sms

هل تعلم : 
 يقول الحكيم الصيني الشهير من زماان : (لما تعمل حاجة في حد وهو مش بيحبها ,ربنا حيوعدك بحاجة ما تكونش بتحبها تتعمل فيك ..وتقرفك ..وتفضحك ) الحكيم الصيني سعيد يانج 2.5 ق.م .
لما يكون باباك ذكي ذكاء الرجل الذكي , وبذكاء الرجل الذكي يقوم هذا الأب بتخبئة برفاناته التي يشتريها عن عياله(لإنه عارف إن الرخامة فيهم موهبة) في مكان خفي خفاء الرجل الخفي ., ولم يعلم بأن ابنه الذكي ذكاء ابن الرجل الذكي يتتبع الروائح الزكية زحفاً على الأءناف (جمع مناخير).
نخش في الموضوع : اشترى أبي برفانه المفضل .,والذي نقوم نحن بكل تطفل ومن باب الرخامة لا غير .. بتجربته فقط .. حتى ينتهي على بكرة أبيه ,وأمه .. ومن سوء حظ الابن الذكي ذكاء الرجل الذكي أنه بغبائه الذي يشبه غباء الرجل الذكي قد تتبع البرفان ووضع منه ..بانتقام.. لإن أبوه ضايقه يوميها .. على تي شيرته الأبيض بياض الرجل الذكي .. ومن العمل السيء يُولد الجزاء ..فقد بقع البرفان التي شيرت ..وعندما سألت أمي "قالت : دا باباك هو كمان هدومه بقعت .. بس هو بقعت من برفانه..!! ياترى إنت بقعتك جت منين ..!!" سؤال وجيه من إمرأة رجل ذكي ذكاء الرجل الذكي .. فأجبت : الناس ما بقاش عندها ضميير..أروح فين بس ..أقطّع هدومي يا ناس ..! (نظرة خبيثة من إمرأة الرجل الذكي ..لابن  الذكي ذكاء الرجل الذكي).

تعودنا أن نستيقظ كل صباح على أنغام بعضا البعض تغرد في انشراح ,, صُباع الخير يا حبايبي ..,صُباع الخير يا بابا ,
ويكون ذلك باكراً عقب صلاة الظهر .,
ولكن لأمي -زوجة الرجل الذكي - عادة تختلف كاختلاف ....... فلا يحلو لها تلحين موسيقى الحِلل وعزف نغمات الترزيع إلا بعد الفجر ..ولأن أمي من طائفة "البكوريات " التي تتبع مذهب الشاعر العريق امرؤ القيء الذي يقول في مطلع الكوبري "اللي ينام بدري .. يقوم بدري .. واللي ينام متأخر ..عُمرُه ما يشخـّر" .. وقد رد عليه في هجائه الشاعر المعروف أبو الكسوف "من نام وارتاح ..حيشتغل فلاح .ومن سهر الليالي فدايماً على بالي ..ومن نام بين البينين حيروح من ربنا فين " والتي ردت عليه الشاعرة نوسة قائلة "نوم العوافي يا سبعي يا أحمش من دكر البط .. وإبقى نام حافي ياروحي إليهي تتشال وتتحط" .

تقول الحكمة : الرخامة ما تفوتش على عطشان .,خاصة لو اللي حتفوت عليه هو رجل ذكي ذكاء..... ., عندما قررت أمي أن تلدني في يوم مولدي - مثل هذا اليوم- حيث أنها يوميها كانت ما ورهاش حاجة وعندها وقت فراغ ..خاصة إنها ماكانتش ضامنة ظروف الأيام الجاية ..فملقتش حاجة تعملها فقررت الوضع .
ما كانت تعلم المسكينة أني كنت في الداخل حينها ما عندي علم .. وغير مستعد ..فكيف لها أن تتخذ مثل هذا القرار الأشنج الأحوب ..إفرض كنت قالع ..!! أو بتكلم في التليفون ..!! الواحد ما بقاش يعرف يآخد راحته .. المهم أنا ساعتها كنت قد غفوت بُرهة أثناء قراة كتاب "كيف تقيس حبلك السري" ورواية "مدكور وفرفور " وهذا بعدما كنت قد فرغت من قراءة سلسلة "الجاسوس الدسيس في فن الترفيس". 
المهم استعجلت أمي وقذفتني خارجاً على حين غفلة ..ونزلت فجأة مغمضاً عيني ..طبعاً لإن النور كان قايد ., مما أثار دهشة الشارع أني وبكل جدارة وفي سابقة لم يسبق لها مثيل نزلت من بطن أمي بكوعي ..أي والله بكوعي .. وبرجل على رجل (أليط يا إخواتي  من يومه ..يخربيتي ..عثل ..عثل)
والذي أثار دهشة الشارع كمان مرة غير الإثارة الأولى الذي إدعى بعض أهله أني أعود لسلالة الطمبوس الوليق ..وهو حيوان آدمي ..يأكل ولا يبيض .. وبدون قشرة (الفضل يعود ليهد آند شولدرز). 
ضجرت أمي من ضجة الإعلام ومنعتهم من أخذ صور لي على حد زعمها لأنها كان وراها تمرين الجيم.

 يحترف أبي فن الرجولة ., وحيث أن الرجولة أدب مش لمس أكتاف .,فقد اكتسب موهبته -التي تعلمها بنفسه - من الفنان ممدوح فرج .. وإذا ذُكرت الرجولة ..يجي وراها خير مثال ( لما بيجي أبويا بالليل ويلاقيني نايم .,نومة الرجل الذكي ....., وحيث انني أنام كما ولدتني أمي (أنام بمهارة ..مهارة الرجل الذكي ذكاء.....) .,يقوم أبي بإيقاظي من نوم أغط فيه بعمق ليقول لي بكل هدوء (الساعة تلاتة الفجر وربنا) .."نام كويس يا حبيبي ..وما تعملناش فيها معوق يا بن التييييييييت تيييييت تيييييت ...ثانية ..فاضل حتة تييت )
يقومني من النوم عشان حاطط رجل على رجل ..  ويروح هو ينام برجل على رجل ..!  ألبي وصابع رجل غضبانين عليه ليوم العيد ..!!

ابتلاني الله -وحيث أن المرء يبتلى على قدر دينه- بأخ ليس له تفسير .,
أخويا ربنا يشفيه دائماً لما بضايقه -ودا ما بيحصلش إلا كتيير- ..لا أعرف ما الحكمة إنه يآخد القلم السنون(قلم الرجل الذكي ذكاء...) ويجري بيه لآخر الريسبشن ., وعلى مرءى ومسمع مني (وقلبي بيتقطّع) يقوم رافع القلم لفووق وموجه سن القلم لتحت ..ويسيبه فجأة ..قال عشان القلم يقع على سنّه على الأرض فيتـّني ..لا أعرف هل هذا له علاقة ما بالعقل ..ووظائفه 
أم انها الطبيعة السادية التي اكتسبها من أفلام محمود المييجي ..أو المايجيش .,و حنروح بعيد ليه ..!!

حد بينادي ..!! 

زرابيح

المشــهد الأول ::

فقط وبعد دخولي الكلية وحضوري المحاضرات
,,علمت فعلا ً أن أروع نوووم رأيته وحسيت بيه ..هو نوم المحاضرة على أنغام صوت الدكتور اللي بيتكلم هناك ده مش عارفين ..ولا هوعارف .. بيقول ؟إيه اللي بتشرح (على حسب المادة),, وفي ظل الدفء الصادر من حشرجة الأنفاس داخل المدرج لكثرة العدد .. خاصة في وقت الشتاء,,فتشعر بالراحة وضرورة القيام بواجبك الذي يناديك .. النوم ,,النوم


,
1- المشهد الثاني (عليك اللعنة)

بقالــي كام يوم بقوم من النوم متعور.., أيوالله متعور ,, وفـي كل مــرة تكون التعـويرة في حتة شكــل , والصراحة الفار بدأ يلعب ف شعر صدري ,,ولا ّ يمكن الفار نفسه -اللي بيلعب في صدري- ,, بدأ يصيــع ويلعب في جسمي كله ,؟؟, ويعورني كمان !!,,الله أعلم
على العـلـوم حبقـى أحط سم ّ فران في جيوب البنطلون , وكمان في الجيوب الأنفية ,, وأرش " بادي فليت " برائحة شراب الجزمة (مفعوله أحسن من "بادي اسبراي",, وأرخص) ,,
والأغـرب من كده إن التعويرة لما تيجي تخف ,برده بتخـِف من غير ما آخد بالـي ,, مش معقول ,الفار ده دكتور ؟؟ ولا الموضوع فيه إن ّ وإخواتها الصغيرين !!
أم أن هذه : هــي اللعنــة ؟؟ لعنة مدكور ,وولاده !!!!!؟؟؟؟؟
,
المشهد الثالث
(اللـبـذورة )

بقالنا كام يوم عايشين على التحالي الطبيعية (اللي هي الفاكهة يعني) والتي تتألف (يعني تتكون) من الســـفـنــدي ,, أو اليوسفــي(,,دا الدلع) ,,
دخل علينا والدي مدكور (حفظه الله من كــل بـِذر) بـبـوتـقـة يعني قــُـلـّـة مـن اليوسفي من خيـر ما لاقت يداه (تلاقيه صدمـُه من حد غلبان) ,حوالي تمتميت كيلو من السفندي الذي لا ينتسب بالمرة لعالم الموالح .. ولا العــواذب
في البداية حسبت أنه (مدكور ) ورث هذا الشــيء عن آبائه وأجداده العظمااء,, وأنه وزع التركة مع الزبانية إخواته ,وورث هو جـدي فـي
سفنـدييه ,, الله أعلم برده
المهم (وأنا مالي) ,تـنـينـا نآكـل(أنا والبحاطيط إخواتي) في السفندي لحد ما بقينا بنبـذ ّر ,
أيوة بنطـّلـّع بذر يعني
وبالمناسبة جـالـلـي سؤال طلـّعـللـي فـصّ في دماغي ,,

لماذا لا يوجد للإنســان بــِذر ؟؟!!

,
.,المشهد الرابع
إمم
تمُؤ أوأو ,, وتأوو إييَه إيئيأ أه أ أ

الكلام اللي فوق ده كلامي ,,ومحترم جدا بس انا اخرصيت ..أيوة يعني بقيت أخرس ومحدش حيرضى يتجوزني ,,وأبور ويقولوا عليا ذو البق العانس ,,العابس
كله بسبب هربس ,, (فيرس حدانا في النجع
ما بقتش بعرف أبوس ,, الفيرس باسني في بـُقي (فمي )يا حاضرط البكباشي
جالي نتيجة نقص البتاعة ,,أقصد المناعة وطلعلي في بقي
وأصحابي بقوا يعيروني بفيرسي ,, ويقولولي يا هربس ... واد يا هربيـيس
رحت للدكتور أو لعمي لإن الدكتور في نفس الوقت يبقى عمي ,,أو بمعنى آخر عمي في نفس الوقت الدكتور قاللي على مرهم..أو جِل يعني ,, أعوص بيه بـُقي وأعمله سبايكي ,,وإن شاء الله الفرج يجي من عند الرب
وقد صبرني قول الشاعر المـُتعري
( لا يسلم البـُق الرفيع من الأذى حتى يدهن على جوانبه الجــيل )
وقولت وماله ,,
بس قاللي إن الجيل ده حدهن مرة واحدة وتلاقي الهيربس ده راح ,, أيوة راح
ياله من جيل مرة واحدة وبس .. !.,وبس.!
بس أنا اشتري جيل ؟؟,,وواضرب بـُقي جيل .. دا حتى تبذيير وأكون ساعتها
إنسان بزيء واستاهل اللي في بـُقي (يعني فمي برده)*..وأصحابي يقولول يا بزيء ,,لا لا لا
أعوذ بالله من الشيطان الرجيم
,

خطاب لسيادة وزير التعليم العالي

"أيها سيادة الوزير أوجه لسيادتكم إلتماس إني والنبي والنبي ياوزير مش عاوز أمتحن
"عشان خاطري"
ولكم منا كل الشكر والتحية والحاجات الحلوة
وربنا يخليهوملك يارب
ويطول في عمر حضرتك
ويطول- برده- في فترة مرجعاتك قبل امتحاناتك
ومايكتب عليك الدور التاني -أبدا- قادر ياكريم
ولايكتب عليك إنك تمتحن شفوي المادة قبل النظري
والسلام عليكم ورحمة الله


,

الحمدلله .. غيرت الموبايل ..ماهو ما كنش ينفع أخش مرحلة التغيير الجديدة بدون ما أغير الموبايل
صحيح الموبايل القديم دا كان حلم ليا في يوم من الأيام واتحقق .,لكن برده مافيش حاجة بتفضل على حالها ..
الموبايل الجديد رغم إن حاله على قده وشبه صابع الجلاش لو ركبوله شاشة ..,والكاميرا بتاعته لما تصور بيها صوتها كإنك ضربت رصاصة , لكنه خفيف على جيبي وأحسن من الموبايل القديم اللي كان عامل زي نص قالب الطوب وكان دايمن مسقطلي البنطلون ,من يمة واحدة ..
كفاية حتى إنه بباب .,الواحد كده يحس كإنه من اليايان وهو شايلة زي ما بيجي في الأفلام إن البطل دايمن بيشيل موبايل بباب لإن ماعندوش وقت وكمان بيمرن عضلات صابعه الصغير بباب الموبايل.. وكمان لما أنهي المكالمة أقوم أرزع الباب بإيد واحدة وأحس كده إني راجل وبزهق وليا غضبات وزهقانات تُحترم .


ماتخدش ف بالك










صباح المسائيل...بالصبح وبالليل











بـُص يابنـــي إنت وهــوّ .... سلكلـي ودانك من برّه ومن جوّه


واسمع كلامي ..هزار معنديش ....أنا خُلقـي ضيّـق فمتخنقنــيش

 


اللــي يقوله المسئــــول ....نفــذه علــى طــــــول


وإن إداك حاجة .......... حطها في التلاجة


ولو زعلك مرّة .......... سيبه واطلع برّه


وإن إتزهّق عليك .......... شهّد اللي حواليك


واحفظ اللي يقوله ..........واشتكيه لمسئوله


وإن برّقلك بعنيه ..........قولّه : بتبُص كدا ليه


ولو حاول تعزيرك ..........عيـّـطلُه بمناخييـرك


معنــى إنك تتعذرّ ........ يعنــي شرفك بيتبحترّ


والأخ من غير شرفه ........ بتنجـــانه بتتبــذّر

,نسيت محفظتي وأبويا مذنوق ...... دا ردّك تقوله ،وصوتك مخنـــوق


حتصعب عليه ومسيره يفوق ....وبرده مسئولك ,على راسك من فوق





حلو معاك ,صاحبك وشريك .......... دخلنا في الهزار :حاسب لأخفيك


أنا أخ برده ودايس في الأخلاق ....... ومعدي في الدين والطاعة والولاء

يعني تحرّس مني ّ..اشيلك في الننـّي...وغصب عنـّي....... حستحمِل بهدلتك ........بس ورجولتك ،،لتسمع عنـي ّّأحلــــــــــــى الأسماء,


حقدملك في الدعوة ..أفكاري وإبداعي ولأصحالك ليلي ...وأنسالـَك أوجاعي وأعصرلك مناديلي ...ومن أي فرفور ...أعملـّك مسئول





على فكرة أنا بحبك يا مسئولى....... وحنفذ فورا كل اللي تقولهولي


بس ياخـويا وحِياة الغالــي ....... خليك حنيّن واظرفنــي عالي


ودايمــا ً على بالــي ...وأمل حياتي المقتول ...نفسي في حتة مسئول,




وربك ما تنساني.............. دا أنا بيك مشغول
والله فاكرك ............ بالعرض وبالطول
وحتفضل حبيبي ............ وفي عيني زغلول
ويارب صبرك ............ أهي شدة وتزول,



ودايماً بنقـول ............ لأحلـى مسئول خليك بينـّا ............ دايماً على طول,
ويارب صبرك ............ أهي شدة وتزولويارب صبرك أهي شدة وتزول

وطبعاً اللي قال القصيدة هو شاعر العصر المعروف :
إمرؤ القيـيء

رخامة








في يوم من أيام الماضي ..
لا لا ..بداية وحشة
زمااان لما كنا ..لا لا برده ..,قديمة
مرة وانا ماشي (يووووه )
وإحنا صغيرين 
كنت أنا وإخواتي نخرج في الحر القيالة نتسكع في الشوارع في بلدنا زي الكلاب الضالة (أيوة دي حلوة ) .,
نغتت على خلق الله  ., أفتكر مرة مشينا لحد ما لقينا واحدة ست شايلة حاجة ساقعة وعندها ضيوف ,
أصل الحاجات دي ما كناش نشوفها غير لما يكون فيه ضيوف أو حد فينا مطـّاهر ., المهم مشينا وراها لحد بيتها عشان نآخد الغطا بتاع الإزازة عشان كان فيه مسابقة مكتوبة على الغطا من جوة (مبروك كسبت واحدة مجانية..,) أو تجمع أجزاء العجلة وتكسبها ..
وكان الجزء الناقص دايما هو الجادوون .. فأخي الصهيوو... أقصد الوسطاني ,قال : ( أنا حاسس إن الإزازة دي غطاها فيه شكل الجادون .. , يلا .,
وافق ذلك التوهم شيء ما من نزواتنا الفطرية (لي ولأخي الأكبر .., واستجبنا لإلهام أخي الأوسط .. ورحنا على الست دي نطالبها بغطا الإزازة ..!
الست طردتنا بكل جهبزة (؟؟؟) .,  دا اسمها أمـّونة .! الموقف حـزّ (حـزّ _ يحـزّ _ محتـزّ) في نفسياتنا قوي (انجرحنا من الآخر) , أه .. (صوت الحـزّة في نفسياتنا) ., وانا بنجرح لقيت في وشي حنفية ميّة .؟ رحت رايح على حنفية الميـّة  .. وفتحتها وجريييت ..  ..وكانت جميلة جدن .. فوقفنا قدام بيتها نعاكسها ونغنيلها ( أمونا بعتلها جواب ..أمونا ولا سألت فيا ..أمونا عايز الأحقاق (جمع حُق وهو غطا الإزازة) أمونا ردي عليا ..يا أمونا ..يا أمونا ... فعلنا ذلك لنثـتثـير زوجها .. ليعطينا الغطيان .. ولكن .,لم يكن ذلك هو السبب الرئيسي ..
دي الرزالة عندنا وراثة .,


فاكر مرة (المرة التانية) .,برده في البلد لنكمل التسكع, زغلل الشيطان عنينا بشجرة المانجو .,وعلى رأي الشاعر إمرؤ القــئ : مَن سرق المانجو ..فلن ينجــو
وأخذنا بندقية الصيد .,وتوكلنا على الله بقيادة أخي الأكبر حماصة .,
وأثناء الطريق كانت ضمائرنا تبـُظ علينا من كل حدب , سأل أخي الأكبر : هل ما نفعله حرام ! .,(وعلى مر السنين عرفت أنه عندما يسأل أخي الأكبر عن شيء هل هو حلال أم حرام .! ,اعلم جيدا انه يعرف ويتيقن أنه حرام ولكنه يريد أحد أن يوسوسله بأنه حلال ليلقي بالذنب على الأخير .. هأو.,
رد أخي الأوسط : لا لا حرام إيه , هو إحنا زارعيين مانجة ؟؟
رد أخي الأكبر : لأ ( بدهشة
فقال أخي الأوسط : خلاص يبقى مش حرام .,لكن لو إحنا زارعين مانجة وسرقنا مانجة تبقى سرقة .,لكن إحنا مش زارعين ., وبعدين مش الأراضي دي كلها بالزرع اللي فيها بتاعت ربنا .,صح ؟؟
أخويا الكبير : صح .,(برده باندهاش
أخويا الأوسط : وإحنا كلنا بتوع ربنا ,صح ؟
أخويا الكبير : صح ,
أخويا الأوسط : خلاص يبقى حلال ,
أخويا الكبير : يااه ,كانت غايبة عني فين دي .! الحمد لله
أنا :(كنت حاجة صغيرة كده ماشية جنبهم) : يخربيت اليهووود (في سـرّي.,فكرني بفيلم الزوجة التانية لما كان عايز يتجوز مرات شكري سرحان .,وأطيعوا الله وأطيعوا الرسول وأولي الامر منكم ... ,فرد عليه : يا راجل يا كــا ا..),

وبعد إطلاق اول طلقة في أول صابع مانجة , لقينا صاحب الأرض جاي يهرول ناحيتنا بما أوتي من عزم ,وجاي بقه يعرّفنا إيه هو الحــرام .!

أخويا الكبير كان دايمن طيب .,وبيتوتر وآخره يسيبنا ويجري ..بس من جواه يهودي ., فقال لأخويا الوسطاني أبو قلب ميـّت : واد يا تيييت , حنعمل إيه ؟؟(بكل رعب
أخويا الوسطاني (بما أوتي من بجاحة ..فهو كوز بجاحة .,)قال: إحنا نعمل فيها هـُبل ,فنصعب على الراجل ..ولو ما دخلتش عليه .. نعمل غلبانيين ونقطّع هدومنا ..
جه الراجل صاحب الأرض (بكل غلظة واشمئزاز : إنت مين ياد إنت وهو ؟؟.

أخويا الأوسط : صوت عوااااء ,وهو يشير إلى بطنه كأنه جائع ..,مع تعابير وجهه التي توحي بأدنى معايير البؤس ..بعد أن أخفى الشووز وأصبح حافيا ليسبك الدور ..,
الراجل :إيه ..! بتقول إيه يابني ؟؟ يا بني إنتوا ولاد مين ؟

أنا : وبكل هدوء خلعت حذائي واستعددت للفرار .,

أخي الأوسط :
جعاان يا عم , وأنا غلبان ,
الراجل : طب إنت إبن ميين ؟؟ ,

إحتار اخوتي أمام هذا السؤال ..جالك الموت يا سارق المانجة ,
بسرعة ..نطق أخي اليهوو ..أقصد الكبيير : دا واد غلبان يا عم ,
الراجل : طب إنت إبن ميين ؟ (جاوب بقه يا عاقل يا رزين .,

لم يجد أخي أعظم شرفا من عمي أخو أبويا لينسب نفسه إليه لئلا يذهب الرجل لأبي ويسوّد عيشة أخي , وكأنه بذلك قد ضلل الرجل وأبعد تفكير الرجل تماما عن هذه العائلة المحترمة (عقله الصغيير بقه ..دلوقتي الحمدلله عقل شويه
فرد أخي الكبير : ابن الدكتور تيييييييت .,
أحرج الرجل حينما سمع ذلك : وأعطى لأخي الكبير مانجو .,وهمّ بالجري وراء أخي الأوسط (ابن الناس الغلابة .,وفي لمح البصر اختفى أخي عن طريق الرجل .,
تبسم الرجل لأخي الأكبر فهو ابن الناس المحترمة .,وقاله : سلـّم على بابا (بكل احترام ,فالواد شكله حلو وشايل بندقية صيد ومن عيلة تيييت .,
(يا ليلتك السوده يا خويا..
التفت الرجل لي : وقال (بقرف .,حيث أنني كنت وانا صغيير أشبه القرد ..لا لا كان القرد هو من يشبهني ):و ابن ميين ده ؟؟!

لم يحتر أخي الكبير كثيرا في الاجابة فرد : ما اعرفوش ...
وبسرعة البرق وجدتني أجري ..والراجل يجري ورايا ...وانا آاااااااااجري .., والراجل يجري وراااااايا ,وانا اشتمه (يا راجل يا عيــّييييل .., وفلت ُ أخيرا من قبضته والتحقت بأخي الأوسط ..واكتشفنا ندالة أخي الأكبر ,وكيف انه باعنا بصباع مانجو ..لا يسمن ولا يغني من جووع ,وخاصة إنه ما رديش يديني منه .,

والتحق أخي الكبير بنا وهو يمشي في اطراب ويأكل صباع المانجو ..,

نويت ان أسبق أخواي ّ للبيت لأحضر للوشاية قبل ما تحمض ويكون طعمها ماسخ .,
وما صدقت لقيت بابا .. تن تتن تن تن
وسردت له كل شيء ..كلّ شيء .,ما فيش أحسن من الصراحة .,مش عشان يعني أخويا ما إدانيش من المانجو ..نو ..إطلاقن بقسماطلي ,
وسألني أبي : وإنت كنت معاهم ؟؟ ( ولإني أعرف أبي جيدا .., قلتله : أه , وانا آسف يابابا ومش حعمل كده تاني .,

أعجب أبي من صراحتي .,(قلتلكوا أنا عارفه جيدا ... أساليب صهاينة) .,واكتفى بسكعي قلم (حاااااااار ., على أم قفاي ,
واستعد لاستقبال أخي الأكبر (القدوة .., من أول الشارع ,

وبكل هدو اصطحب أبي أخي من غير كلام ..إلى بيت جدتي ...,,
يوميها نصب أبي له منصة ,كمن سيقام عليه الحد ..

(هدووووووووووووء) خارج بيت جدتي في البلد.,
والله يعلم ما بداخله
وبعد هذا الهدووووء يخرج عوااااااء (غير نوع العواء الأول )..وصورة كائن منتفخ يتحرك بصعوبه ....

أخي المتورّم .,

كنا بندوّر على حتة في جتته سليمة يعرف يقعد عليها ... ففضل واقف ..
وكان هذا أول درس بمعني السرقة ..وعقوبتها
أخدناه ,كان أخويا الكبير أياميها في رابعة ابتدائي ...

وكان الدافع في دا كله ..مقوله سمعناها : من واحد خبييث إن الحلال مالوش طعم ؟؟ والحاجة اللي بالساهل ما بتبقاش حلوة ؟؟. والفرجة على الأفلام العربي كتييير ؟ ..أو ربما هي الرخامــة ..,
ومما كان قد أزاد الضرب ..بل العجن له ,إن لما بابا سأله .,قال والله يابابا أنا قلت حرااام ,أخويا تييييييت (على أخويا الوسطاني) هو اللي قالي لأ .. قلتلكم يهودي .,

حاكم هو كداب كدب الإبل ..وأنا عارفـُه ..,
وأنا الصراحة ما أرضاش بكده ... ولا إيه ..!
أسكت على الحرام يعني .. ولا إيه يا جماعة ؟؟؟

ما بترضووش ليه ..؟
إيه .!

ب , م


, ب , م

, لولا الباء و الميم

, لما استطعنا تمييز :
, الزبالة عن الزمالة ,
, والبانجو عن المانجو
, واستحبوا عن استحموا
, وبابا عن ماما
,
وعملاً بقول الشاعر (إمرؤ القيء ) .. الذي يقول :
خش في الموضوع ... والقميص مقطوع
,
,فأنا عائد من عند حــــلاّق .. وبيحلق


أبويا : يابني حرام عليك ,هو مش إنت من يومين لسه حالق ! .. هو أنا بشتغل لحلاقتكوا وشحن موبايلاتكو ..نفسي أعيش يابني..نفسي أعيش ..,حرام عليكوا

أنا: كنت بحلق أربع مرات في السنة ماكنش عاجب .. وقولتللي ما تربيش شعرك دا فال وحش ,أحلق كل شهر مرة تقولي : كأنك كتكوت وغرق في مسقة المية .أعمل إيه عشان أرضيكوا ..أعمل إيه ..أعض نفسي .. ولا أقطع وداني ,


أبويا : يابني على العموم حلقت شكلك وحش ..سيبت شعرك برده شكلك وحش ,أعمل فيك إيه بس,أركبلك جنوط ..!

أنا: هو إيه ده .! مش كفاية ., الحلاق واللي عمله كأني رايح أستئصل وداني ..ما بطلش أكل فيها ..كل شوية (أه) ..سوري ., (أه) ...سوري ..,لحد ما بقت حمراااااااااه (وداني ...ها) من كتر ال سوري ,قصدي من المقص ,وكمان كتفني ورقمني ونسيني على جنب ,كأني جاموسة في مدبح ..وقال معليلي الكرسي عشان يطول .. حسيت إني مرفوع في بنزينة وبتشحـّم ,وخنقني ببالطو باتمان اللي بيحطه بالعكس ده ..بيشوك قوي ,اللي بيحصلـّي دا كتيير ..والله كتيير ,وبيحلق في شعري وعينيه في المرايه اللي حاطتها جنبيه عشان تعكسله صورة التليفزيون ,

أبويا : والله بيفهم .,هو شغاال في وزارة المساحة .؟

أنا: أه شغال مســّاح ..!


أبويا : طب هو مش عاوز صبي ..؟

أنا: مش عارف والله يا بابا إذا كان بيحبهم ولا لأ .,


أبويا : يحبهم ولا لأ ..! هو أنا حوديله قطة ..! يا حيوان بقولك صبي حلاق يشتغل على إيده ويتعلم .

أخويا الرخم :
يدخل في الحوار ببجاحة القطة الجربانة ,والله فكرة يا بابا ..دا حتى مستقبلهم باهر وبتنمي مهارات البرود والتناحة .

أبويا : إخرس ياله .,ياللي شبه البطريق إنت ,دي تنفعلك لما تطرد من شغلك ,قريب .

أنا: هو إنت بتسأل ليه يا بابا ..؟


أبويا : البواب ..البواب قايللي عاوز يشوف لإبنه صنعة تنفعه .

أنا: والله كويس ., بيأمن مستقبل إبنه يعني ., فعلن ..إحسبها صح ..تعيشها صح


أبويا : إنت شيوعي ياد ؟؟

أنا: لا يا بابا لا ..دا مثل رياضي


أبويا : أه رياضي .. بيلعب في مركز الشباب يعني (بتأليس وسخرية وإزدراء

أنا: لأ ..بيلعب في مركز التفكير والذاكرة

أبويا : ألـّه ..ما إنت حلو أهو ., وزيــّـنا , أمال عاملنا فيها ذات البوز الشبرين ليه ., ., بس والله نعيمن ,تسلم إيد اللي حلقلك ,كفاية بس إنه قدر يتعامل مع استراتيجية دمااغك ,وما إتكعبلش في المطبات اللي فيها ..انا عارف كانت أمك بتولد على أسفلت لما نزلتك ..,!

أخويا الرخم برده : لأ .. دي كانت بتتوحم في قلقاسة ..عشان كده طلعت راسه مخبطة .,

تدخل أمي وهي تنادي عليّ ..وفجأة
تسقط السكينة والبصلة من يدها وتقول : ها (شهقة) مين عمل فيك كده يا بني ..!

أخويا الرخم : هههههههه

أنا : عمل إيه بس يا ماما , ما أنا كويس أهوه

أمي : كويس ..! ,لا مش كويس ..أنا سايباك الصبح غير كده خالص

أنا : غير كده إزاي يعني (بتعجب واستنكار

أمي : يعني ..., فيك حاجة ناقصة

أنا : لا , أنا زي ما أنا ,.أنا بس حلقت

أمي : إيـه , يا ألف مبروك

أنا : وفي سري ) إيه العيلة الغريبة دي ,

أمي : بتقول إيه ياد !

أنا : ما بقولش

أمي : لا قولت

أنا : ما بقولش

أمي : أه ,بحسب

أنا : إرحمني يارب , مش كفاية شلفطة الموس في قفايا ..وقال بيقوللي ( الموس عورك في قفاك تعويره ,صغيرة ,معلش بقه عشان تبقى مسامح .! , أرد أقوله إيه ده ., أتصدق على آخر رمضاان بتعويره في قفايا .. وبعدين أبويا يضربني كده إزاي .. ! ويعني الموس هو اللي كان جري منه وراح معورني ..موس شقي ..شقي خالص ,عفريت قوي

أمي : بتقول إيه يابني .,إنت بتتكلم لجوه ليه ..,إنت بتخاف تعللي صوتك تجوع .!

أنا : هو إنتي مش سامعاني .,؟

أمي : إستنى كده .., لأ مش سامعاك

أنا : لا لا ولا يهمك ..,العيب من عندي أصل أنا شبكتي ضعيفة

أمي : مش إنت فوده فون ؟؟

أنا : فوده فون ., أه ..
فوده فون وحازم فوده فون ..وكريم فوده فون
أمي : ألــّه ., إيه الحلاوة دي ياله
أنا : دي مش حلاوة ., دي مربى
أمي : وكمان بتهزر ( قلم على القفا
إمشي يا زبالة روح قوّر البتنجان .,وإحشيه ..وما توصلش المقورة للآخر .,وخلصه وخش على الكوسة ..وبراحة ولو خرمت كوساية واحدة حخرمك ..فاهم
أنا : تخرميني ..! في رمضان ..! يا ساتر يارب ,












b

أبي : يابني .., فيه حد بيفطر على كبده ..! .,الناس بتفطر على تمر ومية .,إنت حتهبلني يابني..!
أنا : (فم منتفخ .,وسكوت تام).
أبي : اللهم إني صائم .,(بحنق) .,صبرني يارب ..يارب ترحمني بقه .. يارب ..يارب .,
أنا : إيه يا با ..(مالحقتش أكمـّل)
أبي : بس ..بس ..قلنا ما تتكلمش والأكل في بقك ..إبلع ..إبلع .

:::::::


.,قبل الفجر بربع ساعة .,أمي بتصحيني أسحــّر .,فسؤال بديهي تلقائي مني : هي الساعة كام يا ماما .؟؟

أمي: قوم يلا يا حبيبي ,فاضل ربع ساعة على الفجر .,

أنا : طب وإيه اللي زنقنا على كده يا ماما.,ماهو الليل طويل .,
أمي : معلش يا حبيبي ما هي وقفة التروايح بتتعب .,والشيخ مابيزنقناش غير في الركعتين إللي بعد خطبة الاستراحة عشان ما يبقاش فيه مفر ..ومانمشيش و...
أنا : طب خلاص يا ماما .,إنت عاوزه إيه دلوقتي .؟؟
أمي : لا يا حبيبي ..عوزت الكفن ..قوم ياله إتسحر من سكات .. ولو مش حتطفح نام ..من سكات ,
أنا : طب وأنا حلحق أعمل إيه في العشر دقايق دول ., دا أنا على ما أخلص الجملة اللي بقولها دي يكون خمس دقايق عدوا..!!؟
أمي : خلاص يا حبيبي ,نقضيها تمر بقه النهاردة ., عشان الوقت
أنا : تمر .. دا أنا أكلك .,ليه هو أنا عندي سنام في ضهري بيصبرني بالنهار ..,أنا حاكل وماليش دعوة ..بصي إقفلي الشباك عشان ما نسمعش الأذان ..وعللى التليفزيون على الآخر ...وسيبيني آكل بقه ..حرام عليكوا

وعلى أمي ما راحت تعمل السحور .,كان لازم أختصر الوقت وأكيد المية مش محتاجة توضيب ..قلت أشرب لحد ما الأكل يجهز .,وحتى عشان كل حاجة تنزل من مكانها وبإنتظام .,, لا لا أنا في النظام ما أعرفش بطني من ظهري .

الحمد لله المائدة تم تجهيزها بالماء الساقع والماء الفاتر وماء الحنفية والعيش الأبيض والعيش الفينو والعيش التوست ..و الملح .,
بس وطبق واحد فول تدب وتهرول نحوه عشرة أيادي كاملة الأصابع (عشرة في عشرة ... يبقوا) وطبق جبن من هول المنظر قد تحول للون الأرمادي ...

كلنا (في نفس واحد) : ماما ... بابا ... إيه ده ..إيه ده ...!
أمي ,وأبويا : بس بس ..إخرس يا حيوان منك له .. هو ده النظام , رمضان عبادة وإعتكاف.,مش أكل وإعتلاف .,ثلث لطعامك وثلث لشرابك وثلث لنفسك
أنا: بس ...!
أمي: هوس ..


لأ .. لأ بجد .. كده حرام ( في سري طبعا ..
أنا: الحمد لله
هم : رايح فين
أنا :شبعت ..شميت الأكل وكأني كلته .. سبحان الله ..رمضاان بقه يا جماعة ..
هو كمية الاكل دي مش محتاجة تتشم عشان تخلص .,كفاية نبصلها حتكش وتتكسف ..

وياعيني دخلت أوضتي(غرفتي يعني .. ويعيني طلعت من التلاجة حلة المحشي يعيني بتاعت الغدا السابق ..ويعيني أكلتها ..يعيني كلها وقسـّمتها نص لطعامي ونص لشرابي يعيني.... والنص التالت خليته لنفسي . .. وبعدين النهار لسه طويل وكلها ست ساعات والاكل حيخلص من بطني ومش حعرف آكل ولا أشرب وحيبقى 100% لنفسي .. وبعدين أنا حنام ,فمش ححس إذا كنت عايش ولا ميت أومخنوق أو منشرح أوعاوز أتنفس ولا لأ ..
عديها على خير يا رب .,بطني بقت عاملة زي إنتفاخ التواليت ..ومتحجرة من اللي فيها ., هوأنا أكلت إيه بس ..دا انا حتى مقــنــّع جدن ..,ولا فيه زييّ في الزهد وكبح شهوة الطعام ..يعيني ..!,فجأة
آذاان الفجر .,ماما : أشرب ..أشرب
أمي : يابني ما ينفعش .,
أنا : أشرب ..أشرب .,
أمي : ياحبيبي خلاص .,
أنا : حرام عليكي ..حعمل نفسي مش واخد بالي ..هاتي
وما رضيتش أمي تديني أشرب .,الله يسامحها .. دا يا بخت من روا عطشان ..ورب أخ لك ولدته أمك (اللي مارديتش تديك تشرب ., فأخذ أخي (اللي ولدته أمي ) وبسرعة فتح الزجاجة المائية .. وأعطاني ....الغطاء .,وسكبها بداخل بطنه التي تشبه شمسية البحر ... بس من غير بحر ., ولكني قد قررت بعد ذلك بأن أضبط صحوري على الفضائية المغربية ..وفطاري على (الشارقة ... أنا بحب الوحدة العربية ...نداء الشعوب .. وأمل البتاع ... لبيك يانداء العروبة (في رمضاان بس)...ويا أمل البتاع ...!

نزلت أصللي الفجر .. لقيت حاجة غريبة .. الناس كلها حاطة إيديها اليمين على الشمال وفووووق خالص على صدرها ...أو تحت خاااالص .. بعيد عن فم المعدة ., وسطح البطن المنتفخ.. وكل اللي واقف في الصف يشبه
حرف ال بي سمول b )
, وكأن كل منهم قد
ابتلع تلاجتة الشخصية
بصللي جنب واحد شخص,راح سجد وما قمش .,بقه جاي على الفجر ..أبوركعتين ..وتنام ... ورحت ركلته برجللي ,قوم ياعم دا حتى إبليس مأجز ,ربنا هداه وقام وسمعته بيقرا في الركعة التانية حاجة غريبة كده .. هي مش قرآن .,هي أكيد يا مطلع أغنية ..يا شتيمة ..!! رحت زاغده في جنبه بكوعي جبتله زغطة ..فضل طول الصلاة هأ ..هأ .,وأنا خلاص ..عاوز أضحك ..وعزة بطني منعناني .. مش قادر من اللي في بطني .
ولما جيت سجدت حضرتي .. ضيقوا الصفوف عشان تكفي .. وأنا ساجد راح واحد مستعجل وقام قبلينا مع الإمام وكنت انا وراه راح داسني ..لا لا هو مش داسني ..,هو دهسني برجليه على دمااغي ..طلعلي علامة صلاة إسطوانية الشكل وبزجزاج .. بنفس تطريز السجاد .,

أخ تالت بقه جايب إبنه معاه يصليي ..والواد شكله في التلالا خالص ..كل ما أبوه يسجد يقوم الواد يجري يركب على ضهر أبوه .. ولما أبوه يقوم من السجود .,طبيعي الواد يتزحلق (كان نفسي يكون أبويا بيصللي معانا .,,وطبعا الواد بيتزحلق من على ضهر أبوه تبعا لقانون التفاحة اللي وقعت من على شجرة نيوتن في قانونه الاول : أه يا ليل يا قمر والتفاح طاب ..وسقط .. من على الشجر ... فأنصحكم بأن تحذو حذو نيوتن وأن تجلسوا تحت الشجر في الضل .. وتآكلوا تفاح ..المهم جه لما الإمام يدعي ..الراجل خشع أوي (الراجل أبو ظهر ,وأبو الواد المتزحلق.. وبكى في الدعاء
الواد :بابا ,إنت بتعيط ليه ؟؟
أبوه : مابيردش ماهو بيصللي ..!
الواد :بابا ,إنت بتعيط ليه ؟؟
أبوه : مابيردش ماهو بيصللي ..!
الواد لما زهق .,راح مزعق بصوت عالي (يا ولاد العيوطة .. بتعيطوا وإنتوا كبار .. ياولاد العيوطة .,
وأنا خلاص ..مش قادر أمسك نفسي .. بس حاشني اللي في بطني ,أنا عمري ما صليت الفجر بالطريقة دي ...

بس والله والله ..قعدتكم ما يتشبع منها ..(شهقة )..القاعدة دي بتفكرني بنفسي وأنا واقف قدام المراية .. الله يرحمه ..ماكنتش مخليني عاوزه حاجة ,
وأحلى حاجة فرحتلها في رمضاان ..إن قناة موجة كوميدي ..بقه بيجيلها إعلانات ..القناة دي كانت بتصعب عليا جدن ..وبتفكرني بنفسي وأنا مضطهد وما حدش راضي يعلن عليها ..غير زيرو تسعمية اللي مكسبها ما يشحنش موبايل ... وكنت بتفرج عليا بغصب عني كنوع من المؤازرة .. والتعاطف وأروح أنام وأسيب التليفزيون مفتوح عليها ..يمكن شركة الكهرباء تاخد مني وتديها ..!!.. لكن على رأي المثل : ماشربتش من نيلها .,!!
بس مأثر فيا .. إني ولا مرة ..ولا مرة ..
يجي على باللي إن أنسى وأفطر سهوا بالنهار.. مع إني بحب أفطر بالرز .. بس الله يرحم بقه أيام زماان .. أيام ما كان الواحد هناك .. قبل ما يجي هنا .. ويعاني من تساقط لشعر .., كان رمضاان ده الواحد بيقضيه كله نسيان .. وسهوا ,’ والله ما كان بيبقى في نفسي حاجة .. وما أفتكرش إني صايم غير بعد أذان المغرب .. فييييــن ..فين ..ولما حد يزعقله ويقله يا بني بتفطر ليه والدنيا نهاار ., يرد ببجاحة القطة ( إيه ..أنا ناسي ..,


وقبل ما أنسى بس أحب أذكركم بصيام 13 و 14 و 15 من الشهر الحالي ..

نصيحة أخرى ( لو منكم ما أقراش البوست ..







عاوز بنطلون


بعد ظهور النتيجة ,عاوز بنطلون
أنــا :
أمــي :

أنــا :ماما عاوز بنطلون
أمــي :معلش
أنــا :هو إيه اللي معلش ,هو أنا بقولك إتعورت ,يا ماما بجد عاوز بنطلون
أمــي :كام رِجل
أنــا :لا مش كتيير هما رِجلين بس
أمــي :طب قول لباباك
أنــا :نعم
أمــي :إنت ما بتفهمش إنجليزي ياد ,بقولك قول لباباك أنا ماليش دعوة ,أقولهالك بالعربي عشان تفهم ,
أنــا :لا ,,لا يا ماما خلاص أنا فهمت ,,طب ..طب ما تكلميه كده تليني دماغه وتفتحيلي سكة ,وما تقوليليش الجاموسة والدة ..
أمــي :لا يا حبيبي عادي ,أبوك مش محتاج تلييين أكتر من كده هو أصلن في التليين ,من تقديراتك المشرفة ..يا فاشل ..يا وقح .
أنــا :إنت بتنعتيني بالوقح ..واماااه
أمــي :وأمااك إزاي يعني ,جايب تسعة مقبول ,دا أنا لو كنت مكانك كنت جبت جيدة (عشان أنا أنثى ) بطرف السابوه ,يا فاشل
أنــا : أنا مش فاشل
أمــي :يا فاشل
أنــا :ما تقوليليش يا فاشل
أمــي :لأ فاشل .,ومعوق كمان
أنــا :ما تقوليليش يا معوق (بنبرة حزينة)

أمــي :يامعوق ,وقال ايه عاوز بنطلون .. تداري بيه على عملتك السودة ..,حتروح فين من الأحداث !!
أنــا :ما تقوليليش يا أحداث
أمــي :أه , ما إنت حتفهمها إزاي دي , نسيت ياله إنت كنت ناسي ناسي أفكرك ,
أنــا :تفكريني بإيه ,!
أمــي :بالماضي .,أفكرك بالماضي
أنــا :على فكرة أنا ماليش ماضي

أمــي :يخربيتك فاشل وحيوان .,
أنــا :ما تقوليليش يخربيتك
أمــي :يالهوى , دا ساتر من ربنا إننا مستحملينك ,اللي زيك كان يشتغل في موقف
أنــا :فعلن أنا بحب المواقف الصعبة
أمــي :صبرني يا رب
نسيت ياله ,نسيت إيد أبوك ,اه ما هو إنت ما بتشفش قفاك في المراية ,العيب مش عليك ,العيب على المراية
أنــا :إيه يا ماما كمية الأساوة دي ,كل ده عشان البنطلون
أمــي :اللي زيك المفروض ما يبقاش له نفس لا يآكل ولا يشرب
أنــا :ليه يعني ما هو لكل جواد كبوة
أمــي :أه , كبوة ..,أصل الجواد إتكعبل في البنطلون فاتكب ,وإنت يا كتر بناطيلك ,وبعدين ياريتك حصلت جواد ,دا إنت ما جبتش جحش رضيع
أنــا :يوه بقه كل ده عشان بنطلون , أمشي عريان يعني !,
أمــي :لأ إمشي من قدامي
أنــا :كده ياماما ,في لحظة نسيتي اللي ما بينا ,ياريتني كنت قرد عشان ما أشفش اللحظة دي
أمــي :كنت حتبقى قرد فاشل
أنــا :ما فيش قرد فاشل
أمــي :لأ ,فيه فاشل واحمر كمان
أنــا :تقصدي بإيه احمر
أمــي :والله اللي ... إيده حمره , يحسس عليها , آه اتاريك عاوز بنطلون ! ههههههههههههههه (بشماته)

أنــا :ماشي يا ماما , دا بدل ما تآذريني !
أمــي :لا يا ضنايا , آذر نفسك
أنــا :يا ماما إنتي لو شفتيني في اللجنة وأنا بمتحن كنتي قدرتي موقفي
أمــي :لأ يا شيخ ,(فجأة يعلو الصوت) : ما إنت اللي بتبقى داخل الإمتحان والمعلومات متصلبة ,ومربوطة بأستك ..بتخاف دماغك تتهز حاجة من المادة تقع و تنقص جملة , ولا ّ ساعة ما تستلم ورقة الأسئلة وتلاقي حاجة مش عارفها , بتتوتر وتروح الحمام وتلحوس نفسك هناك ,
بتعمل ببيه توتر ..ها
أنــا :هما اللي بيحطوا إمتحانات ,هما نفسهم مش عارفين لها إجابة
أمــي :وإنت بقى بتبقى متوقع يسألوك : جي جي ماتت في الحلقة الكام ..!
أنــا :يا خسارة , يا خسارة يا ماما .., وانا اللي كنت فاكرك ماما ..أنا حموّت نفسي ..أنا حرمي نفسي من البلكونة

أمــي :مش حتموت , حتتعلق في تكييف الدور السابع ,ما إنت أصلك نحس ..,ولو وقعت حتنزل على رقبتك تتكسح وتبقى معوق ونلملك معونة الشتا
أنــا : أمال أعمل إيه .. أعمل إيه .. أروح فين .,.!
أمــي :روح هاتللي أشرب ,وإقفل باب التلاجة كويس ,وبراحة عشان باباك نايم
أنــا :إيه ..! هو بابا جوة (بصوت خافت)
أمــي :أه , وكان بيسأل عليك
أنــا :وقولتيله إيه ؟
أمــي :قلتله , ما عنديش حد بالاسم ده
أنــا :طب الحمد لله ,قلقتيني يا شيخة ,فيه حاجة تتآكل .؟
أمــي :عندك العيش جوة
أنــا :أه , وبعدين
أمــي :بعدين إيه .؟
أنــا :أيوة , العيش ده المبتدأ ,فين الخبر بقه ..الغموس يعني
أمــي :أه , اصلي تعبانة قوي يا حبيبي ومعلش فما قدرتش ,,,آه ياني

أنــا :طب أنا رايح عند مؤمن
أمــي :مؤمن صاحبك , ولا مؤمن آل فرعون .,!
أنــا :لأ مؤمن بتاع الكاوتشوك
أمــي :إيه حتجنـّط ..!
أنــا :لأ رايح آكل لحمة
أمــي :روح ْ,الحقّ عليا إني خايفة عليك تآكل لحمة عيانة , تصحى من النوم تنعر ..وتعمل ببيه جلة
أنــا :يا ماما رفقا ...رفقا بالقوارير ..
أمــي :قصدك رفقا بالحيوان , وبعدين مش أنا قلت بلاش أكل برة البيت ؟
أنــا :ما هو في البيت ما فيش لحمة عشان إنفلونزا الخنازير ,,ومافيش فراخ عشان إنفلونزا الطيور ,هو ليه بس يارب ما فيش إنفلونزا العدس والفول ..!

911


المجلس بتاع الجامعات
وزارة النتايج والإمتحانات والحاجات دي
الهيئة العليا للدور التاني

نتيجة الطالب / دمااغ تعباان
رقم الجلوس : ya3ene
الــمادة
الـتقـديــــــــر
المادة الأولانية
كويس
المادة التانية
كويس جدن
الفارما
إنت غبي ياله .!!
الميكروبيولوجي
دا منظر واحد في طب .؟!
الباثولوجي
بهيم وما بيفهمش .
التشريح
جامد ياله والدكتورة مبسوطة منك
الفستولوجي
حلو
المادة التامنة
حلو جدن
المناخيير والودان والزور tnt
,إليهي يخرب بيتك
التقدير العام : ناجح ع الحركرك ومنقول للسنة الجاية.
إعتماد ............................................................ إمضاء
رئيس وزارة النتايج وكده................................................. العميدة
السيد الأستاذ العالم الدكتور/ عبده ......................الأستاذة الدكتورة/ أم محمد
وألف مبروك للناجحين وسلـّم على ماما .. ماتنساش

(مش عارف أسمـّيه إيه )



































البداية ..
شخص قاعد (هنا) ,عين تغفو .. وتصحو .. ..تتأرجح الرأس يُمنة ويساارن..عدم تركيز وقلة دراية بالجو المحيط .. غياب تام عن الواقع ..,أصوات بعيدة تأتي من (هناك) .. مشوّشة ,ولا تسمع منها إلا طراطيش كلام كأن حد بيشتمني ويجري...
وإذا اقتربت نحو (هناك) فإذا بشخص فوق ..هناك ,قاعد يتكلم ويبص في السقف ويزعـّق ولا يسمع من صوته شيء ..سوى الطراطيش(اللي قلنا عليها),
كان صوته بيفوق الناس من النوم ..أو النعاس ,حيث أنه كان نعاس جماعي .. وفجأة, يشخط هذا الرجل شخطة يهتز لها شعر الصدر ..فيصحو الكل .
إنها صلاة الجمعة .. في مسجد صغير تحت البيت .. في الحر.
كنت بصللـي بعين واحدة بس , والتانية كانت نايمة ,قريت في الصلاة يجي تلات سوّر ,كلهم (قل هو الله أحد)
كنت أسجد ما أقمش غير لما أحس بالهوا جنبي ..اعرف إنهم قاموا ..فأقوم
كان الراجل اللي جنبي ينام ينام في الخطبة وفجأة يقول (عليه الصلاة والسلام) ويرجع ينام تاني .,بدون مقدمات ولا مؤخرات ,,كانت خطبة أرق ,أرق
يعني حتـى الواحد ما يعرفش يآخد راحته في بيت ربنا ..!! 
الخطيب كان بيتكلم براحة براحة لحد ما ننام على التردد الهادي ويجي فجأة يشخط يقوم يفزعنا .. ما هو مش لاقي حد يسمعه وكل ما يبص لحد ,قال يعني متابعه ,يلاقيه نايم ..يقوم متعفرت أكترويزعق
كان عنوان الخطبة , عقوبة اللي مش بيصلي الجمعة , طب ما هو كده الناس اللي موجهة لهم الخطبة أصلن مش موجودة .. بس عمومن محلولة ما هما بيبقوا واقفين في البلكونة ساعتها أكيد حيسمعوا .. يمكن .
أعرف واحد صاحبي بيته قصاد المسجد .. بيشتغل نفسـُه وبيسمع الخطبة من البلكونة وبيصللي مع الإمام من البلكونة برده..
وفي وسط ما الخطبة شغالة تلاقي اللي داخل من باب المسجد يبص على اللي موجود يشوف حد يعرفـُه ويقوم مشاورله .. صباح الفل يا حاج على ويقوله " ما تيجي يا حاج هنا "يعني يجي يقعد جنبه .. يا ساتر,
ووقت ما يقيم الصلاة ,مش أي حد يقف صف أوّل , كان الكابتن (تييت) اللي بيصللي في المسجد كان من زمان كابتن كرة مشهور بيلعب في النادي .. بس لما اعتزل بدأ يلعب في المسجد ,وقف على راس الصف الأول وبس اللي عاوزه يقف إمام حيقف إمام ولا يجد أدنى حرج في إنه ممكن يرجع الأمام ويطلع الحاج (فلان) صاحبه وعلى مزاجُه , المهم جيت أقف صف أول لقيت الحاج تييت ده بيبصلي بإزدراء (إزدرى - يزدري-مودزاريلا)و بيشاور عليّا بأنمـُله (صابعه )وبيقوللي إنت ياله إرجع ورا , تعالا يا حاج (بتاع ) اللي كان في الصف التاني .. وأهو صف تاني صف تاني أحسن ما يحرمني من الصلاة هنا أصلن ما هو مش على مزاجه ,

المهم , اللي وقف إمام حبكت يقرا من سورة النساء .وبعدين النوم وأنا واقف صعب جدن , ولما حسيت إنه خلـّص ..وركع ..ركعت ,وغاب وبقى ونسينا كنت الصراحة عاوز أقوله : حرام عليك الناس فاطره قرنبيط .. طب بلاش في الركوع
وتسمع بقه لما سجد , تنهيده اللي جنبك( راجل كبير في السن ..(سبحان ربي الأعلى ..آه يابا)سمعتها فعلن والراجل ساجد بس كنت حاسس بيه,ووقفت مرة جنب ولد صغير لقيته بيدعي ربنا في خشوع قوي (يا رب الراجل ده يخلـّص بقه) ..


..مع إن الصلاة أيامنا وإحنا صغيرين كانت غير كده خالص كنا بنصللي اللي إحنا عاوزينه في الوقت اللي إحنا عاوزينه .,والله كمان من غير وضوء ,أفتكر مرة حبييت أخطب .. على المنبر ,وكان بظرفها يوم الحد والجو حار جدن فتوكلت على الله ,وكان عنوان الخطبة عن النار وأبدعت بقه (النااار وعذااب النااااار إسوّد إسوّد إسوّد ) بزعيييق (كما كنت أرى الخطيب يفعل يوم الجمعة ) ,وكان جسمي صغير جدن ملهوش ملامح (دا كانت أمي بتدور على بقي عشان تأكلني,كانت معلمة بقي بعلامة)  ,يعني تحس إن حاجة كده بتزعق من فوق ومن حظي إن حارس المسجد كان راجل أسمر جدن أو إسود مش فاكر ,وكان بيصللي ففكر إني بشتمُه راح سايب الصلاة وجري ورايا لحد البيت , 

لكن دلوقتي فأنا بصللي الفجر وبقول التحيات وجنبي اليمين على أقرب حاجة طرية ..والناس تسجد وتقوم ,وأنا أسجد وما أقمش ..واللي جنبي يتنيه يضرب فيه عشان ينبهني وأنا ولا حياة لمن ينام , وساعات بسمع الأذان وأحلم إني صليت ركعة بركعة وما افتكرش غير على الضهر ..إنه كان حلم ,, زي زماان لما كنت حيوان صغير (قبل ما أكون حيوان كبير) كانت أمي تزعقلي عشان بعملها على السرير . كنت بقولـّها معلش يا ماما أصلي حلمت إني كنت في الحمام بعمل ببيه .. فعملته ..
والصراحة ساعات كنت بعملها وأنا صاحي على السرير عشان مكسل أقوم ..ولسه حروح الحمام والجو ساقعة ...يااااه , دا الدين دين يسر وليس عسر ...وكما يقول الشاعر: إديها ببيه ميـّه ..تديك  تراوة (ياادي القرف)

إـّنا نسخرُ مـنْ الهم ّ
تحظر المدونة على الإخوات الكبار
يكتبها مراهق,
(هذه المدونة)
♣ لكل إنسان جعل من غمه ضحكة يضحكها الناس..فحبب إليهم فضفضته
♣ وإلى من سخـِر من همه, فهانت مشاكله .. وأصبحت ذاتها حل وراحة لمشاكل الناس
♣ لكل أب سمع ابنه وصدقه وكتم سره وطبطب على كتفه وضمّه
♣ لكل من له شعر صدر ..
♣ إلى الصينيين والأفغان وكل من في آسيا ..لقد نسبت إليكم أكثر مما أنسب لبلدي
♣ لكل مراهق
♣ هدية لكل أخ صغير ..أتى للدنيا كرد فعل لزينة الحياة الدنيا ,بعد ما شبع الأب من الخلفة بإبنه الكبير ..الظالم,فاعتبر الأب ابنه الصغير قضاء وقدر

.

.