أحلام واحد مش مستغطي




السلام عليكم ,, عندكو تكييف ...؟؟
طب مش ممكن اللينك بتاعه أعمله داون لوود ,,
أصلي خلاص قربت أتحول للحالة السائلة بتاعتي .. أو ربما جيلي

المهم من زماان جدن وعلى الايميل بتاعي بيجيلي رسايل زي المطرة (الشتا يعني) من ناس غريبة كده وبتكون بلغات العالم المختلفة ::
واحدة منها جيـّالي من جنوب افريقيا وطبعن بالجنوب أفريقي .. واحد بيقولي إن هو مين ومش عارف شغاال ايه وعايش فين .. والمهم بيقول إن الشخص الفلاني كان ماشي ماشي في طيارة وبعدين راحت الطيارة مفرقعة ومات هو ومراته ووعياله وكان يعيني حظه إنه مقطوف من شجرة (يعني مالوش أهل يسألوا عنه) والراجل اللي بعتلي الرسالة بيقولي بقه إنه ناوي يآخد الفلوس اللي الراجل الأولاني (اللي هو فرقع في الطيارة) وعاوز يحولها لإنجلترا بس محتاج وسيط ..
وهو أنا - المفروض , وسايبلي رقم تليفونه .... ومن الرسالة دي يجيي مئات الرسايل عندي في الجنك ميل .. والمفروض إنها بتتمسح أول بأول ... لإنه الصراحة كان بيكتبلي أرقام وهمية يقوللي مثلن عاوز أحول 500.000.000.000$ ... ودا دولار مش بريزه ولا إربع مخرومه ...

فكنت لما أقرآ الرسالة آجي عند الرقم اللي مش عارف أقراه من كتره, وأسرح ... وأسيب الجهاز وأقوم أنام على بطني وأرفع رجللي لفوق وأحلم ... إني دلوقتي في بانكوك بعمل تووور في النيل بتاعهم اللي بيمشوا فيه بقوارب غريبة.. أو في اليخت في المحيط الهنداوي وبشرب عصييير لونه أزرق ... ما هو مافيش حاجة مستحيلة مع الفلوس ... وفجأة
وأنا راكب اليخت يقوم واحد صاحبي متصل بيا على التليفون ... بس طبعن مش حرد .. لإن أنا حكون شاحن أو محول رصييد فئة خمسة جنيه وعليهم ضعف الرصييد هدية ... فأقوم مكنسل وأتصل أنا بيه .. أه من المحيط الهندي .. وألاقيه بيقوللي (إلحق الدكتورة أخدتك غياب عشان ما حضرتش السكشن ... حتى في أحلامي بيطلعولي .. فطبعن ومن ساعتها بطلت أقرأ الرسايل دي عشان بتعيشني في أوهام وبتفكرني بصاحبي اللي إتصل عليا في المحيط..

والأكتر من كده ,
إن أخويا لو قاعد جنبي ومحتاج أغيظه .,أقوم قايلله على الرسالة يقوم مصدق ويقوللي بتلقائية لا إرادية (وأنا؟؟!!) يعني نصيبه من الفلوس ..أو هو فين من ده كله ... فبأقوم أشتغله بقه وأزلــّـُه وهو يصدق ويزعل إني مش حديله من الفلوس اللي مش حخدها ... طيب

ولكن هذه المرة وعلى غير العادة المعتادة .. لاقيت عندي رسالة على الإيميل ممضية في الآخر من الست بتاعت الياهو وحاطة صورتها وتوقيعها مش بخط الكمبيوتر ..لأ بالخط العادي (فورمة يعني)
Uploaded with Avramovic Web Solutions ImageShack Hotspot
وبيقولولي إنهم عملوا إحصائية لكل إيميلات المواقع اللي بتتيح الخدمة دي, زي الياهو وهوت ميل وأختاروا أربع إيميلات تكون فايزة بجائزة قدرها إتنين وسبعين مليون جنيه .. مش مصري ,, إسترلييني .. وكاتبين تليفون الراجل المسئول عن الياهو بتاع منطقتنا ..أصل هما مقسمنها مناطق زي ياهو بولاق ..وياهوو ميدان لبنان في أرض اللوا .. وياهو شبرا .. وكده ... أه .
Uploaded with Avramovic Web Solutions ImageShack Hotspot
المهم رقم تليفونه مدينهولي واتصلت بيه من عند أبويا كتجربه .. ردت عليا واحد إنجليزية وبتتكلم إنجيليزي .. وفتحت عليا بنت الياهو .. ولو أبويا عرف حيدليتني (delete) بس أنتوا أكد مش حتقولولوا ... صح , حديكوا مليون
أنا:ألوووه ,ألووه أيوه يا ست .. ماي ناييم إذ (تييت)
هي : سوري وات دو يو ساي؟
أنا: إهييه , مش عرفاني ولا إيه . ..ألووو ألوو
هي: (تيت) يو.! ,تييت ,تييت..بلييز دونت تراي أجيين

الست دي معندهاش مهارات اتصال ولا بهارات اتصال ,طب أعمل ايه دلوقتي ,أه ..أخويا , جبت بقه أخويا تاني .. أشتغلـُه شوية .. ووريته بقه الإمضاءات وأرقام التليفونات .. ولعبت عليه وسبكتها فمرضيتش أقوم آكل .. وقولتله أنا مشغول ..بس عاوز أبعت الرد عشان ألحق الجايزة ..

وأنا من جوايا مش راضي أصدق أصل تتطلع في الآخر ياهو دي تبع شركة زيرو تسعميه ... وساعتها حقتل الإيميل بتاعي .. وحغتال الماسنجر
وأخويا ده غلاوي .. وعدو نفسه وبيكره الخير لأي بني آدم برجليين ... وأول ما سمع وبسرعة قاللي (حتديني كام)وكان وشه محمر .. ومصفر .. وتبدو عليه علامات الحقد اللا إرادي .. قمت أنا مستغل الفرصة اللي بسمسم دي , وقولت أما أطلع القديم فيه .. قلتله (دا أنا مستني الفرصة دي من زماان عشان أزلك ) .. هو (ليه ؟!! هو أنا عملتلك إيه ؟؟ بلهجة جادة وبعتاب ) قلتله (ولسه .,, دا أنا بس لما يبعتولي الفلوس ,دا أنا حصاحب ظابط  .. وحدي للظابط اللي هو عاوزه .. بس يكحرطك ..وعلى العموم الفلوس خلاص على وصول) ,, وفجأة رن جرس الباب .. فراح أخويا إتخض ,,, فكرهم وصلوا

على فكرة أخويا بجد مصدق وهو مش صغير أضحك عليه .. هو مصدق جدن لإن فيه أكتر من صاحب ليه طلع أمريكا وإنجلترا .. وكملوا تعليمهم بره وإتعينوا معيدين في أمريكا ..ومنهم اللي اتعين في شركات عالمية في مصر ..فهو مستني فرصة زي دي ..وحاسس إنها ممكن تحصل
وبسرعة راح مقومني من قدام النت ..وفتح إيميله !!.. يعيني صعب عليا ..والله صرت أبكي ..والله صرت أبكي ..من كتر الضحك

وبما إني طبعن مش عاوز أصدق لإن الأربعة الفايزين دول لو حيآخدوا سبعمية وعفريت جنيه إسترليناوي .. يعني حيكون (ستة مليون لكل واحد ..يعني كام ؟) .. دي كده نص أسهم ياهوو أو أكتر

بس طبعن لإني خلصت إمتحانات .. فأنا عندي وقت كافي إني انام على ضهري المرادي وأحلم .. وأنا بصرف الفلوس .. دا انا حعمل عمايل ..

أنا مش حعمل ببيه كده زي الناس .. لأ,دا انا حعمل ببيه فلوس ..ودولارات كمان .. وححق حلمي وأنتقم من كل الزبانية اللي قرفوني في حياتي المنقضية (فاكرين) , وحفتح دار أيتام وأحط إخواتي فيها .. وحغير إسمي .. ححطـُّه على دومين (domain) عيلة تانية ..يعني حبقى .. بدل عبده الأعور .. حغير إسم الدومين (الأعور) وأخليه دوت الأكتع مثلن (عبدو.الأكتع . كوم) وهكذا,
لرؤية الصور بحجم أكبر (الروابط1,2,3)

بس ما أخبيش ولإن الموضوع ممكن يكون في حتة أمل .. أنا هدّي لكل واحد من عيلتي ألف جنيه وأقولها بكل ثقة حتى الآن (لإني لسه ما أخدش حاجة )..وحدي لأبويا إتنين مليون بشرط ,إنه يتبرى مني ويشطب إسمي من البطاقة وأبقى مجهود الهوية ,, وأعتقد إنه .., هيوافق P: 

8 اللي يتكسف من مدونة صاحبه مايكتبش فيها تعليق:

MaNoOoSh said...

وانا معاك يا كبير
ههههههههههههههههههه

بس الصورة الاولانية دي جابتللي ننح في عيني كدة ولقيتها برقت وطلعت لبرة
عاااااااااااااااااااا

انت ليه بس بتقهرنا بالصور المضرة للصحة دي

مشخبطاتي said...

طيب أقولك حل حلو..

إبقى استغطى..!

أما بالنسبة لأخوك فيبود إن الاخوات كلهم كده..أنا اخويا بئى ياحاج لايقوم من على النت إلا فى حالة النوم والوقت الوحيد الذى أستطيع الجلوس فيه ومتابعة اخبار الدنيا هو الوقت الذى يكون نائم فيه..واهو نايم دلوقتى ومقضيها ألعاب على النت ولما يزهق يعمل داونلود ولما يزهق مايعملش حاجة يفضل قاعد غلى الكرسى وخلاص..حت انا عاوز استغل الفرصة وهو نايم وأمثل أى فيلم من أفلام الإنتقام اللى غنت حاططها فى ملف التعريف بتاعك...ماتختارلى فيلم على ذوقك..

.............................

على فكرة ماكنتش عارف أكتب لك تعليقى على البوست اللى فات..

تقبل مرورى..

ستيتة said...

دايما بحس فيك بكوميديا ريا وسكينة

والله عيلتك موسكينة دول عملوا ايه علشان كل بوست تتوعدهم بمصير احمر من اللي قبله؟

طب ها تدي سوتيتة كام من المبلغ؟
انا نفسي ابرطع في الكاريبي ويجعل بيت عبده.الأكتع كوم عمار

MǿиY El-Shreef said...

ههههههههههههههههههههههههههههه

كنت هموت من الضحك ع اخوك ياعيني

بجد دمك زي العسل

بقولك ايه انا اسمي الحاجه بركه هدعيلك ولو كسبت فعلا هاخد مليون D:

ماشي هههههههههه

ووبلاش الصورة المضره بالصحه دي :D:D

وابقى افتكر المدونين الغلابه هيهيهيهي

سلام بقى

وابقى قولنا اخر الاخبار D: اصل انا عندي امل

mony said...

بقولك..الاحسن ماتنمش على بطنك ولا ضهرك..نام على راسك يمكن تيجى معاك المره دى..

ايه الهلاوس دى..كل ماادخل مدونه الاقى الناس مهلوسه

زهور الامل said...

ههههههههه والنبي ابقى ظبط اريال الاحلام بتاعك المرة الجاية ناحية كندا كدة يمكن يجيلك رحلة هناك ولا حاجة وتروح تتزحلق على الجليد هناك
ايه يا عم انت بتصدق الهبل ده
والله بيشتغلوك
تحياتي

Sweet Violet said...

ههههههههههههههههههههههههههه
هو الحر بيعمل اكتر من كده فى الادمغ على فكرة

بس ايه كمية الحب اللى انت شايلها للعيلة دى ^_^

واحد؟؟؟؟!!!! said...

ازيك يا بنى ادم ....مشيها ادم

قافل السنترال بتاعك ليه ( على اساس نمر التليفونات اليامه اللى معايا وولا واحده بترد )

واحشنى جدا ولو كان فيك شوية خير كنت سالت على اخوك

على فكره انا سافرت الرياض وهناك دلوقت اتمنا لما ارجع ( مش من بقى ) اشوفك





و.............

حسبى الله ونعم الوكيل فيك

إـّنا نسخرُ مـنْ الهم ّ
تحظر المدونة على الإخوات الكبار
يكتبها مراهق,
(هذه المدونة)
♣ لكل إنسان جعل من غمه ضحكة يضحكها الناس..فحبب إليهم فضفضته
♣ وإلى من سخـِر من همه, فهانت مشاكله .. وأصبحت ذاتها حل وراحة لمشاكل الناس
♣ لكل أب سمع ابنه وصدقه وكتم سره وطبطب على كتفه وضمّه
♣ لكل من له شعر صدر ..
♣ إلى الصينيين والأفغان وكل من في آسيا ..لقد نسبت إليكم أكثر مما أنسب لبلدي
♣ لكل مراهق
♣ هدية لكل أخ صغير ..أتى للدنيا كرد فعل لزينة الحياة الدنيا ,بعد ما شبع الأب من الخلفة بإبنه الكبير ..الظالم,فاعتبر الأب ابنه الصغير قضاء وقدر

.

.