كانت مع الحمره ف الكيس;
والباروكة طبعا وغوايش وسلسلة فالصو من اللي كانوا عند الراجل بتاع بلالين العيد
وف  فترة قررت المخرجة تررم إنها تغير النشاط وتشتغل رعب ,وساعتها كان ناقوس الخطر قرب يضرب وموسيقي التصويرية السريعة بتاعت الأفلام الهندي اشتغلت , جبنا الكحل بتاع ماما وخلينا وش أخويا أسود ,وبس أصفر فوق العين ,ومسك سكينة.
كنا بنشتغل علي كذا فرقة
وكان فيه فرقة ;مسخنين; وفرقة مهديين; كنا كلنا أربعة أصلن وطبعا تررم المخرج والزعيم ومعاها أخويا الكبير خالص مالص
كنت أنا وقتها ابن التسع ربيع(يعني عندي تسع سنين بالعربي;
,لما أخويا "بطل العرض" ينطلق., كانت تررم تزرع إتنين مننا جوا الناس يسخنوا الجو ,ويطلقوا الإشاعات وعلي الجانب الآخر أختي أقصد أخي اللي عامل فيها أختي ومعاه أحدنا للحماية والتسليك عند احتدام المواقف
ف يوم عرفنا إن فيه بنت ساكنة جنبينا وسمعت عن اللي بيحصل ,وبوظيفتنا كفرقة مجسات,إتأكدنا إن البنت دي طازة وجاهزة إن حد يخضها  من علي بعد ولو هتكتبلها في ورقة إنها تتخض ,
سخـّـنا الموقف وأكدنا لها إن اللي بيحصل حقيقة وإن فيه بنت جديدة نزلت لكنها إتحرقت وإتحولت وبتطلع للناس بالليل وبمساعدة الخلفية السينيمائية وأفلام الرعب,البنت إستوت
استعد فريق الإبلاغ ومن بينهم تررم;وفريق الإعداد ومن بينهم تررم ,وفريق المراقبة والتنسيق ومن بينهم تررم,فالحقيقة أننا كنا كل الفرق ,ومن بيننا تررم ; ذهبنا للبنت ,كالعادة إبتدينا الإثارة بإحداث غاغة كتفرقيع بمب وصواريخ أو ضرب نار بمسدسات بارود,فأول من يخرج هم الأطفال خرجت البنت ,
فأطلقت تررم الإشارة
إندفع أخي نحو بوابة منزل البنت وأخذ يصعدها صارخا ويهزها بقوة كالذي يريد كسرها بوجهة الملطخ بالسواد مع شادو عين أصفر وسكينة غير أن اللبس وحده كان مصدر خضة
صرخت البنت بهلع واضعة يدها علي أذنيها و لقينا شبابيك وأنوار البيوت البعيدة تضاء والناس تسأل فيه إيه ! "

عندها علمنا أن البنت صرخت صرختها المعتادة وأيقظت الشارع الرئيسي نفسه وخاصة أن منزلها كان بجوار المسجد ,فنحن ورغم أننا أمامها ماصدقنا الصرخة لشدتها وجديتها يبدو أن فزعنا من رد الفعل غلب هلعها رغم إننا: بنهزر
لم يكتف حسنا الإجرامي ونزوة الضحكة الشريرة بعد رؤية الناس يعذبون
أخفت تررم أخي المتحول دراكوليا,وأظهرنا علامات التعجب من الصراخ الذي وكأننا أقبلنا عليه لا قبله
,صرخت أم البنت بها لتهدئها وتتعجب من سلوكها,ورحنا لراحة وتدبير الحدث الأكبر
من قرون استشعارانا علمنا أن أم البنت سترسلها الآن ..بعد الصراخ لتوصل شيئ لبيت ما ولتؤكد أم البنت لإبنتها أنلا شيء اسمه عفريته ..وأنثي
كانت ترتيبات تررم تقتضي بألا يتم أي عمل قريبا من البيت .. للسلامة
وإتقاء فتك مدكور وإخوته شديدو الطبع
ذهبت البنت للمشوار اللي أمها بعتاها له ,وف الطريق أطلقت إشارة البدء فانطلق أخي كان أخي وقتها ذوالعشرة أعوام ,ورغم ذلك كان حقا موهوبا والأجدر منه حس تررم الشقي ,
همّ أخي بالانطلاق وما إن رأته البنت من بعيد حتي دوا صراخها -الغير طبيعي- وأسرعت في خطاها نحو بيت صاحبة أمها ,
وهذا ما جذب حيرة واستنكار قادة العمل "ومن بينهم تررم وأطلقوا في نفس واحد : البنت دي لازم تتربي.
حينما صرخت البنت , لم ينزعج الناس لها ثانية ,فهي صارت الآن كفتي الغنم حين استغاث من ذئب علي غنمه وطلع كان بيهت الناس مش أكتر
وقتها حين سمع أخي الصراخ وكما هو متفق عليه ,استخبأ الفصحي بتاعت استخبي; في مدخل أقرب بيت واستكان ,وكان به بعض ظلام,ولعب القدر لعبته
إن البنت أصلا كانت ذاهبة لنفس البيت الذي استخبأ أخي فيه والذي سبقها هو إليه ليتخبأ فيه بعدما صرخت وللأسف هو لايعلم ذلك
واه واه لقد خرج الموقف من أيدينا .. حاولنا إيقاف البنت من الدخول ,لكن وكأنها تري ذلك البيت بمثابة المأمن
دخلت البنت مهرولة ونادت بفزع علي أهله.. وحينها شعر أخي المستخبي في ظلام مدخل ذاك البيت أن أحدا من أهله يخرج ليفتح الباب ,ولم يجد إلا أن ينجو بنفسه حتي لا يكون هو نفسه دليلا ماديا علي وجوده
لا أعرف كيف أصف رؤية البنت للشيئ الذي تفر منه وهو يخرج ببطئ من الظلام,من حيث لا تتوقع وجوده,ولا هو أيضا لا يعلم أن نفس البنت هي من تطرق الباب
لقد حرق أبي الباروكة أمام أعينا وتصاعدت منها أبخرة الانتقام
وبعد ذلك ذهبنا للبنت وصالحناها وتبادلنا الصرخات أقصد الضحكات
 ولأجل عدالة القدر كان قد خبأ لي أن   أخاها زميلا لي في الدراسة وكان قمة ف القرف وللأسف كل اللي عملناه ف أخته طلعه عليا أنا 


مولد





بسم الله والصلاة والسلام علي رسول الله
أما وقد  قدر الله لنا أن نحيا في زمان أصبحت فيه دقيقة المحمول بنفس تمن دقيقة الأرضي, وأن العفاريت أصبحت تضايق-واحد صاحبي- عن طريق رسائل الإس إم إس.فإن قرنا بتلك المواصفات أفخر إني حييت فيه,
لقد بلغنا من العلم مبلغ أن الغسيل أصبح يتنشر ناشف ,وهذا علي غرار أوقات زمان خالص حينما كان  الغسيل يطلع يغسل البيت نفسه ويحمي الجيران وينشب خناقات .. ويظل طوال الوقت يسقط المياه من بين ثناياه وكأنهم كلما وجدوه ناشفا أعادوا بله,فيخيل للناظر أنه نشر ليرش الشارع ..
إنه غزو مايدعي الأتوماتيك,أما الآن أصبح  هناك حاجات أهم من الغسيل يتخانق الجيران عليها.. بدال (إنتوا ياعالم ياللي تحت إقفلوا المية عاوز أطلع من الحمام) تقوم ترد عليه مرات الراجل اللي فوق ..(رغم إنه ماوجهلهاش كلام) ماتطلع يا دا العدي(كلمة مركبة)وهو الباب مش هيفتح عشان مافيش مية .. إمستزم(مصمصة شفايف)وبالتالي يضطر إنه يسبـّلها وينزل جوزها يلعب في عنيه زي الراجل اللي كان بيبص عليها بالمنظار وهي بتنشر ,أو إنه يضطر يقوم الفجر عشان يتشطف..أو يبات متشطف جاهز وغاسل وشه ومتوضي قبل ماينام عشان يقوم يصلي دايركت.
,دلوقتي ممكن تسمع خناقة (إيه يامان ..مكبر الجي علينا ليه .. مش قلتلك تشيّرلي
الجيم ولا عاوز تتبسط لوحدك ..) وبرده ترد مراته : تشي الجيران لبعضتشيها);.
 لقد تقدمت بنا عجلة التحضر..يكفي كلمة (لبعضتشيها)
إن الإنسان في هذا القرن لا يشترط إنه يغسل يده بعد أكل اللحمة زي زمان ..دلوقتي عادي جدن إنك تآكل لحمة .,وتشرب شربه كمان من غير ما تضطر تشمر كـُم الجلابية ..أو حتي تضطر تلبس جلابية..أو تقعد جنبك بهانة ..
إن الشوكة والملعقة حلت محل الصوابع ..إنها غزو الآلة ..دلوقتي وارد بعد الأكلة الحلوة إنك "هتآكل شوكتك وراها". لأ والجديد إنها خشب .,وشوكة ومعلقة ف نفس الوقت وبتغرف سوشي ..
الغريبة إنهم بيعرفوا يفرقوا الشوكة عن السوشي .. أنا بحس إني لو أكلت بيهم حطلع الأكل تاني أغرف بيه وأبلع الخشبتين دول ;الحمد لله عالعلم
وبمناسبة العلم صحيح ..دلوقتي بقه فيه خيار( لأ مأقصدتش ,مازمان كان فيه خيار اللي هو أخضر ومنه صوابع ده) إنك تتعلم العلم العملي نظري بس ,رغم إنه زمان كان جزءا لا يتجزأ من بعضه.
دا حتى كمان العوم زماان إختلف عن دلوقتي خالص زمان كانوا العوم بالنسبة ليهم إنه يدفس بُوزه في المية .. ويبقلل حبة ببقه .. ويطبش بإيده زي الجاموسة ويبل اللي عالشط..ويبلع شوية ميه قال يعني كان علي وشك يغرق من العمق السحيق اللي وصلـّه , ويطلع يفضح نفسه علي الشط والناس تتلم ويضغطوا علي بطنه ويقوم مخضوض :هو فين ! راح فين , بلاش إنت يابحر ..بلاش إنت يابحر .ويصعب على واحدة ست كانت بتصيف تقوم تديله سندوتشاتها وتعمله كباية شاي ..على البحر ويطلع في الآخر إنه كان بيصيف في بلطيم
,وياخدله ركن بقه علي جنب ويقعد يفتكر إنه كان هيموت ويجيب في تاريخه الأسود ..وبعد عشر سنين يحكي لولاده إنو كان سبيح وإنه إتصارع مع قرش
قبل كده.
  دلوقتي إسنوركلنج ودايفنج وإنك تعدي البحر وماتتبلش ,
وبمناسبة تعدي البحر دي ..أنا الحمد لله حسيت إني عديت البحر قبل كده .. ودا مش مجرد إحساس دا أنا فعلن غطست.. وغوصت وفضلت أغوص ..وأغوص حسيت إني جبت الشط التاني علي الجانب الآخر من البحر ,ومديت إيدي مسكت حاجة ناشفة .,قلت أكيد دا الرمل في اليونان ..فجأة سمعت الراجل اللي قدامي بيقول (سيب رجلي ياحيوان ياللي تحت) أتاريني إتشعلقت ف رجله بعد ما قلبته على وشه في الميـّة..بعد ما كنت إتحركت بضع مليمترات عن مكاني.
,إن كل قصص الصداقة اللي قرناها ف الكتب كانت من ذاك الزمن.. ك درس الصداقة بتاع رابعة إبتدائي وأبي يعمل ..وأمي تعمل..وكلنا يعمل ..        دا حتى على المستوى الشخصي كماان .,زماان كانوا يدلعوني في البيت بأسامي البنبوني والأكلات اللي يحبوها  وكإن معَزتي عندهم أغلى من الماء والزاد ..وأصحابي كانوا يدلعوني (تقاوي ..  
ربما ما كان علينا أن نأمن غدر الزمان .,الآن يدلعني والداي (إنت ياله) أو أحيانا دلع لا يضمن لي سلامتي الآدمية .. اما أصحابي فينعتوني الآن ب(خبلانة
حسبُنا الله.
الشيئ الوحيد الذي أكيد كان  زمان ولسه دلوقتي ,
أن أمي  مازالت تضع البتنجان علي التورلي,.,وتقتنع بالطماطم كفاكهة,وإن لسه فيه حد بيجيب مقبول .,
أو إنك تروح مكان تلاقي زحمة مفزعة ., وأشكال عجيبة (مفزعة برده) بعضهم يرتدي نصف لبسه., والبعض الآخر يرتدي النصف الآخر وآخرين مجردين من ثيابهم ببركات صاحب ' المولد
والغريب أنك تلاقي الدنيا شتيت هناك في مكان المولد  فقط.. حتي ما طرطشتش علي الشارع اللي عالناصية ..مولد مين ده !
ويعني إيه مولد !
يرد راجل عجوز : إستغفر ربنا يبني ما تئزيش نفسك دا مولد سيدي هاني
هاني مين ياحج..
وتنطق زوجته الغير معروف مصدر الصوت المنبعث منها ;شلاه يا سي هاني,
سي هاني مين يا ست إنتي
في حد إسمه هاني ..
ويعني إيه شلاه ,
ودا كان  مين سيدي هاني ده كان بيفتح الكوكا من غير فتاحة,ولا بيولع البوتاجاز بدون كبريت,
وتسأل الناس اللي مستنية الحدث ده من عام لآخر اللي يقول دا كان متجوز جنية وكانت بتطبخله الأكل علي رجليها وبتسرح شعرها بهياكل السمك ..(شغل حورية البحر وباربي)
وإنه جوّز أخت الجنية الكبيرة لصاحبه الأنتيم ,جميلة يعني في حماه .,وفي يوم صاحبه حب يتجوز عليها من وراها فعرفت من غير ماحد يقولها
وحاول يقتلها ماماتتش ..,وسخطته كلب شوارع برجل واحدة .. ماتفهمش إزاي,

ورغم ذلك تجد هناك مناصب القمار ,وطبعا طالما في مولد سيدي" توتي" ده يبقي مش حرام .
والفشار اللي طعمه بلاستيك من أبو شلم
;زمان كان فيه شلم..;شلن بلغة أهل الغرب; (..وهو شيء مدور من معدن تحصل به علي شفقة من يراه بيدك ..الآن استـُعمل لسد خـُرم الربع جنيه ليصبح   جنيه في النهاية ,حسب بعض الأقاويل)
و اللي مابتخلفش تروح بقه ترابط هناك .,مش كده وبس دا اللي عنده جاموسة ومش بتخلف هي كمان يوديها  ..هناك يتساوي الإنسان والبهائم في نيل البركة ..وأما عن فرقة اللي بيفقـّروا ..والراجل يفضل يفقـّر لحد مايدوخ ويقع عالأرض .. وبكده إتغفرتله ذنوبه ..الله أكبر
رغم إن يفقر دي يعني يتمايل يمنة وشمالا كالحركات الأولي في أداء رقصة هيب هوب


ناهيكم عن طهارة العيال بيد أمهر الحلاقين .. والبمب والحلبسة والمراجيح.. 
لقد كنت ذات يوم بمنزل جدي بالبلد وكان هناك مولد لسيديهم هاني ذاك ,وكنت حينها طفلا بريئا ذي العشر ربيعا .. تفط من عيني الوداعة ,وتعجبت من منظر الأشكال الواقفة علي ترابيزة قمار وتدور الكرة لتقف عن مربع ما.. ,هو محل الرهان
وكنت أمتلك شلنا (;ذلك الذي عرفناه سابقا); وأحببت أن أظهر للواقفين والمارين سوء عاقبة أهل الميسر,لقد طلبت من أحد الكبار الواقفين الرهان لي ..ولفت الكرة وأخذت عقلي يلف معها ذهابا وجيئة حتي استقرت ,وما إن استقرت حتى أعلنت خسارتي وما إن أعلنت خسارتي حتى إنفجرت بالسب والطعن في ذاك الذي خسرني الرهان,
لقد إختفت براءتي..وتغيرت وداعتي ,لقد حولتني المادة لــ"ذئب" غادر.. أهوج ..أرعن..أشرف, ..أجرب
ولا أخفيكم خساراتي المتلاحقة وفقدان رأس مالي كله وإشهار إفلاس في تلك الليلة النحساء من بعد ثروة تقدر بالستين قرشا.
  فاعتبروا يا أولي الأبصار.

احصائيات

  إحصائيات

















­­      العام
وجه
 المقارنة
أول سنة ليّا في الجامعة
آخر سنة ليّا في الجامعة
notes
النوم
نمت 5 شهور في السنة
نمت 4 شهور في السنة

مراهق بقه وكان بيتمدد أثناء النوم
حلاقة شعري
5 مرات حلاقة شعر في السنة

3 مرات حلاقة شعر في السنة

شبيه إنسان الغاب.. طويل الناب ..رث الثياب..مين اللي عالباب .؟؟
طرقعة الأصابع
3251 طرقعة صابع;إيد ورجل;

  1000بس
في السنة
لديه أذن موسيقية
غسيل الأسنان

144 غسيل أسنان
في السنة
144 غسيل أسنان برده في السنة

معفن من يومه
الببي ☺
2000 مرة ببي

2001
يعكس ارتفاع أسهم الببي في البورصة
ضرب الكومبينشن
2031 مرة

2032 مرة

أكيد بيزيد بزيادة الببي..ولا عوزيني ما أضربش الكومبينيشن آخر مرة
حلاقة ذقن
كل فين وفين (والموس كان يطلع فاضي)
7 مرات ف السنة

من أولى جامعة وأنا بترجاها تطلع
غسيل الأطباق
116 طبق مغسول

336 طبق مغسول
حكم القوي .. ومراوغة المذاكرة
شعر الصدر
لا يوجد

/ 31 شعره/
زيادة سنوية تصل ل 14.04 %
حرقت;مش حلقت; شعر إيدي
كنت عاقل
10 مرات
الواحد بينسى والعضمة كبرت (واللحمة كمان) وقفة البوتاجاز بنص كم
فتح باب الشقة
1600
550
كالون الشقة ألماني ...وبيستحمل
قفل باب الشقة
1450
551

­­مقارنة بالفتح ف أولى جامعة:  كان بيخرج وما بيدخلش ..الصايع.
مقارنة الفتح بالقفل في آخر سنة :  (الباب علق مرة) .. حسدتوا الكالون الألماوي ياظلمة
تساقط شعر رأسه
2100

9100
زيادة غدر الزمان بمعدل 50 شعراية ف الغسلة
تحويش
365.25 جنيه

730.5 جنيه

تظبط التاريخ ..على فلوسه
لبن بودره
مابيحبوش
بيشجع لبن الأم
3 كيلو
ما بقاش يرضع من الجاموسة الحلوب *
بن
1 كيلو بن
1/2 كيلو
هتعرف ليه دلوقتي
أخويا كان بيشرب سبع فناجين ورا بعض ويدخل ينام
نسكافيه(اسم المادة وليس المنتج)
100 جرام
1/2 كيلو (عرفت ليه البن قل
ما بجبش نسكافيه لإني مقاطع
رنة جرس الباب
616
صفر
أول سنة في الجامعة : كان بيغتت
آخر سنة في الجامعة: أبوه رباه
طلوع أسانسير
1200 مرة

933
سكن ناس فظيعة في الدور الخامس والسابع ..وأخدوا البتاع لحسابهم
نزول أسانسير
1500
1000
الناس الفظاع لسه موجودين
في العمارة
دش ساخن
3
840
واضح إنه ضد الميّة
دش ساقع
527
270
نضيف  أنضف من أحمد نضيف
قراءة كتب
15
7
جهل ...وابن أبوجهل
وزني
59 كيلو
59كيلو
ده لإن أمه دعت عليه يفضل في الأوف سايد



مما سبق يتضح أن,
يهوى هذا الشخص ضرب الكومبينشن عالفاضي بمعدل 31/365 مره في السنة (راجع مرات الكومبنشن مقارنة بمرات الببي)
ونستنتج من معادلة 2 و 3 :
حبه المفرط للحمام,حيث أن الإحصائيات تثبت أنه قضي   1/6 من عمره بالحمام
مابيحبش الماء الساقعة ,وبيضرب الكومبينيشن عالفاضي .. ولو أمه عرفت هتحطه فيه وتضرب
حوّش كل يوم جنيه يعني (حسبها صح ..وعاشها صح); والله برافوعليك يامدكور ..إقرفه صح .. يقوم يصحصح.


* هناك معلومة أن الجاموسة لو أكلت قصب .. ينزل اللبن منها مسكّر ... وكل واحد حسب سكره يظبط عدد أعواد القصب ..أو يعزم الجاموسة في عصارة وخلاص 
الجديد واللي ما اكتسفتوش البرازيل ..إنك لو أكّلت الجاموسة بُن ... ينزلك النسكافية جاهز .. تاخد منها على بقك على طول (يوجد لَيّ طبي...
" ترقبوا لدينا نكهات أخرى ".


♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠



إـّنا نسخرُ مـنْ الهم ّ
تحظر المدونة على الإخوات الكبار
يكتبها مراهق,
(هذه المدونة)
♣ لكل إنسان جعل من غمه ضحكة يضحكها الناس..فحبب إليهم فضفضته
♣ وإلى من سخـِر من همه, فهانت مشاكله .. وأصبحت ذاتها حل وراحة لمشاكل الناس
♣ لكل أب سمع ابنه وصدقه وكتم سره وطبطب على كتفه وضمّه
♣ لكل من له شعر صدر ..
♣ إلى الصينيين والأفغان وكل من في آسيا ..لقد نسبت إليكم أكثر مما أنسب لبلدي
♣ لكل مراهق
♣ هدية لكل أخ صغير ..أتى للدنيا كرد فعل لزينة الحياة الدنيا ,بعد ما شبع الأب من الخلفة بإبنه الكبير ..الظالم,فاعتبر الأب ابنه الصغير قضاء وقدر

.

.